വടത്തില്‍ കുരുങ്ങി യുവാവിന്‍റെ മരണം; വീഴ്ചയില്ലെന്ന് കമ്മീഷണര്‍ : Deepika.com Kerala News |

കൊച്ചി: പ്രധാനമന്ത്രിയുടെ സുരക്ഷയ്ക്കായി കെട്ടിയ വടത്തില്‍ കുരുങ്ങി ബൈക്ക് യാത്രികനായ യുവാവ് മരിച്ച സംഭവത്തില്‍ പോലീസിനു വീഴ്ച വന്നിട്ടില്ലെന്ന് സിറ്റി പോലീസ് കമ്മീഷണര്‍ ശ്യാം സുന്ദര്‍. കൈ കാണിച്ചിട്ടും നിര്‍ത്താതെ മുന്നോട്ടുപോയപ്പോഴാണ് മനോജ് ഉണ്ണി അപകടത്തില്‍പ്പെട്ടത്.

വടം കെട്ടിയ സ്ഥലത്തിന് ആറ് മീറ്റര്‍ മുന്‍പ് മൂന്നു പോലീസുകാരെ നിര്‍ത്തിയിരുന്നു. അവര്‍ നല്‍കിയ അപകട മുന്നറിയിപ്പ് അവഗണിച്ച് മനോജ് അമിതവേഗതയില്‍ നിർത്താതെ പോയി. വടം വ്യക്തമായി കാണാവുന്ന രീതിയിലാണ് കെട്ടിയിരുന്നത്.

വെളിച്ചക്കുറവുണ്ടെന്ന ആരോപണം അടിസ്ഥാനരഹിതമാണ്. യുവാവിന് മോട്ടോര്‍വാഹനം ഓടിക്കുന്നതിനുള്ള ലൈസന്‍സ് ഉണ്ടായിരുന്നില്ല. ആര്‍ടി ഓഫീസില്‍ നിന്നുലഭിച്ച രേഖകള്‍ പ്രകാരം 2021ല്‍ ലേണേഴ്‌സ് ലൈസന്‍സ് എടുത്തിരുന്നു. പിന്നീട് ഇത് പുതുക്കുകയോ ടെസ്റ്റ് പാസായി ലൈസന്‍സ് എടുക്കുകയോ ഉണ്ടായില്ല. ലൈസന്‍സ് ഇല്ലാത്തതിനാലാണ് പോലീസ് കൈകാട്ടിയിട്ടും നിര്‍ത്താതെ മുന്നോട്ടു പോയതെന്നും കമ്മീഷണര്‍ പറഞ്ഞു.

സംഭവത്തില്‍ കേസ് രജിസ്റ്റര്‍ ചെയ്തിട്ടുണ്ട്. മനോജിന്‍റെ രക്തസാമ്പിളുകള്‍ പരിശോധനയ്ക്ക് അയച്ചു. അമിതവേഗതയിലാണോ സഞ്ചരിച്ചിരുന്നതെന്ന് കണ്ടെത്താന്‍ സിസിടിവി ദൃശ്യങ്ങള്‍ പരിശോധിക്കുമെന്നും കമ്മീഷണര്‍ പറഞ്ഞു.

മനോജ് മദ്യപിച്ചിട്ടില്ല: സഹോദരി

കൊച്ചി: മനോജ് മദ്യപിച്ചിരുന്നുവെന്ന പോലീസിന്‍റെ ആരോപണം തെറ്റാണെന്ന് സഹോദരി ചിപ്പി. തന്‍റെ സഹോദരന്‍ മദ്യപിച്ചിരുന്നില്ലെന്നും മദ്യപിച്ചാല്‍ വാഹനം എടുക്കാറില്ലെന്നും ചിപ്പി പറഞ്ഞു. ഡോക്ടര്‍ അടക്കം പറഞ്ഞത് രക്തത്തില്‍ മദ്യത്തിന്‍റെ സാന്നിധ്യമില്ലെന്നാണ്. റോഡില്‍ വെളിച്ചക്കുറവ് ഉണ്ടായിരുന്നു.

റോഡിനു കുറുകെ കെട്ടിയ വടം കാണുന്ന രീതിയില്‍ റിബണോ ബാരിക്കേഡോ പോലീസ് വച്ചിരുന്നില്ല. മന്ത്രിമാര്‍ക്കൊരുക്കുന്ന സുരക്ഷ സാധാരണക്കാരായ ജനങ്ങളുടെ കാര്യത്തിലും പോലീസ് ഒരുക്കണമെന്നും അതു കാണിച്ചിരുന്നെങ്കില്‍ തന്‍റെ സഹോദരന്‍റെ ജീവന്‍ നഷ്ടപ്പെടില്ലായിരുന്നുവെന്നും അവര്‍ പറഞ്ഞു.