നെൽകൃഷിയിലും മാതൃകയായി സ്റ്റുഡന്റ്സ് പോലീസ് കേഡറ്റുകൾ
Friday, August 26, 2016 10:38 AM IST
രാജാക്കാട്: ഹൈറേഞ്ചിലെ പാടശേഖരങ്ങളിൽനിന്നും നെൽകൃഷി പടിയിറങ്ങുമ്പോൾ പഴയ പ്രതാപകാലത്തിന്റെ ഓർമകൾ നിലനിർത്തി നെൽകൃഷിയുടെ അനുഭവപാഠം പുതുതലമുറയ്ക്ക് പകർന്നുനൽകുകയാണ് ചെമ്മണ്ണാർ സെന്റ് സേവ്യേഴ്സ് ഹയർ സെക്കൻഡറി സ്കൂളിലെ സ്റ്റുഡന്റ്സ് പോലീസ് കേഡറ്റുകൾ. കൃഷിഭവന്റെ സഹായത്തോടെ ഒരേക്കറോളം സ്‌ഥലത്താണ് കുട്ടികളുടെ നേതൃത്വത്തിൽ നെൽകൃഷി ആരംഭിച്ചിരിക്കുന്നത്.

നെൽവയലുകൾ സംരക്ഷിക്കേണ്ടത് നാളെയുടെ നിലനിൽപ്പിന്റെ ആവശ്യകതയാണെന്നുമുള്ള സന്ദേശമാണ് ഇവർ പ്രായോഗികതലത്തിൽ മറ്റുള്ളവരിലേയ്ക്ക് പകർന്നുനൽകുന്നത്.

ചെമ്മണ്ണാർ പാലാക്കുഴിയിൽ ജോർജിന്റെ ഒരേക്കർ പാടശേഖരത്താണ് എസ്പിസി കുട്ടികളുടെ നേതൃത്വത്തിൽ നെൽകൃഷി ആരംഭിച്ചത്.

കൃഷിയെക്കുറിച്ച് കൂടുതൽ പഠിക്കുന്നതിനും ഇത് അനുഭവിച്ചറിയുന്നതിനും പാടം കൃഷിക്കായി പാകപ്പെടുത്തുന്നതിനുള്ള എല്ലാ ജോലികളും കുട്ടികൾതന്നെയാണ് ചെയ്തത്. സഹായവുമായി രക്ഷകർത്താക്കളും സ്കൂൾ മാനേജ്മെന്റും ഇവർക്കൊപ്പമുണ്ട്.

ആദ്യമായി ആരംഭിച്ച നെൽകൃഷിയുടെ ഞാറുനടീൽ ഉത്സവം വിപുലമായാണ് സംഘടിപ്പിച്ചത്. എസ്പിസി നോഡൽ ഓഫീസർ കൂടിയായ ഡിവൈഎസ്പി വി.എൻ. സജി ഞാറുനടീൽ ഉത്സവം ഉദ്ഘാടനംചെയ്തു.

അസിസ്റ്റന്റ് നോഡൽ ഓഫീസർ സുരേഷ് ബാബു, സേനാപതി ഗ്രാമപഞ്ചായത്ത് പ്രസിഡന്റ് ജോമി മമ്പള്ളി, എഎസ്ഐ സാബു തോമസ്, കൃഷി അസിസ്റ്റന്റ് തോമസ് പോൾ, സ്കൂൾ മാനേജർ ഫാ. ടോമി ആനിക്കുഴിക്കാട്ടിൽ, അധ്യാപകരായ മഞ്ജു, സജി സെബാസ്റ്റ്യൻ, ഷൈന കെ. ജോസ് തുടങ്ങിയവർ പ്രസംഗിച്ചു.