ഡല്ഹിയിലെ ബോംബ് ഭീഷണി വ്യാജമെന്ന് പോലീസ്; സന്ദേശത്തിന്റെ ഉറവിടം കണ്ടെത്തി
Wednesday, May 1, 2024 1:48 PM IST
ന്യൂഡല്ഹി: ഡല്ഹിയില് നൂറിലേറെ സ്കൂളുകള്ക്ക് ലഭിച്ച ബോംബ് ഭീഷണിസന്ദേശം വ്യാജമെന്ന് നിഗമനം. ഭീഷണി സന്ദേശം വന്ന ഇ- മെയിലുകളുടെ ഉറവിടം ഡല്ഹി പോലീസ് കണ്ടെത്തിയതായി ലഫ്. ഗവര്ണര് വി.കെ. സക്സേന അറിയിച്ചു. അന്വേഷണം നടന്നുവരുന്നതായും കടുത്ത നടപടി ഉണ്ടാവുമെന്നും അദ്ദേഹം ഉറപ്പുനല്കി.
ഡല്ഹിയിലെ മയൂര് വിഹാര് മദര് മേരി സ്കൂള്, ദ്വാരകയിലെ സന്സ്കൃതി സ്കൂള്, നോയിഡയിലെ ഡല്ഹി പബ്ലിക് സ്കൂള് എന്നിവിടങ്ങളിലാണ് ആദ്യം ഭീഷണി സന്ദേശം എത്തിയത്.
ഇമെയിലിലൂടെയായിരുന്നു ഭീഷണി. പിന്നീട് മറ്റ് സ്കൂളുകളിലേക്കും ഭീഷണി സന്ദേശം എത്തി. പിന്നാലെ ഡല്ഹി പോലീസിന്റെ ബോംബ് സ്ക്വാഡും അഗ്നിശമനസേനാ വിഭാഗവും സ്കൂളുകളിൽ എത്തിയിരുന്നു.
വിദ്യാര്ഥികളെ സ്കൂളില്നിന്ന് ഒഴിപ്പിച്ച ശേഷം പരിശോധന നടത്തിയെങ്കിലും അസ്വാഭാവികമായി ഒന്നും കണ്ടെത്തിയിട്ടില്ല. ആശങ്കപ്പെടേണ്ട സാഹചര്യമില്ലെന്നും സുരക്ഷയുടെ ഭാഗമായാണ് സ്കൂളുകൾ ഒഴിപ്പിച്ചതെന്നും പോലീസ് അറിയിച്ചു.