പൗരോഹിത്യം പ്രകാശപൂരിതമാകണം: മാർ ക്ലീമിസ് ബാവ : Deepika.com Special News

പൗരോഹിത്യം പ്രകാശപൂരിതമാകണം: മാർ ക്ലീമിസ് ബാവ

യേശുക്രിസ്തുവിന്‍റെ സാന്നിധ്യത്തെ ആരാധിക്കുകയും തിരുസഭയെക്കുറിച്ച് ആഴത്തിൽ പഠിപ്പിക്കുകയും ചെയ്യുന്പോഴാണു കുർബാന കൂട്ടായ്മയ്ക്ക് ഉൗഷ്മളതയും ഐക്യവും ഉണ്ടാകുകയെന്നു സിബിസിഐ പ്രസിഡന്‍റും സീറോ മലങ്കരസഭ മേജർ ആർച്ച്ബിഷപുമായ കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ. മാർ തോമസ് തറയിലിന്‍റെ മെത്രാഭിഷേക ചടങ്ങിൽ അനുഗ്രഹപ്രഭാഷണം നടത്തുകയായിരുന്നു ബാവ.

ചുറ്റുപാടുമുളളവരുടെ കണ്ണുകളിലെ നനവിന്‍റെ കാരണം ആന്വേഷിക്കാൻ ഇടയനു കഴിയണം. ദേവാലയത്തിലെ തിരികൾ കത്തിക്കുന്നതിനും കെടാതെ സൂക്ഷിക്കുന്നതിനും പുരോഹിതനു കടമയുള്ളതുപോലെ ചുറ്റുപാടുമുള്ളവരുടെ പ്രകാശം അണഞ്ഞു പോകുന്നുണ്ടോ എന്നു പരിശോധിക്കാനും ഇടയനു നിയോഗമുണ്ടെന്നും അദ്ദേഹം ഉദ്ബോധിപ്പിച്ചു.

യേശുവിന്‍റെ സമാധാന സന്ദേശ വിളംബരം മേൽപ്പട്ടക്കാരുടെ ദൗത്യം: ഡോ. സൂസപാക്യം

ചങ്ങനാശേരി: യേശുവിന്‍റെ സമാധാന സന്ദേശം വിളംബരം ചെയ്യുകയാണ് മേൽപട്ടക്കാരുടെയും വൈദികരുടെയും ദൗത്യമെന്ന് കെസിബിസി ചെയർമാൻ ആർച്ച്ബിഷപ് മാർ സൂസപാക്യം. ചങ്ങനാശേരി മെത്രാപ്പോലീത്തൻ പള്ളിയിൽ നടന്ന മാർ തോമസ് തറയിലിന്‍റെ മെത്രാഭിഷേക ശുശ്രൂഷാമധ്യേ വചനസന്ദേശം നൽകുകയായിരുന്നു ആർച്ച്ബിഷപ്.

യേശു തന്‍റെ മുറിവുകളാണ് സമാധാന സന്ദേശമായി ലോകത്തിനു പകർന്നു നൽകിയത്. ചെറിയ മുറിവുകൾക്കും ത്യാഗങ്ങൾക്കും വലിയ സമാധാനവും പ്രത്യാശകളും നൽകാൻ കഴിയും.സമാധാന സ്ഥാപകനായ യേശുവിനെയാണ് സുവിശേഷത്തിൽ കാണുന്നത്. ഏതവസരത്തിലും സമാധാനം ആശംസിക്കണമെന്നാണ് ഈശോ ശിഷ്യൻമാരെ അറിയിച്ചത്. മാർ തോമസ് തറയിലിനും ഇതേ മാർഗവും സന്ദേശവുമാണ് ഈശോ പകരുന്നതെന്നും ഡോ. സൂസപാക്യം കൂട്ടിച്ചേർത്തു.

മേൽപ്പട്ടക്കാരൻ സ്നേഹത്തിന്‍റെ പ്രതീകം: കുര്യാക്കോസ് മാർ സേവേറിയോസ്

ദൈവസ്നേഹത്തിന്‍റെ പ്രതീകമാണു മേൽപ്പട്ടക്കാരെന്നു ക്നാനായ യാക്കോബായ സഭ മെത്രാപ്പോലീത്ത കുര്യാക്കോസ് മാർ സേവേറിയോസ് വലിയ മെത്രാപ്പോലീത്ത. പൊതുസമൂഹത്തിന്‍റെ നവോത്ഥാന നായകനാകാൻ മേൽപട്ടക്കാർക്കു കഴിയണം. സ്നേഹത്തിന്‍റെ നേർകാഴ്ചയാകാനും പ്രകാശത്തിന്‍റെ ഉത്സവമായി മാറാനും നാവിൻതുന്പിൽനിന്നു ഉതിർന്നു വീഴുന്ന വാക്കുകൾ നിത്യരക്ഷയുടെ സദ് വാർത്തയാക്കാനും കഴിയണം.

അന്ധകാരം നിറഞ്ഞ ലോകത്ത് ഇടിമിന്നൽപോലെ പ്രകാശം ചൊരിയാൻ മാർ തോമസ് തറയിലിനു കഴിയട്ടെയെന്നും കുര്യാക്കോസ് മാർ സേവേറിയോസ് വലിയ മെത്രാപ്പോലീത്ത ആശംസിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.