ത്രിദിന ജീവിത ദർശന - നേതൃത്വ പരിശീലന ക്യാന്പ് തൊടുപുഴ മുട്ടം ഷന്താൾ ജ്യോതി പബ്ലിക് സ്കൂളിൽ ഏപ്രിൽ 11, 12, 13 തീയതികളിൽ
അവധിക്കാലത്തിന്റെ ആരവങ്ങളുമായി ദീപിക ബാലസഖ്യം തൊടുപുഴ പ്രവിശ്യ സംഘടിപ്പിക്കുന്ന നേതൃത്വ പരിശീലന, ജീവിത ദർശന ക്യാന്പ് ഇന്ന്തൊടുപുഴ മുട്ടം ഷന്താൾ ജ്യോതി പബ്ലിക് സ്കൂളിൽ ആരംഭിക്കുന്നു.
ഭാവിയുടെ വാഗ്ദാനങ്ങളായ, നാളെയുടെ പ്രതീക്ഷകളായ കുരുന്നുകളിൽ നേതൃത്വഗുണവും ജീവിത മര്യാദകളും വളർത്തുന്നതിനായി ദീപിക ബാലസഖ്യം സംഘടിപ്പിക്കുന്ന നേതൃത്വ പരിശീലന, ജീവിത ദർശന ക്യാന്പിലേക്ക് കൊച്ചുകൂട്ടുകാർക്കു സ്വാഗതം. ഇന്നു രാവിലെ ഒൻപതിനാരംഭിക്കുന്ന ക്യാന്പ് ശനിയാഴ്ച വൈകുന്നേരം മൂന്നിനു സമാപിക്കും.
1887-ൽ മലയാളത്തിന്റെ അക്ഷരത്തറവാട്ടിലെ പ്രഥമശബ്ദമായി "ദീപിക’ കടന്നുവന്നു. ജനകോടികളെ അറിവിന്റെ വെളിച്ചത്തിലേക്കു നയിച്ച മലയാളത്തിന്റെ വിളക്ക് ഇന്നും നിറഞ്ഞ പ്രഭയോടെ ജ്വലിക്കുന്നു.
1952-ൽ ദീപികയ്ക്ക് അരുമക്കുരുന്നായി "ദീപിക ബാലസഖ്യം’ പിറന്നു. പിഞ്ചുതലമുറയ്ക്കുള്ള ദീപികയുടെ അമൂല്യമായ സമ്മാനമായിരുന്നു ഡി.സി.എൽ. അന്നുമുതൽ ഇന്നുവരെ ലക്ഷക്കണക്കിനു കുട്ടികളുടെ വഴികാട്ടിയായി.... കർമ്മഭൂമിയായി.... സുഹൃത്തായി.... പഠനക്കളരിയായി... കുടുംബമായി.... ദീപിക ബാലസഖ്യമുണ്ട്.
കക്ഷിരാഷ്ട്രീയത്തിനും ജാതി-മത-വർഗ-വർണ- ഭാഷാ വ്യത്യാസങ്ങൾക്കും അതീതമായി കുട്ടികളുടെ സമഗ്ര വികസനത്തിനും മൂല്യാധിഷ്ഠിത ജീവിതത്തിനും അടിത്തറ പാകുകയാണ് ഈ പ്രസ്ഥാനത്തിന്റെ ലക്ഷ്യം. ""നാം ഒരു കുടുംബം’’ എന്ന വിശ്വമാനവികതയുടെ മുദ്രാവാക്യമാണ് ഈ പ്രസ്ഥാനത്തിന്റെ സന്ദേശവാക്യം.
ഓരോ അധ്യയനവർഷത്തിന്റെയും ആരംഭം മുതൽ കുട്ടികൾക്കായി സ്കൂൾതലത്തിലും മേഖലാതലത്തിലും പ്രവിശ്യാതലത്തിലും നിരവധി പരിശീലന പരിപാടികളും മൂല്യബോധന ക്ലാസുകളും ദീപിക ബാലസഖ്യം സംഘടിപ്പിച്ചുവരുന്നു. ഇത്തരത്തിൽ അധ്യയനവർഷാവസാനം സംഘടിപ്പിക്കുന്ന പ്രോഗ്രാമാണ് പ്രവിശ്യാതല നേതൃത്വപരിശീലന ക്യാന്പുകൾ.
ബാലസഖ്യത്തിന്റെ പഞ്ചശീലങ്ങളായ ഈശ്വരഭക്തി, സാഹോദര്യം, സേവനതത്പരത, കൃത്യനിഷ്ഠ, അച്ചടക്കം എന്നീ ഗുണങ്ങൾ പരിശീലിക്കുന്നതിൽ മുൻഗണന നൽകുന്നു, ബാലസഖ്യത്തിന്റെ ക്യാന്പുകൾ. തങ്ങളുടെ ജീവിത ലക്ഷ്യങ്ങൾ സാക്ഷാത്കരിക്കുന്നതിനു കുട്ടികളെ ഒരുക്കുകയാണ് ഈ ക്യാന്പിലൂടെ.
വിവിധ വിഷയങ്ങളെക്കുറിച്ചുള്ള ക്ലാസുകൾ, പ്രശസ്ത വ്യക്തികളുമായുള്ള സംവാദങ്ങൾ, മത്സരങ്ങൾ തുടങ്ങിയവ ക്യാന്പിന്റെ പ്രത്യേകതകളാണ്. കൂടാതെ ലഹരിക്കെതിരേയുള്ള ബോധവത്കരണ പ്രവർത്തനങ്ങളും ഈ ക്യാന്പിൽ ഒരുക്കിയിരിക്കുന്നു.
2023- ജനുവരി 12 മുതൽ 30 വരെ "മയക്കുമരുന്നിൽ മരുന്നില്ല, മരണമാണ്' എന്ന മുദ്രാവാക്യവുമായി കേരളത്തിലെ എല്ലാ ജില്ലകളിലൂടെയും സംഘടിപ്പിച്ച ലഹരിവിരുദ്ധ വാഹന പ്രചാരണ ജാഥ വിദ്യാർഥികൾക്ക് ആവേശമായി മാറിയിരുന്നു. ജാഥ കടന്നുചെന്നയിടങ്ങളിൽ ലഹരിക്കെതിരെ അവബോധം സൃഷ്ടിക്കുന്നതിനും ഈ ജാഥയിലൂടെ സാധിച്ചിരുന്നു.
ലഹരിക്കെതിരേയുള്ള വിവിധ പരിപാടികൾ, കുട്ടികളിൽ വായനാശീലംവളർത്തുന്നതിനായുള്ള വിവിധ പദ്ധതികൾ തുടങ്ങിയ പ്രവർത്തനങ്ങൾക്ക് അടുത്ത അധ്യയനവർഷത്തിൽ ഡിസിഎൽ പ്രാമുഖ്യം നല്കുന്നു.
ഇന്നു രാവിലെ 9-ന് രജിസ്ട്രേഷൻ ആരംഭിക്കും. 9.30-ന് പതാക ഉയർത്തൽ. ഉദ്ഘാടന സമ്മേളനം 10-നു നടക്കും. ക്യാന്പ് ഉദ്ഘാടനം ചെയ്യുന്നത് ക്യാന്പംഗങ്ങളിൽനിന്നു തെരഞ്ഞെടുക്കപ്പെടുന്ന വിദ്യാർഥിയായിരിക്കും.
മൂന്നു ദിവസത്തെ ക്യാന്പിൽ കൊച്ചേട്ടൻ ഫാ.റോയി കണ്ണൻചിറ സിഎംഐ, അഞ്ജു എസ്. നായർ, പ്രഫ. ജോയ്സ് മുക്കുടം, ജയ്നമ്മ സ്റ്റീഫൻ, ജയ്സൺ പി. ജോസഫ്, സാം ക്രിസ്റ്റി ഡാനിയേൽ, ഫാ. ജിനോ പുന്നമറ്റത്തിൽ, സുജി മാസ്റ്റർ കുരുവിള ജേക്കബ്, വിവിഷ് വി. റോളന്റ്, ബിനോയി മൂഴയിൽ, ഫാ. ജോസ് കിഴക്കയിൽ, ജോൺസൺ വേങ്ങത്തടം, മിനി ജസ്റ്റിൻ തുടങ്ങിയവർ ക്ലാസുകൾ നയിക്കും.
13-ന് ഉച്ചയ്ക്ക് 1.30-ന് പ്രതിഭാസംഗമവും സമാപനസമ്മേളനവും നടക്കും. രാഷ്ട്രദീ പിക ലിമിറ്റഡ് ഡയറക്ടർ റവ. ഡോ. തോമസ് പോത്തനാമൂഴി അധ്യക്ഷത വഹിക്കുന്ന സമ്മേളനം ജലവിഭവ വകുപ്പുമന്ത്രി റോഷി അഗസ്റ്റിൻ ഉദ്ഘാടനം ചെയ്യും. ഡീൻ കുര്യാക്കോസ് എംപി സമാപനസന്ദേശം നൽകും. ജില്ലാപഞ്ചായത്ത് മെംബർ സി.വി. സുനിത മുഖ്യപ്രഭാഷണം നടത്തും.
മുട്ടം ഗ്രാമപഞ്ചായത്ത് ക്ഷേമകാര്യസ്ഥിരം സമിതി ചെയർമാൻ അഡ്വ. അരുൺ ചെറിയാൻ ക്യാന്പ് പത്രം പ്രകാശനം ചെയ്യും. ജോയി നടുക്കുടി, മിന്നൽ ജോർജ്, തോമസ് കുണിഞ്ഞി, സിസ്റ്റർ ലിറ്റി എസ്എബിഎസ്, ജോസ് ചുവപ്പുങ്കൽ, ജോസഫ് ആന്റണി, ഫിലോമിന ജെ. പൈകട, ആരാധ്യ കെ.എസ്., സിബി കെ. ജോർജ് തുടങ്ങിയവർ പ്രസംഗിക്കും.
അവധിക്കാലം ആഘോഷമാക്കാൻ എല്ലാ കൂട്ടുകാരെയും ഈ ക്യാന്പിലേക്കു സ്നേഹപൂർവം സ്വാഗതം ചെയ്യുന്നു.
റോയ് ജെ. കല്ലറങ്ങാട്ട്
ജനറൽ കൺവീനർ
ഉദ്ഘാടനസമ്മേളനം
ഇന്ന് 10.00 AM
കാര്യപരിപാടി
ഈശ്വരപ്രാർത്ഥന :
സ്വാഗതം : റവ. സിസ്റ്റർ ലിസ് ലിൻ SABS
(പ്രിൻസിപ്പൽ, മുട്ടം ഷന്താൾ ജ്യോതി
പബ്ലിക് സ്കൂൾ)
അധ്യക്ഷപ്രസംഗം : ശ്രീമതി ഷേർളി അഗസ്റ്റിൻ
(പ്രസിഡന്റ് മുട്ടം ഗ്രാമപഞ്ചായത്ത്)
ലക്കി സ്റ്റാർ ഓഫ് ദി
ക്യാന്പ് പ്രഖ്യാപനം : റവ. ഫാ. റോയി കണ്ണൻചിറ CMI
(കൊച്ചേട്ടൻ, ഡിസിഎൽ ദീപിക)
ഉദ്ഘാടനം : ലക്കിസ്റ്റാർ
ആദരിക്കൽ : റവ.ഫാ. ജോൺ പാളിത്തോട്ടം
(വികാരി, സിബിഗിരി പള്ളി)
സന്ദേശം : ശ്രീ. എൻ.കെ. ബിജു
(തൊടുപുഴ ബ്ലോക്ക്
പഞ്ചായത്ത് മെംബർ)
ആശംസ : ശ്രീ. മനോജ് ടി. ബെഞ്ചമിൻ
(പി.ടി.എ. പ്രസിഡന്റ്)
: ശ്രീ. റോയ് ജെ. കല്ലറങ്ങാട്ട്
(പ്രവിശ്യ കോ-ഓർഡിനേറ്റർ)
: ശ്രീമതി ബീന സണ്ണി
(ശാഖാ ഡയറക്ടർ, ഷന്താൾ ജ്യോതി
പബ്ലിക് സ്കൂൾ)
: കുമാരി പെട്ര മരിയ റെജി
(പ്രവിശ്യാ കൗൺസിലർ)
: മാസ്റ്റർ കൃഷ്ണപ്രസാദ് പനോളിൽ
(പ്രവിശ്യാ ജനറൽ സെക്രട്ടറി)
നന്ദി : ശ്രീ. എബി ജോർജ്
(ഡിസിഎൽ സംസ്ഥാന പ്രോഗ്രാം
കോ-ഓർഡിനേറ്റർ)
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.