ഇൻഡോർ ബിഷപ് മാർ തോമസ് മാത്യു കുറ്റിമാക്കലിന് ജന്മനാടിന്‍റെ സ്വീകരണം : Deepika.com Nattu Visesham

IDUKKI

ഇൻഡോർ ബിഷപ് മാർ തോമസ് മാത്യു കുറ്റിമാക്കലിന് ജന്മനാടിന്‍റെ സ്വീകരണം

Monday, May 6, 2024 3:32 AM IST

വാഴക്കുളം: കല്ലൂർക്കാട് ഇടവകയ്ക്കും കോതമംഗലം രൂപതയ്ക്കും ഏറെ അഭിമാനവും ആഹ്ലാദവുമാണ് ഇൻഡോർ രൂപതയിലെ ബിഷപ്പുമാരെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ.

ഇൻഡോർ രൂപത ബിഷപ്പായി അഭിഷിക്തനായ മാർ തോമസ് മാത്യു കുറ്റിമാക്കലിന് മാതൃ ഇടവകയായ കല്ലൂർക്കാട് സെന്‍റ് അഗസ്റ്റിൻസ് പള്ളിയിൽ നൽകിയ സ്വീകരണസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്.

ഇൻഡോറിലെ സ്ഥാനമൊഴിഞ്ഞ ബിഷപ് മാർ ചാക്കോ തോട്ടുമാരിക്കൽ ആത്മീയ ശുശ്രൂഷയ്ക്കൊപ്പം സാമൂഹ്യസേവന രംഗത്തും വ്യക്തിമുദ്ര പതിപ്പിച്ചിരുന്ന വ്യക്തിത്വമാണെന്നും ഇരുവർക്കും പൗരോഹിത്യം നൽകിയ മാർ ജോർജ് പുന്നക്കോട്ടിലിന് അഭിനന്ദനങ്ങൾ അർപ്പിക്കുന്നതായും ബിഷപ് പറഞ്ഞു.

ബിഷപ് മാർ ജോർജ് പുന്നക്കോട്ടിൽ അനുഗ്രഹ പ്രഭാഷണം നടത്തി. വിശ്വാസത്തിലുള്ള ശുശ്രൂഷയും വിശ്വാസത്തിന്‍റേതായ ശുശ്രൂഷയും പൗരോഹിത്യത്തിനുണ്ടെന്ന് ബിഷപ് പറഞ്ഞു.
പ്രാരംഭ കാലത്ത് വിശ്വാസത്തിന്‍റെ ആത്മീയ ശുശ്രൂഷയും വിശ്വാസത്തിൽ നിന്നുള്ള ഭൗതിക ഇടപെടലുകളും മിഷനറിമാർക്ക് നടത്തേണ്ടിവന്നിരുന്നെന്ന് ബിഷപ് പറഞ്ഞു.

കല്ലൂർക്കാട് സെന്‍റ് അഗസ്റ്റിൻസ് പള്ളി വികാരി റവ. ഡോ. മാനുവൽ പിച്ചളക്കാട്ട്, ഫാ. ജോസ് തോട്ടുമാരിയ്ക്കൽ, കല്ലൂർക്കാട് സെന്‍റ് അഗസ്റ്റിൻസ് ഹയർ സെക്കൻഡറി സ്കൂൾ പ്രധാനാധ്യാപിക ഷീബ മാത്യൂസ്, ജോയി കുറ്റിമാക്കൽ, ഫ്രാൻസിസ് റാത്തപ്പിള്ളിൽ തുടങ്ങിയവർ പ്രസംഗിച്ചു.

ബിഷപ്പുമാരായ മാർ തോമസ് മാത്യു കുറ്റിമാക്കൽ, മാർ ചാക്കോ തോട്ടുമാരിക്കൽ എന്നിവർ മറുപടിപ്രസംഗം നടത്തി. നേരത്തെ വാദ്യമേള അകമ്പടിയോടെ ബിഷപ്പുമാരെ പള്ളിയങ്കണത്തിൽ സ്വീകരിച്ചു.

ബിഷപ്പുമാരുടെ മുഖ്യകാർമികത്വത്തിൽ സമൂഹബലിയും ഉണ്ടായിരുന്നു.