കാഞ്ഞിരപ്പള്ളി: ഹിന്ദുസ്ഥാൻ ഇന്നോവെറ്റീവ് പ്രോഡക്ട് ഡവലപ്പ്മെന്റ് സൊസൈറ്റിയും (എച്ച്ഐപിഡിഎസ്) സൊസൈറ്റി ഫോർ സയൻസ്, ടെക്നോളജി, മാനേജ്മെന്റ് ആൻഡ് ഹ്യൂമാനിറ്റീസും സംയുക്തമായി സംഘടിപ്പിച്ച സോളാർ ഇലക്ട്രിക് വെഹിക്കിൾ ചാമ്പ്യൻഷിപ്പിൽ കാഞ്ഞിരപ്പള്ളി അമൽ ജ്യോതി എൻജിനിയറിംഗ് കോളജിന്റെ ടീം സ്റ്റെല്ലാർ ഉജ്വല വിജയം നേടി.
മാർച്ച് 27 മുതൽ 31 വരെ കർണാടകയിലെ മണിപ്പാൽ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ ദേശീയ തലത്തിൽ സംഘടിപ്പിക്കപ്പെട്ട ചാമ്പ്യൻഷിപ്പിൽ അമൽ ജ്യോതി ടീം മൂന്ന് വ്യത്യസ്ത വിഭാഗങ്ങളിൽ വിജയികളായി. ബെസ്റ്റ് മോട്ടോർ മാൻ, ആക്സലറേഷൻ വിഭാഗം, മാനുവരബിലിറ്റി വിഭാഗം എന്നിവയിലാണ് അമൽ ജ്യോതി ടീം ഒന്നാം സ്ഥാനം നേടിയത്.
കോളജിലെ മെക്കാനിക്കൽ വിഭാഗം അസിസ്റ്റന്റ് പ്രഫ. ഡോ. അനീഷ് ആറിന്റെ നേതൃത്വത്തിൽ ആൽഫിൻ ജി. അലക്സ് (ടീം ക്യാപ്റ്റൻ), എസ്. അബിജിത്ത് (വൈസ് ക്യാപ്റ്റൻ), എബിൻ റെജി (ടീം മാനേജർ), എൻ.പി. പ്രശോഭ് (ഇലക്ട്രിക്കൽ ഹെഡ്), ആൽബിൻ ജോൺ, പ്രിൻസ് ജോർജ്, വി.എസ്. ഗൗതം, പവൻ കുമാർ, ആൽവിൻ ജോർജ് തുടങ്ങി 35 പേർ ചേർന്ന ടീമാണ് സോളാർ വാഹന നിർമാണം പൂർത്തിയാക്കിയത്.
ദേശീയ ചാമ്പ്യൻഷിപ്പിൽ ഉന്നത വിജയം കരസ്ഥമാക്കി തിരിച്ചെത്തിയ ടീം സ്റ്റെല്ലാറിനെ കോളജ് മാനേജ്മെന്റ് സ്വീകരണം നൽകി അനുമോദിച്ചു. അനുമോദനചടങ്ങിൽ കോളജ് മാനേജർ റവ. ഡോ. മാത്യു പായിക്കാട്ട്, ഡയറക്ടർ ഡോ. സെഡ്. വി. ളാകപ്പറമ്പിൽ, പ്രിൻസിപ്പൽ ഡോ. ലില്ലിക്കുട്ടി ജേക്കബ്, അഡ്മിനിസ്ട്രേറ്റീവ് കോ ഓർഡിനേറ്റർ ഫാ. ജിൻസ് അരക്കപ്പറമ്പിൽ, ഡീൻ അക്കാദമിക്സ് ഡോ. ബിനു സി. എൽദോസ്, മെക്കാനിക്കൽ വിഭാഗം മേധാവി ഡോ. റോഷൻ കുരുവിള, ഓട്ടോമൊബൈൽ വിഭാഗം മേധാവി ഡോ. ജെ.പി. അജിത്ത് കുമാർ എന്നിവർ പ്രസംഗിച്ചു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.