ഫിയാത്ത് മിഷൻ എക്സിബിഷൻ ജറൂസലെം ധ്യാനകേന്ദ്രത്തിൽ ഇന്നുമുതൽ : Deepika.com Kerala News |

തൃശൂർ: ഫിയാത്ത് മിഷൻ സംഘടിപ്പിക്കുന്ന ജിജിഎം (ഗ്രേറ്റ് ഗാതറിംഗ് ഓഫ് മിഷൻ) ഇന്നു മുതൽ 14 വരെ തൃശൂർ ജറൂസലെം ധ്യാനകേന്ദ്രത്തിൽ നടത്തും. ആദ്യദിനമായ ഇന്നു സീറോ മലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ ദിവ്യബലി അർപ്പിച്ചു മിഷൻ കോണ്‍ഗ്രസ് ഉദ്ഘാടനം ചെയ്യും.

അഖിലേന്ത്യാ തലത്തിൽ മിഷൻ പ്രവർത്തനങ്ങളിൽ ഏർപ്പെട്ടിരിക്കുന്ന വിവിധ മിഷൻ രൂപതകളും കോണ്‍ഗ്രിഗേഷനുകളും തങ്ങളുടെ മിഷനെ പരിചയപ്പെടുത്തുന്ന സ്റ്റാളുകളോടുകൂടിയ അതിവിപുലമായ എക്സിബിഷനിൽ അന്പതിൽപരം സ്റ്റാളുകളുണ്ടാവും. എക്സിബിഷന്‍റെ ഭാഗമായി ഇംഗ്ലീഷിലും മലയാളത്തിലും തെലുങ്കിലും അഞ്ചു ദിവസങ്ങളിലായി മിഷൻ ധ്യാനവും ഒരുക്കിയിട്ടുണ്ട്.

മിഷൻ കോണ്‍ഗ്രസിന്‍റെ വിവിധ ദിവസങ്ങളിൽ വിവിധ ജീവിതാവസ്ഥയിലുള്ളവർ ഒരുമിച്ചുവന്ന് മിഷനെക്കുറിച്ച് കേൾക്കാനും അറിയാനും മിഷനറിയായി സ്വയം സമർപ്പിക്കാനും ഒത്തുകൂടുന്ന ഏകദിന കൂട്ടായ്മകളാണ് മിഷൻ ഗാതറിംഗുകൾ. അഞ്ചാമത് ജിജിഎം മിഷൻ കോണ്‍ഗ്രസിൽ വിവിധ മിഷൻ ഗാതറിംഗുകളാണ് സംഘടിപ്പിച്ചിട്ടുള്ളത്.

കേരളത്തിൽനിന്നും മിഷൻ പ്രദേശങ്ങളിൽനിന്നുമായി മുപ്പതോളം ബിഷപ്പുമാർ ജിജിഎമ്മിൽ പങ്കെടുക്കും.

ജിജിഎമ്മിന്‍റെ രണ്ടു ദിവസങ്ങളിലായി നടക്കുന്ന സെമിനാറുകളിൽ ശനിയാഴ്ച ‘മണിപ്പുർ കനലാകുന്പോൾ’ എന്ന വിഷയത്തെക്കുറിച്ച് മണിപ്പൂർ ബിഷപ് എമരിറ്റസ് ഡോ. ഡൊമിനിക് ലൂമണ്‍ സംസാരിക്കും. ഞായറാഴ്ച നടക്കുന്ന സെമിനാറിൽ ‘ക്രൈസ്തവരുടെ വെല്ലുവിളികൾ ഇന്ന്’ എന്ന വിഷയത്തെക്കുറിച്ച് അഡ്വ. ജസ്റ്റിൻ പള്ളിവാതുക്കൽ സംസാരിക്കും.

ഭാരതസുവിശേഷവത്കരണത്തെ പരിശുദ്ധ അമ്മയുടെ വിമല ഹൃദയത്തിനു സമർപ്പിച്ചു നടത്തപ്പെടുന്ന മിഷൻ റോസറിക്കു സിബിസിഐ പ്രസിഡന്‍റായ ആർച്ച്ബിഷപ് മാർ ആൻഡ്രൂസ് താഴത്ത് നേതൃത്വം നൽകും.

മിഷനിൽ സ്തുത്യർഹമായ സേവനം ചെയ്തവരിൽനിന്നു തെരഞ്ഞെടുത്തവരെ ശനിയാഴ്ച വൈകുന്നേരം 6.30ന് ബിഷപ് മാർ ബോസ്കോ പുത്തൂരിന്‍റെ നേതൃത്വത്തിൽ ആദരിക്കും.