സാങ്കേതികവിദ്യ എല്ലാത്തിനും പരിഹാരമാകുന്ന ഒറ്റമൂലിയല്ല: ഹമീദ് അൻസാരി
Tuesday, February 27, 2024 9:35 PM IST
ന്യൂഡൽഹി : സാങ്കേതികവിദ്യയുടെ അതിപ്രസരം മാധ്യമരംഗത്ത് പുതിയ ധാർമിക വെല്ലുവിളികൾ ഉയർത്തിയെന്നു മുൻ ഉപരാഷ്ട്രപതി ഡോ. ഹമീദ് അൻസാരി. സാങ്കേതികവിദ്യ എല്ലാത്തിനും പരിഹാരമാകുന്ന ഒറ്റമൂലിയല്ലെന്നും അദ്ദേഹം പറഞ്ഞു.
കെ.വി.തോമസ് വിദ്യാധനം ട്രസ്റ്റിന്റെ ടി.വി.ആർ.ഷേണായി അവാർഡ് ഫോർ എക്സലൻസ് ഇൻ ജേർണലിസം പുരസ്കാരം മുതിർന്ന മാധ്യമപ്രവർത്തകൻ രാജ്ദീപ് സർദേശായിക്ക് സമ്മാനിച്ചു പ്രസംഗിക്കുകയായിരുന്നു ഹമീദ് അൻസാരി.
ജനാധിപത്യധ്വംസനമാണ് രാജ്യത്തു നിലവിൽ നടക്കുന്നതെന്ന് ചടങ്ങിൽ പ്രസംഗിച്ച സിപിഐ ദേശീയ ജനറൽ സെക്രട്ടറി ഡി. രാജ പറഞ്ഞു. പാർലമെന്റിൽ പ്രതിഷേധിച്ചതിന് ഒരേസമയം ജനപ്രതിനിധികളെ സസ്പെൻഡ് ചെയ്ത സംഭവം ചരിത്രത്തിലാദ്യമാണെന്നും അദ്ദേഹം പറഞ്ഞു.
മുതിർന്ന മാധ്യമപ്രവർത്തകൻ എൻ. അശോകൻ അധ്യക്ഷത വഹിച്ചു. കേരളസർക്കാരിന്റെ ഡൽഹിയിലെ പ്രത്യേക പ്രതിനിധി പ്രഫ.കെ.വി.തോമസ്, മാധ്യമപ്രവർത്തകരായ ആർ. പ്രസന്നൻ, ജോർജ് കള്ളിവയലിൽ, ജോമി തോമസ് എന്നിവർ പ്രസംഗിച്ചു.