എംവിഐപി കനാല്‍ ശുചീകരണത്തിന്‍റെരണ്ടാഘട്ടം നടന്നു : Deepika.com Nattu Visesham

KOTTAYAM

എംവിഐപി കനാല്‍ ശുചീകരണത്തിന്‍റെരണ്ടാഘട്ടം നടന്നു

Wednesday, May 8, 2024 7:07 AM IST

കുറുപ്പന്തറ: ഓമല്ലൂര്‍ പ്രദേശവാസികളുടെ നേതൃത്വത്തില്‍ എംവിഐപി കനാല്‍ ശുചീകരണത്തിന്‍റെ രണ്ടാഘട്ടം നടന്നു. കാടും പള്ളയും മാലിന്യങ്ങളും നിറഞ്ഞ എംവിഐപി കനാല്‍ നാട്ടുകാരുടെ നേതൃത്വത്തില്‍ ഘട്ടം ഘട്ടമായി വൃത്തിയാക്കി വരികയാണ്. ഓമല്ലൂര്‍ പ്രദേശത്തെ കനാല്‍ ശുദ്ധീകരണത്തിന്‍റെ രണ്ടാഘട്ടം ബ്ലോക്ക് പഞ്ചായത്തംഗം ആന്‍സി മാത്യു ഉദ്ഘാടനം ചെയ്തു.

ഓമല്ലൂര്‍ പ്രദേശത്തുകൂടി കടന്നുപോകുന്ന രണ്ട് കിലോ മീറ്റോളം ദൂരത്തിലാണ് കനാല്‍ വൃത്തിയാക്കി തെളിനീരൊഴുകുന്ന കനാലാക്കി മാറ്റിയെടുക്കുന്നതിനുള്ള ശ്രമത്തിനായി പ്രദേശവാസികള്‍ മുന്നിട്ടിറങ്ങിയിരിക്കുന്നത്.

കനാല്‍ വൃത്തിയാക്കിയ ശേഷം വരുംകാലങ്ങളിലും കനാല്‍ സംരക്ഷിക്കാനും തുടര്‍പദ്ധതിയായി ഇതു മുന്നോട്ട് കൊണ്ടുപോകുന്നതിനുമാണ് നാട്ടുകാരുടെ തീരുമാനം. എല്ലായിടത്തും നാട്ടുകാര്‍ സംഘടിച്ചു കനാല്‍ വൃത്തിയാക്കി സൂക്ഷിച്ചാല്‍ ആയിരകണക്കിനാളുകള്‍ക്ക് ഇതിന്‍റെ പ്രയോജനം ലഭിക്കുമെന്നും തങ്ങള്‍ തുടങ്ങിവച്ച പദ്ധതി മറ്റുള്ളവരും മാതൃകയാക്കിയാല്‍ കനാലും പരിസരവും ടൂറിസ സൗഹൃദ പ്രദേശമാക്കാനാവുമെന്നും ഇവര്‍ പറയുന്നു.

ജോണി വെങ്ങിണിക്കപറമ്പില്‍, ജോജി ഒറ്റപ്ലാക്കില്‍, നോബിള്‍ ജോയി, പീറ്റര്‍ ചെറുകുന്നേല്‍ എന്നിവര്‍ കനാല്‍ ശുചീകരണത്തിന് നേതൃത്വം നല്‍കി. അംഗങ്ങള്‍ക്ക് കുറുപ്പന്തറ കുടുംബരോഗ്യ കേന്ദ്രത്തില്‍നിന്ന് പ്രതിരോധ ഗുളികകള്‍ വിതരണം ചെയ്തു.

മൂന്നാഘട്ട ശുചീകരണം 12ന് ജില്ലാ പഞ്ചായത്തംഗം നിര്‍മല ജിമ്മി ഉദ്ഘാടനം ചെയ്യും. ലോക പഞ്ചഗുസ്തി ചാമ്പ്യന്‍ ജോബി മാത്യു മുഖ്യാതിഥിയായിരിക്കും. മാഞ്ഞൂര്‍ പഞ്ചായത്ത് വൈസ് പ്രസിഡന്‍റ് ബിജു സെബാസ്റ്റ്യന്‍ കൊണ്ടൂക്കാല, വാര്‍ഡ് മെമ്പര്‍ ചാക്കോ മത്തായി എന്നിവര്‍ പ്രസംഗിക്കും.