ബന്ധു പെട്രോള് ഒഴിച്ച് കത്തിച്ച യുവാവ് മരിച്ചു; കൊലപാതകം ഭാര്യയെ ശല്യം ചെയ്തതിന്
Sunday, March 17, 2024 11:00 AM IST
കൊല്ലം: ചടയമംഗലം പോരേടത്ത് ബന്ധു പെട്രോള് ഒഴിച്ച് കത്തിച്ച യുവാവ് മരിച്ചു. കുന്നുംപുറം സ്വദേശി കലേഷ് (23) ആണ് മരിച്ചത്.ഗുരുതരമായി പൊള്ളലേറ്റ് പാരിപ്പള്ളി മെഡിക്കല് കോളജ് ആശുപത്രിയില് ചികിത്സയിലിരിക്കെയാണ് മരണം.
സംഭവത്തില് കലേഷിന്റെ ബന്ധുവായ സനലിനെ പോലീസ് അറസ്റ്റ് ചെയ്തിരുന്നു. ഇയാള് ഇപ്പോള് റിമാന്ഡിലാണ്. സനലിന്റെ ഭാര്യയെ ശല്യപ്പെടുത്തിയതിലെ വിരോധമാണ് കൊലപാതകത്തിലേക്ക് നയിച്ചതെന്ന് പോലീസ് പറഞ്ഞു.
കലേഷ് ജോലി ചെയ്യുന്ന സ്ഥാപനത്തില് അതിക്രമിച്ച് കയറിയ ശേഷം കൈയില് കരുതിയിരുന്ന പെട്രോള് ഒഴിച്ച് തീകൊളുത്തുകയായിരുന്നു. ഓടിക്കൂടിയ നാട്ടുകാരാണ് ഇയാളെ ആശുപത്രിയിലെത്തിച്ചത്.
80 ശതമാനത്തോളം പൊള്ളലേറ്റ കലേഷ് തീവ്രപരിചരണ വിഭാഗത്തില് ചികിത്സയിലിരിക്കെയാണ് മരിച്ചത്. സംഭവത്തിന് പിന്നാലെ സനല് ചടയമംഗലം പൊലീസ് സ്റ്റേഷനിലെത്തി കീഴടങ്ങുകയായിരുന്നു.