Education
തൃശൂർ: ഒന്നാം പ്രഫഷണൽ എംബിബിഎസ് ഡിഗ്രി സപ്ലിമെന്ററി (സേ) പരീക്ഷകൾ (2024 സ്കീം) പുനഃക്രമീകരിച്ചു. പുതുക്കിയ ഷെഡ്യൂൾ പ്രകാരം പരീക്ഷകൾ നവംബർ ഒന്പതുമുതൽ നടക്കും.
നാഷണൽ മെഡിക്കൽ കമ്മിഷൻ പുറപ്പെടുവിച്ച പൊതുവിജ്ഞാപനത്തിന്റെയും സർവകലാശാലാ സർക്കുലറിന്റെയും അടിസ്ഥാനത്തിൽ, നാല് അവസരങ്ങൾ വിനിയോഗിച്ചിട്ടും ഒന്നാം പ്രഫഷണൽ പരീക്ഷ പാസാകാത്ത അർഹരായ വിദ്യാർഥികൾക്ക് ഒരു അധിക അവസരം (മേഴ്സി ചാൻസ്) കൂടി അനുവദിച്ചിട്ടുണ്ട്.
ഇതിനായി സാധാരണ പരീക്ഷാ രജിസ്ട്രേഷൻ ഫീസിന് പുറമേ 2,270 രൂപ മേഴ്സി ചാൻസ് ഫീസായി അടയ്ക്കണം. കൂടുതൽ വിവരങ്ങൾ കേരള ആരോഗ്യശാസ്ത്ര സർവകലാശാല വെബ്സൈറ്റിൽ (www.kuhs.ac.in) ലഭ്യമാണ്.
Kerala
തിരുവനന്തപുരം: എസ്എംഎ മരുന്ന് വിവാദത്തിൽ വിശദീകരണവുമായി ആരോഗ്യമന്ത്രി കെ. മുരളീധരൻ. ഗുണമേന്മ സ്ഥിരീകരിച്ച മരുന്നാണ് നൽകിയതെന്ന് മന്ത്രി കെ. മുരളീധരൻ വ്യക്തമാക്കി. കഴിഞ്ഞ സർക്കാരാണ് ഇതുമായി ബന്ധപ്പെട്ട നടപടി തുടങ്ങിയതെന്നും അദ്ദേഹം പറഞ്ഞു.
അതേസമയം, കുട്ടികളിൽ മരുന്ന് പരീക്ഷണം നടത്താൻ പാടില്ലെന്ന് മുൻ ആരോഗ്യമന്ത്രി കെ.കെ. ശൈലജ പറഞ്ഞു. രക്ഷിതാക്കൾ ആശങ്കയിലാണെന്നും ഇതേക്കുറിച്ച് വിശദമായ പരിശോധന വേണമെന്നും ശൈലജ പറഞ്ഞു.
Kerala
തിരുവനന്തപുരം: സംസ്ഥാനത്ത് മരുന്ന് പ്രതിസന്ധി ഇല്ലെന്നും ആവശ്യത്തിന് മരുന്നുണ്ടെന്നും ആരോഗ്യമന്ത്രി കെ. മുരളീധരൻ. പ്രതിസന്ധി ഉണ്ടാക്കുന്നത് മാധ്യമങ്ങളാണെന്നും മുരളീധരൻ കുറ്റപ്പെടുത്തി.
ചില മരുന്ന് കമ്പനിക്കാർ വടിയും വാളുമായി ഇറങ്ങിയിട്ടുണ്ട്. എന്നാൽ താൻ അത് കണ്ട് പേടിക്കുന്നവൻ അല്ലെന്നും മുരളീധരൻ പറഞ്ഞു.
Kerala
തൊടുപുഴ: ഇടുക്കി മെഡിക്കല് കോളജില് 21 ദിവസം പ്രായമുള്ള നവജാത ശിശുവിന് കാലാവധി കഴിഞ്ഞ മരുന്ന് നല്കിയത്തില് ഫാര്മസിസ്റ്റിന് വീഴ്ച സംഭവിച്ചതായി കണ്ടെത്തി. വകുപ്പ് തലത്തില് നടന്ന അന്വേഷണത്തിലാണ് വീഴ്ച സംഭവിച്ചതായി കണ്ടെത്തിയത്.
കുഞ്ഞിന് നല്കിയ ഓയിന്മെന്റിന്റെ പുതിയ സ്റ്റോക്ക് മെഡിക്കല് കോളേജില് എത്തിയിരുന്നു. എന്നിട്ടും പഴയ സ്റ്റോക്കില് നിന്നാണ് ഓയിന്മെന്റ് നല്കിയത്. പുതിയ സ്റ്റോക്ക് നീല നിറത്തിലുള്ള കവറിലായിരുന്നു വെച്ചിരുന്നത്. എന്നാല് പഴയ സ്റ്റോക്കായ വെള്ള നിറത്തിലുള്ള കവറിലെ ഓയിന്മെന്റാണ് ഫാര്മസിസ്റ്റ് നല്കിയത്. അന്വേഷണത്തിന്റെ പ്രാഥമിക റിപ്പോര്ട്ട് ഡെപ്യൂട്ടി ഡിഎംഒ സമര്പ്പിച്ചിട്ടുണ്ട്. സംഭവത്തില് ഫാര്മസിസ്റ്റിനെതിരെ നടപടി ഉണ്ടാകും.
കഴുത്തിലെ അലര്ജിക്ക് ഇടുക്കി മെഡിക്കല് കോളേജില് ചികിത്സ തേടി എത്തിയ ഇടുക്കി ഭൂമിയാങ്കുളം സ്വദേശി സോബിന് സണ്ണിയുടെ കുഞ്ഞിനാണ് കലാവധി കഴിഞ്ഞ മരുന്ന് നല്കിയത്. കുഞ്ഞിന് നല്കുന്നതിന് മുമ്പ് കാലാവധി പരിശോധിച്ചതിനാല് അപകടം ഒഴിവായി എന്നാണ് കുടുംബം പറയുന്നത്.
2024 ജൂണില് നിര്മ്മിച്ച് രണ്ട് വര്ഷം കാലാവധിയുണ്ടായിരുന്ന ഓയിൻമെന്റാണ് നല്കിയത്. സംഭവത്തില് കുടുംബം ആശുപത്രി സൂപ്രണ്ടിന് പരാതി നല്കിയിരുന്നു. പരാതിയില് ആശുപത്രി സൂപ്രണ്ട് ഫാര്മസി ജീവനക്കാരോട് റിപ്പോര്ട്ട് സമർപ്പിക്കൻ നിർദേശിച്ചിരുന്നു.
ഡോക്ടര് എഴുതി നല്കിയ കുറിപ്പടിയുമായി ഫാര്മസിയില് എത്തിയപ്പോഴാണ് സോബിന് അവിടെ നിന്ന് മരുന്ന് നല്കുന്നത്. പിന്നാലെ വീട്ടില് എത്തി കാലാവധി പരിശോധിച്ചപ്പോഴാണ് കാലാവധി കഴിഞ്ഞ് മൂന്ന് മാസം പഴക്കമായ മരുന്നാണ് നല്കിയതെന്നറിയുന്നത്.
Editorial
അങ്ങേയറ്റത്തെ ലാഭക്കൊതി മാത്രമുള്ള മരുന്നുകമ്പനികളുടെ ക്രൂരതയ്ക്കു കടിഞ്ഞാണിടാൻ കോടതികൾതന്നെ വേണ്ടിവരുന്നു എന്നത് ജനാധിപത്യത്തിന്റെ ദയനീയമുഖമാണു വെളിപ്പെടുത്തുന്നത്. സാധാരണക്കാരന് താങ്ങാനാകാത്തവിധം രാജ്യത്ത് അവശ്യമരുന്നുകളുടെ വില വർധിക്കുന്നതിൽ കഴിഞ്ഞദിവസം സുപ്രീംകോടതിയും ഇന്നലെ കേരള ഹൈക്കോടതിയും നടത്തിയ ഇടപെടലുകൾ ആശ്വാസമായി. എങ്കിലും, രാജ്യത്തെ ആരോഗ്യമേഖലയുടെ വലിയ പ്രതിസന്ധിയിലേക്കാണ് ഇതു വിരൽചൂണ്ടുന്നത്.
ലാഭം മാത്രം ലക്ഷ്യമിട്ടു മരുന്നുകമ്പനികൾ വരുത്തുന്ന നിരക്കുവർധന സാർവത്രിക ആരോഗ്യപരിരക്ഷ എന്ന സങ്കൽപത്തെത്തന്നെ തകിടംമറിക്കുന്നുവെന്നാണ് സുപ്രീംകോടതി നിരീക്ഷിച്ചത്. വിപണിയിലുള്ള ഏകദേശം 82 ശതമാനം മരുന്നുകൾക്കും നിലവിൽ സർക്കാർ തലത്തിൽ വിലനിയന്ത്രണമില്ലെന്നു ചൂണ്ടിക്കാട്ടിയതും സുപ്രീംകോടതി തന്നെ. ഇതിനു പിന്നാലെ, വിലനിയന്ത്രണ പട്ടികയിൽ ഉൾപ്പെടാത്ത മരുന്നുകളുടെ അനിയന്ത്രിതമായ വിലവർധനയിൽ കേന്ദ്രസർക്കാർ അടിയന്തരമായി ഇടപെടണമെന്ന് കേരള ഹൈക്കോടതി ഇന്നലെ ഉത്തരവിട്ടു.
ജനങ്ങളുടെ ജീവിക്കാനുള്ള അവകാശത്തെ സംരക്ഷിക്കാൻ ജുഡീഷ്യറിക്ക് ശക്തമായി നിരന്തരം ഇടപെടേണ്ടിവരുന്നു എന്നത് ഭരണകൂടങ്ങളുടെ നിഷ്ക്രിയത്വത്തെയാണു കാണിക്കുന്നത്. ഒപ്പം, വൻകിട മരുന്നുകമ്പനികളുടെയും സർക്കാരിന്റെയും അവിശുദ്ധ കൂട്ടുകെട്ടും മറനീക്കുന്നു. പേറ്റന്റുള്ള ജീവൻരക്ഷാ മരുന്നുകൾക്ക് കമ്പനികൾ അമിതവില ഈടാക്കുകയാണെങ്കിൽ കേന്ദ്രസർക്കാരിന് അതിൽ ഇടപെടാമെന്നും, പേറ്റന്റ് നിയമത്തിലെ 100-ാം വകുപ്പ് ഉപയോഗിച്ച് ഈ മരുന്നുകൾ ഉത്പാദിപ്പിച്ച് കുറഞ്ഞവിലയ്ക്ക് സാധാരണക്കാർക്ക് ലഭ്യമാക്കാമെന്നുമാണ് കേരള ഹൈക്കോടതിയുടെ ചരിത്രവിധി. ജസ്റ്റീസ് ഹരിശങ്കർ വി. മേനോനാണ് വിധി പ്രസ്താവിച്ചത്.
അമിതവിലയുള്ള പേറ്റന്റ് മരുന്നുകൾ വാണിജ്യപരമായല്ലാതെ കേന്ദ്രസർക്കാരിന് നേരിട്ടു നിർമിച്ച് പാവപ്പെട്ട രോഗികൾക്ക് വിതരണം ചെയ്യാം. നിലവിൽ വിപണിയിലുള്ള മരുന്നുകൾ സാധാരണക്കാർക്ക് താങ്ങാൻ കഴിയുന്നതാണോ എന്നു പരിശോധിക്കാനും കേന്ദ്രസർക്കാരിനോട് കോടതി ആവശ്യപ്പെട്ടു. ഇതിനായി രോഗബാധിതരുടെ എണ്ണം, മരുന്ന് ഉപയോഗിക്കുന്നവർ, വിലക്കൂടുതൽ മൂലം മരുന്നു വാങ്ങാൻ കഴിയാത്തവർ തുടങ്ങിയ കൃത്യമായ വിവരങ്ങൾ ശേഖരിച്ചു വേണം തീരുമാനമെടുക്കാൻ.
ഭരണഘടന ഉറപ്പുനൽകുന്ന ജീവിക്കാനുള്ള അവകാശത്തിന്റെ ഭാഗമാണ് ആരോഗ്യസംരക്ഷണമെന്നും, ജീവൻരക്ഷാ മരുന്നുകൾ രോഗികൾക്ക് ലഭ്യമാക്കാൻ സർക്കാർ ബാധ്യസ്ഥരാണെന്നും കോടതി ഓർമിപ്പിച്ചു.സ്തനാർബുദത്തിനുള്ള ‘റിബോസിക്ലിബ്’’(Ribociclib) എന്ന മരുന്നിന് പ്രതിമാസം 75,000 രൂപയോളം ചെലവു വരുന്നതു ചൂണ്ടിക്കാട്ടി ഒരു അർബുദരോഗി നൽകിയ ഹർജിയാണ് കോടതി പരിഗണിച്ചത്. ഹർജിക്കാരി പിന്നീട് മരിച്ചെങ്കിലും, പൊതുതാത്പര്യം മുൻനിർത്തി അമിക്കസ്ക്യൂറിയെ ചുമതലപ്പെടുത്തി ഹൈക്കോടതി ഈ കേസ് സ്വമേധയാ തുടർന്നുകൊണ്ടു പോകുകയായിരുന്നു.
കേരള ഹൈക്കോടതിയിൽ ഈ ഹർജി 57 തവണ ലിസ്റ്റ് ചെയ്യപ്പെട്ടിട്ടും അന്തിമതീരുമാനത്തിൽ എത്താൻ സാധിക്കാത്തതിനെ സുപ്രീംകോടതി കടുത്ത ഭാഷയിലാണ് വിമർശിച്ചത്. ഈ ഹർജിയിൽ എത്രയും വേഗം വാദം പൂർത്തിയാക്കി അന്തിമവിധി പ്രസ്താവിക്കാൻ കേരള ഹൈക്കോടതിക്ക് കർശന നിർദേശവും നൽകി. ഇതിന്റെ തുടർച്ചയായിട്ടാണ് കേരള ഹൈക്കോടതി വിശദമായ വാദം കേട്ട് ഇന്നലെ വിധിപറഞ്ഞത്.
മറ്റൊരു കേസ് പരിഗണിക്കവെ, 2700 രൂപ വിലയുള്ള കാൻസർ മരുന്ന് 27,000 രൂപയ്ക്ക് വിൽക്കുന്നതു കണ്ട് കോടതി അമ്പരന്നു. ഇതെന്തൊരു പകൽക്കൊള്ളയെന്ന് കോടതിക്കു ചോദിക്കേണ്ടി വന്നു. ഇതെല്ലാം ചൂണ്ടിക്കാട്ടുന്നത് സർക്കാരുകളുടെ മാപ്പില്ലാത്ത അലംഭാവമാണ്. ജീവൻരക്ഷാ മരുന്നുകളുടെ ഉത്പാദനച്ചെലവും വിപണിവിലയും തമ്മിലുള്ള ഭീമമായ അന്തരം, അസംസ്കൃത വസ്തുക്കളുടെ ഇറക്കുമതിച്ചെലവിലെ വർധന, പാരന്റ് കമ്പനികളുടെ പേറ്റന്റ് കുത്തക, നാഷണൽ ഫാർമസ്യൂട്ടിക്കൽ പ്രൈസിംഗ് അഥോറിറ്റിയുടെ (എൻപിപിഎ) അനാസ്ഥ എന്നിവയാണ് മരുന്നുകളുടെ വിലക്കയറ്റത്തിന് പ്രധാന കാരണം.
കൃത്യമായ വിലനിയന്ത്രണ പരിധിയിൽ വരാത്ത അനുബന്ധ മരുന്നുകൾക്ക് കമ്പനികൾ തോന്നുംപടി വില ഈടാക്കുകയാണ്. മരുന്നുനിർമാണത്തിന് ആവശ്യമായ പ്ലാറ്റിനം അസംസ്കൃത വസ്തുക്കളുടെ ഇറക്കുമതിച്ചെലവിലും ആഗോളവിപണിയിലെ ഉത്പാദനച്ചെലവിലും വൻ വർധനയുണ്ടായെന്ന കാരണം പറഞ്ഞാണ് അത്യാവശ്യ അർബുദ ചികിത്സയ്ക്ക് ഉപയോഗിക്കുന്ന പ്രധാന മരുന്നുകളുടെ പരമാവധി വിൽപ്പനവിലയിൽ 50 ശതമാനംവരെ വർധന വരുത്താൻ കേന്ദ്രസർക്കാർ ജൂണിൽ അനുമതി നൽകിയത്.
മരുന്നുകമ്പനികളുടെ കാര്യം വരുമ്പോൾ കാണിക്കുന്ന ശുഷ്കാന്തി സാധാരണ ജനങ്ങളുടെ കാര്യത്തിൽ കാണാനില്ല. മരുന്നുകൾ വിലക്കുറവിൽ ലഭിക്കാൻ കാരുണ്യ, ജൻ ഔഷധി കേന്ദ്രങ്ങളെ ആശ്രയിക്കുന്നവരാണ് വലിയൊരു വിഭാഗം ജനങ്ങൾ. ഇവിടെ ഗുണമേന്മയുള്ള, അവശ്യമരുന്നുകളുടെ ലഭ്യത ഉറപ്പുവരുത്തേണ്ട സർക്കാർ ഉറങ്ങുകയാണ്.
കൂടുതൽ മരുന്നുകളെ അവശ്യമരുന്നുകളുടെ പട്ടികയിൽ ഉൾപ്പെടുത്തുകയും, ന്യായവില ഉറപ്പാക്കാൻ കേന്ദ്ര-സംസ്ഥാന സർക്കാരുകൾ ഉടനടി നിയമനിർമാണം നടത്തുകയും വേണം. മരുന്നുകമ്പനികളുടെ അമിതലാഭത്തേക്കാൾ പ്രധാനം ജനങ്ങളുടെ ജീവനാണെന്നു തിരിച്ചറിഞ്ഞ് ഭരണകൂടങ്ങൾ അടിയന്തര നടപടികൾ സ്വീകരിക്കേണ്ട സമയം അതിക്രമിച്ചിരിക്കുന്നു.
National
ഗാന്ധിനഗർ: ഗുജറാത്തിലെ സൂറത്തില് വാക്സിനേഷനു ശേഷം പാരസെറ്റാമോളിന് പകരം പ്രമേഹത്തിനുള്ള മരുന്ന് മാറി നല്കിയതിനെത്തുടര്ന്ന് അഞ്ച് കുട്ടികളെ ആശുപത്രിയില് പ്രവേശിപ്പിച്ചു. സംഭവത്തില് ആരോഗ്യവകുപ്പ് വനിതാ ആരോഗ്യ പ്രവര്ത്തകയെ സസ്പെന്ഡ് ചെയ്യുകയും വകുപ്പുതല അന്വേഷണത്തിന് ഉത്തരവിടുകയും ചെയ്തു.
പൽസാന താലൂക്കിലെ കനാവ് പ്രൈമറി ഹെൽത്ത് സെന്ററിന് കീഴിലുള്ള പൽസാന-01 ഉപകേന്ദ്രത്തിൽ മമത ദിവസ് പ്രതിരോധ കുത്തിവയ്പ്പ് പരിപാടിക്കിടെയാണ് ഗുരുതരമായ വീഴ്ച സംഭവിച്ചത്. കാമ്പില് ഏഴ് കുട്ടികളാണ് വാക്സിനേഷൻ എടുത്തത്.
പ്രതിരോധ കുത്തിവയ്പ്പിന് ശേഷം കുട്ടികളിലുണ്ടാകുന്ന പനിയും അസ്വസ്ഥതകളും നിയന്ത്രിക്കാനായി സാധാരണയായി നല്കാറുള്ള പാരസെറ്റാമോൾ കിഡ് ടാബ്ലെറ്റുകൾക്ക് പകരം പ്രമേഹരോഗികൾക്ക് നല്കുന്ന രണ്ട് മില്ലിഗ്രാമിന്റെ ഗ്ലിമെപിറൈഡാണ് അഞ്ച് കുട്ടികൾക്ക് മാറി നൽകിയതെന്ന് ആരോഗ്യ വകുപ്പ് ഉദ്യോഗസ്ഥർ വ്യക്തമാക്കി. മരുന്ന് മാറിയതിനെ തുടര്ന്ന് അസ്വസ്ഥത അനുഭവപ്പെട്ട കുട്ടികളെ ഉടൻ തന്നെ ആശുപത്രിയില് പ്രവേശിപ്പിക്കുകയായിരുന്നു.
കുട്ടികളുടെ ആരോഗ്യനില മോശമായതോടെ അഞ്ച് പേരെയും ആശുപത്രിയിൽ അത്യാഹിത വിഭാഗങ്ങളിൽ പ്രവേശിപ്പിച്ചു. സംഭവത്തിൽ വകുപ്പുതല നടപടികൾ പുരോഗമിക്കുകയാണെന്നും സർക്കാർ നിയമങ്ങൾക്കനുസൃതമായി തീരുമാനം എടുക്കുമെന്നും ആരോഗ്യവകുപ്പ് അധികൃതർ അറിയിച്ചു.
Kerala
തിരുവനന്തപുരം: മരുന്നുവാങ്ങൽ നടപടികളുടെ ഭാഗമായുള്ള ടെൻഡറിൽനിന്ന് ഇടനിലക്കാരെ ഒഴിവാക്കുമെന്ന് മന്ത്രി കെ. മുരളീധരൻ. ഇനിമുതൽ ടെൻഡറിൽ മരുന്ന് കന്പനികൾ നേരിട്ടു പങ്കെടുക്കുന്നതിനുള്ള നടപടികൾ സ്വീകരിക്കും.
ഇറക്കുമതി മരുന്നുകളാണെങ്കിൽ നേരിട്ടുള്ള ഏജൻസികൾക്കും ടെൻഡറിൽ പങ്കെടുക്കാം. അടുത്ത വർഷത്തേക്കുള്ള പർച്ചേസ് നടപടികൾ അടുത്തമാസം ആരംഭിക്കും. കേരള മെഡിക്കൽ സർവീസസ് കോർപറേഷൻ (കെഎംഎസ്സിഎൽ) മുഖേനയുള്ള ആരോഗ്യവകുപ്പിന്റെ മരുന്നുസംഭരണ നടപടികൾ സുതാര്യമാക്കാനും ജനങ്ങൾക്ക് നിലവാരമുള്ള ബ്രാൻഡഡ് മരുന്നുകൾ ലഭ്യമാക്കാനുമാണു നടപടിയെന്നു മന്ത്രി വ്യക്തമാക്കി.
കുറഞ്ഞതു രണ്ടു സംസ്ഥാനങ്ങളിലെങ്കിലും സർക്കാർ മേഖലയിൽ വിതരണം ചെയ്യുന്ന മരുന്നുകൾ മാത്രമേ കേരളത്തിനും ലഭ്യമാക്കാവൂ. ഈ വർഷം ഫെബ്രുവരിയിൽ പർച്ചേസ് ഓർഡർ നൽകിയ കന്പനികൾ പലതും കെഎംഎസ്സിഎല്ലിനു മാത്രമായി പ്രത്യേകം മരുന്ന് നിർമിച്ചുനൽകുന്നവയാണെന്ന് കണ്ടെത്തിയിരുന്നു.
സംസ്ഥാനത്ത് ഏറ്റവും വിലകുറച്ച് ബ്രാൻഡഡ് മരുന്ന് ലഭ്യമാക്കുന്ന തിരുവനന്തപുരം മെഡിക്കൽ കോളജ് ആശുപത്രിയിലെ ഇൻഹൗസ് ഡ്രഗ് ബാങ്ക് പർച്ചേസ് ചെയ്യുന്നതിനേക്കാൾ കുറഞ്ഞ വിലയിലായിരിക്കണം കെഎംഎസ്സിഎൽ മരുന്ന് സംഭരിക്കേണ്ടത്.
ഓരോ വർഷവും മരുന്നുകൾ വാങ്ങുന്ന വില വെബ്സൈറ്റിൽ പ്രസിദ്ധീകരിക്കണം. ഇടനിലക്കാരെ കെഎംഎസ്സിഎല്ലിൽ പ്രവേശിപ്പിക്കുകയോ ഇവരിൽനിന്നു പാരിതോഷികം വാങ്ങുകയോ ചെയ്യരുത്.
കെഎംഎസ്സിഎല്ലിനു വിതരണം ചെയ്യുന്ന മരുന്നിന്റെ ഏതെങ്കിലും ബാച്ച് നിലവാരമില്ലെന്നു കണ്ടെത്തിയാൽ ആ കന്പനിയെ സ്ഥിരമായി കരിന്പട്ടികയിൽ ഉൾപ്പെടുത്തും. വളരെ ഉയർന്നനിരക്കിലാണ് കെഎംഎസ്സിഎൽ നിലവിൽ മരുന്ന് സംഭരിച്ചുകൊണ്ടിരിക്കുന്നതെന്നും മന്ത്രി പറഞ്ഞു.
National
കാൺപൂർ: സർക്കാർ ആശുപത്രിയിലെ ഒപിഡിയിൽ ഡോക്ടറുടെ കസേരയിലിരുന്ന് രോഗികളെ പരിശോധിക്കുകയും മരുന്നുകൾ കുറിച്ചു നൽകുകയും ചെയ്ത ഡ്രൈവറുടെ വീഡിയോ വൈറലായതോടെ സംഭവം വലിയ വിവാദമാകുന്നു. കാൺപൂരിലെ കാൻഷിറാം ആശുപത്രിയിലാണ് ഞെട്ടിക്കുന്ന ഈ സംഭവം നടന്നത്.
ആശുപത്രിയിലെ എമർജൻസി മെഡിക്കൽ ഓഫീസറായ ഡോ. രാംകേഷ് കോടതി ആവശ്യത്തിനായി പുറത്തുപോയ സമയത്താണ് അദ്ദേഹത്തിന്റെ സ്വകാര്യ ഡ്രൈവറായ ദേവ് രോഗികളെ പരിശോധിച്ചത്. രോഗികളെ ഓരോരുത്തരായി വിളിച്ച് പരിശോധിച്ച് പ്രിസ്ക്രിപ്ഷൻ എഴുതി നൽകുന്ന ഡ്രൈവറുടെ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിച്ചതോടെ ആശുപത്രി അധികൃതർ അന്വേഷണത്തിന് ഉത്തരവിട്ടു. മൂന്നംഗ അന്വേഷണ കമ്മീഷനെ ഇതിനായി നിയോഗിച്ചിട്ടുണ്ട്.
വ്യാജമായി വൈദ്യപരിശോധന നടത്തിയ ഡ്രൈവർക്കെതിരെ ആശുപത്രി ഭരണകൂടം പൊലിസിൽ പരാതി നൽകി. മുൻപും ഇയാൾ രോഗികളെ പരിശോധിച്ചിട്ടുണ്ടോ എന്ന് അന്വേഷിച്ചുവരികയാണ്. എൻഎംസി നിയമപ്രകാരം രജിസ്റ്റർ ചെയ്ത ഡോക്ടർമാർക്ക് മാത്രമേ രോഗികളെ പരിശോധിക്കാനും പ്രിസ്ക്രിപ്ഷൻ എഴുതാനും അധികാരമുള്ളൂ. ഒരു സർക്കാർ ആശുപത്രിയിൽ ഇത്തരമൊരു ഗുരുതര വീഴ്ച സംഭവിച്ചത് വലിയ പ്രതിഷേധത്തിന് കാരണമായിട്ടുണ്ട്.
National
ന്യൂഡൽഹി: ഹോമിയോ മരുന്നായ അർസെനികം ആൽബം കേരളത്തിൽ വിതരണം ചെയ്യുന്നതു ചോദ്യംചെയ്തുകൊണ്ടുള്ള ഹർജി സുപ്രീംകോടതി പരിഗണിച്ചില്ല.
കോവിഡ് 19 മഹാമാരി കാലത്ത് ശാസ്ത്രീയ പരീക്ഷണങ്ങളോ ട്രയലുകളോ ഇല്ലാതെയാണ് ഈ മരുന്ന് പ്രതിരോധശേഷി വർധിപ്പിക്കുന്നതായി പ്രചരിപ്പിച്ച് വിതരണം ചെയ്തെന്ന് ആരോപിച്ചായിരുന്നു ഹർജി.
NRI
വിന്നിപെഗ്: കാനഡയിലെ മാനിറ്റോബ പ്രവിശ്യയിൽ വർക്ക് പെർമിറ്റ് കാലാവധി കഴിഞ്ഞതോ ഉടൻ അവസാനിക്കാനിരിക്കുന്നതോ ആയ ചില വിദേശ തൊഴിലാളികൾക്ക് വലിയ ആശ്വാസമായി പുതിയ തൊഴിൽ അനുമതി പദ്ധതി പ്രഖ്യാപിച്ചു.
അർഹരായ തൊഴിലാളികൾക്ക് രണ്ടുവർഷത്തേക്ക് മാനിറ്റോബ - നിർദ്ദിഷ്ട വർക്ക് പെർമിറ്റ് നീട്ടാൻ അവസരം ലഭിക്കും. ഇതിലൂടെ സ്ഥിരതാമസ (PR) നടപടികൾ പൂർത്തിയാകുന്നതുവരെ അവർക്ക് ജോലി തുടരാനാകും.
മാനിറ്റോബ പ്രൊവിൻഷ്യൽ നോമിനി പ്രോഗ്രാം (MPNP) വഴി സ്ഥിരതാമസത്തിനായി ശ്രമിക്കുന്നവരാണ് ഈ ഇളവിന്റെ പ്രധാന ഗുണഭോക്താക്കൾ.
തൊഴിൽ ക്ഷാമം നേരിടുന്ന മേഖലകളിലെ പരിചയസമ്പന്നരായ തൊഴിലാളികളെ പ്രവിശ്യയിൽ നിലനിർത്തുകയും തൊഴിലുടമകൾക്ക് ആവശ്യമായ തൊഴിൽശക്തി ഉറപ്പാക്കുകയും ചെയ്യുക എന്നതാണ് സർക്കാരിന്റെ ലക്ഷ്യം.
അർഹതയുള്ളവർക്ക് മാനിറ്റോബ സർക്കാരിൽ നിന്ന് Support Letter ലഭിച്ച ശേഷം പുതിയ വർക്ക് പെർമിറ്റിനായി അപേക്ഷിക്കാം. എന്നാൽ ഈ ഇളവ് എല്ലാവർക്കും ബാധകമല്ല. നിശ്ചിത മാനദണ്ഡങ്ങൾ പാലിക്കുന്നതും MPNP നടപടികളിലുള്ളതുമായ തൊഴിലാളികൾക്കാണ് ഈ അവസരം ലഭിക്കുക.
കുടിയേറ്റ നിയമങ്ങളിലെ മാറ്റങ്ങൾ കാരണം ജോലി നഷ്ടപ്പെടുമെന്ന ആശങ്കയിലായിരുന്ന ആയിരക്കണക്കിന് താത്കാലിക വിദേശ തൊഴിലാളികൾക്ക് ഈ തീരുമാനം വലിയ ആശ്വാസമായാണ് വിലയിരുത്തപ്പെടുന്നത്.
ഇതിനൊപ്പം, സ്ഥിരതാമസത്തിനായുള്ള അപേക്ഷകൾ വേഗത്തിൽ പരിഗണിക്കാനുള്ള നടപടികളും മാനിറ്റോബ സർക്കാർ തുടരുകയാണ്.
Business
തൃശൂർ: മെഡിസിൻ മുതൽ മാനേജ്മെന്റ് വരെ ലോകോത്തര വിദേശ സർവകലാശാലകളിൽ പഠനാവസരമൊരുക്കി ബ്രൈറ്റ് എഡ്യുക്കേഷണൽ കണ്സൾട്ടൻസി. വിദേശത്ത് ഉന്നതവിദ്യാഭ്യാസം നേടാൻ ആഗ്രഹിക്കുന്നവർക്കായി വിദേശ സർവകലാശാലകളിൽ അഡ്മിഷൻ സേവനങ്ങളുമായി ശ്രദ്ധേയമാകുകയാണ് ബ്രൈറ്റ്.
വിദ്യാർഥികളുടെ അക്കാദമിക് യോഗ്യത, താത്പര്യം, കരിയർലക്ഷ്യം, സാന്പത്തികസാഹചര്യം എന്നിവ വിലയിരുത്തി ഏറ്റവും അനുയോജ്യമായ രാജ്യം, സർവകലാശാല, സൗജന്യവിദ്യാഭ്യാസം, സ്കോളർഷിപ്, കോഴ്സ് എന്നിവ തെരഞ്ഞെടുക്കുന്നതിനുള്ള വ്യക്തിഗത കൗണ്സലിംഗ് മുതൽ അഡ്മിഷൻ, വീസ, ഡോക്യുമെന്റേഷൻ, സ്കോളർഷിപ് മാർഗനിർദേശം, വിദ്യാഭ്യാസവായ്പാസഹായം, യാത്രാ-താമസസഹായം തുടങ്ങി എല്ലാ സേവനങ്ങളും ലഭിക്കും.
10-ാം ക്ലാസ് മുതൽ പിജി കഴിഞ്ഞവർക്കു വരെയുള്ള വിവിധ കോഴ്സുകളിലേക്കു യൂറോപ്പ്, ഏഷ്യ, ഓഷ്യാനിയ എന്നിവിടങ്ങളിലെ അംഗീകൃത സർവകലാശാലകളിൽ പഠനാവസരങ്ങൾ ലഭ്യമാണ്.
എംബിബിഎസ് (വാർഷിക ഫീസ് 1.5 ലക്ഷം രൂപ മുതൽ), വെറ്ററിനറി സയൻസ് (വാർഷിക ഫീസ് 1.40 ലക്ഷം മുതൽ), നഴ്സിംഗ് ആൻഡ് അലൈഡ് ഹെൽത്ത് സയൻസസ്, മാനേജ്മെന്റ് കോഴ്സുകൾ, എൻജിനിയറിംഗ്, കംപ്യൂട്ടർ സയൻസ്, ഐടി-ആർട്ടിഫിഷൽ ഇന്റലിജൻസ്, ഡാറ്റ സയൻസ്, സൈബർ സെക്യൂരിറ്റി, ലോ, ബിസിനസ് & കൊമേഴ്സ്, ഹോസ്പിറ്റാലിറ്റി, ഏവിയേഷൻ തുടങ്ങിയ വിവിധ കോഴ്സുകളിൽ അവസരം.
ബ്രൈറ്റിന് തൃശൂർ, എറണാകുളം, കോഴിക്കോട് എന്നിവിടങ്ങളിൽ ബ്രാഞ്ചുകളുണ്ട്. കൂടുതൽ വിവരങ്ങൾക്കും സൗജന്യ കൗണ്സലിംഗിനുമായി ബ്രൈറ്റ് എഡ്യുക്കേഷണൽ കണ്സൾട്ടൻസി വെബ്സൈറ്റ് സന്ദർശിക്കാം. ഫോണ്: 9995909999, 9961814999.
Kerala
കൊച്ചി: ആറു മാസം പ്രായമുള്ള കുഞ്ഞിന് പ്രതിരോധ കുത്തിവയ്പിനു പിന്നാലെ പാരസെറ്റമോള് മരുന്ന് ഓവര്ഡോസ് നല്കിയെന്ന പരാതിയില് ഡോക്ടറെ അറസ്റ്റ് ചെയ്യാത്തതില് പ്രതിഷേധവുമായി ബന്ധുക്കള്. ആലുവ ജില്ലാ ആശുപത്രിയിലെ ഡോക്ടര്ക്കെതിരെ കേസ് എടുത്തെങ്കിലും മറ്റ് നടപടികള് ഒന്നും ഉണ്ടായിട്ടില്ല എന്നാണ് ആരോപണം.
ഒരാഴ്ച മുമ്പാണ് കുഞ്ഞിന് പ്രതിരോധ കുത്തിവയ്പ്പ് എടുത്തത്. ഡോക്ടര് നല്കിയ മരുന്ന് കഴിച്ചതിന് പിന്നാലെ കുട്ടിയുടെ ആരോഗ്യനില വഷളാവുകയും സ്വകാര്യ ആശുപത്രിയില് ചികിത്സ തേടുകയുമായിരുന്നു. കുത്തിവയ്പിന് ശേഷം ഡോക്ടര് നിര്ദേശിച്ച മരുന്നിന്റെ അളവ് കൂടിയതാണ് ഗുരുതര ആരോഗ്യപ്രശ്നങ്ങളുണ്ടാവാന് കാരണമായത്.
Kerala
ആലുവ: പ്രതിരോധ കുത്തിവയ്പിനു പിന്നാലെ ആറുമാസം പ്രായമുള്ള കുഞ്ഞിന് പാരസെറ്റാമോൾ മരുന്ന് ഓവർഡോസ് നൽകിയെന്ന പരാതിയിൽ ആലുവ ജില്ലാ ആശുപത്രിയിലെ ഡോക്ടർക്കെതിരേ ആലുവ ടൗൺ പോലീസ് കേസെടുത്തു.
മരുന്ന് കഴിച്ചതിനുപിന്നാലെ ആരോഗ്യനില വഷളായ കുട്ടിയെ സ്വകാര്യ ആശുപത്രിയിലേക്കു മാറ്റി രക്ഷപ്പെടുത്തിയെന്നാണ് മാതാപിതാക്കളുടെ പരാതി.
ഒരാഴ്ച മുന്പാണ് മാതാപിതാക്കൾ കുഞ്ഞിന് പ്രതിരോധ കുത്തിവയ്പ് എടുക്കുന്നതിനായി ആലുവ ജില്ലാ ആശുപത്രിയിൽ എത്തിയത്. കുത്തിവയ്പിനുശേഷം ഡോക്ടർ നിർദേശിച്ച പാരസെറ്റാമോൾ മരുന്നിന്റെ അളവ് കൂടിയതാണ് കുഞ്ഞിനു പെട്ടെന്ന് ഗുരുതരമായ ആരോഗ്യപ്രശ്നങ്ങൾ ഉണ്ടാകാൻ കാരണമാണെന്നാണ് ആരോപണം.
സംഭവത്തിൽ കൂടുതൽ അന്വേഷണം പുരോഗമിക്കുകയാണെന്ന് ആലുവ പോലീസ് അറിയിച്ചു.
Kerala
കോഴിക്കോട്: പെട്ടെന്ന് മരുന്നടിച്ചു മയങ്ങാമെന്നു കരുതി ഇനി മെഡിക്കല് സ്റ്റോറുകളിലേക്ക് പായേണ്ട. ഉയര്ന്ന അളവില് ഈഥൈല് ആല്ക്കഹോള് അടങ്ങിയ, ദഹന സംബന്ധമായ പ്രശ്നങ്ങള്ക്കും വായുകോപത്തിനുമുള്ള കഫ് സിറപ്പുകള് ലഭിക്കണമെങ്കില് അംഗീകൃത ഡോക്ടറുടെ കുറിപ്പടി വേണം. വില്പന രേഖകള് ഫാര്മസികള് സൂക്ഷിക്കുകയും വേണം.
ലഹരി അടങ്ങിയ മരുന്നുകളുടെ ദുരുപയോഗം വര്ധിച്ചുവരുന്നുവെന്ന സംസ്ഥാനങ്ങളുടെ മുന്നിയിപ്പിനെ തുടര്ന്നാണ് മരുന്നു നിര്മാണം, വില്പന എന്നിവയുമായി ബന്ധപ്പെട്ട നിയന്ത്രണങ്ങള് കേന്ദ്ര ആരോഗ്യ-കുടുംബക്ഷേമ മന്ത്രാലയം കടുപ്പിച്ചത്. ഈഥൈല് ആല്ക്കഹോള് അടങ്ങിയ ഔഷധങ്ങളുടെ ലൈസന്സിംഗ് നിബന്ധനകളില് നല്കിയിരുന്ന ഇളവ് പൂര്ണമായും എടുത്തുമാറ്റുകയും ചെയ്തു.
ഏലയ്ക്ക, ഇഞ്ചി എന്നിവയുടെ സത്തുകള് ഉള്പ്പെടുന്ന ചില ഔഷധങ്ങള്ക്കും മറ്റു സുഗന്ധദ്രവ്യ കൂട്ടുകള്ക്കും 1945ലെ ഡ്രഗ്സ് ചട്ടങ്ങളിലെ ഷെഡ്യൂള് കെ പ്രകാരം നേരത്തെ ലൈസന്സ് നേടുന്നതില് ഇളവ് അനുവദിച്ചിരുന്നു.
ഇത് മുതലെടുത്ത് ചില ഔഷധക്കൂട്ടുകളില് 80 മുതല് 90 ശതമാനം വരെ ഈഥൈല് ആല്ക്കഹോള് ചേര്ക്കുന്നതായി കണ്ടെത്തിയ സാഹചര്യത്തിലാണ് നടപടി. ഉദര സംബന്ധമായ പ്രശ്നങ്ങള്ക്കുള്ള സിറപ്പുകളും മറ്റു മരുന്നുകളും നിര്മിക്കുന്നതേറെയും ഇഞ്ചി, ഏലയ്ക്കാ സത്തുകള് ഉപയോഗിച്ചാണ്.
12 ശതമാനത്തില് കൂടുതല് ഈഥൈല് ആല്ക്കഹോള് അടങ്ങിയതും 30 മില്ലി ലിറ്ററില് കൂടുതല് അളവിലുള്ളതുമായ എല്ലാ ഔഷധക്കൂട്ടുകള്ക്കും ഇനി മുതല് ഇളവുകള് ലഭിക്കില്ല. ഇത്തരം ഉത്പന്നങ്ങളുടെ നിര്മാണത്തിനും വിപണനത്തിനും 1940ലെ ഡ്രഗ്സ് ആന്ഡ് കോസ്മെറ്റിക്സ് ആക്ട് പ്രകാരമുള്ള ലൈസന്സുകള് നിര്ബന്ധമായും നേടിയിരിക്കണം.
ഈ ഭേദഗതിയോടെ ഇത്തരം ഉത്പന്നങ്ങളെ 1945ലെ ഡ്രഗ്സ് ചട്ടങ്ങളുടെ ഷെഡ്യൂള് എച്ച് വണ്ണിലേക്ക് മാറ്റി. സസ്യങ്ങളില് നിന്നുള്ള സത്തുക്കള് കേടുകൂടാതെ വേര്തിരിച്ചെടുക്കാനും അവ ദീര്ഘകാലം കേടുകൂടാതെ സൂക്ഷിക്കാനുമാണ് ഔഷധ നിര്മാണത്തില് ഈഥൈല് ആല്ക്കഹോള് ഉപയോഗിക്കുന്നത്.
District News
വായാട്ടുപറമ്പ്: ചപ്പാരപ്പടവ് പഞ്ചായത്ത് ആയുഷ് ഹോമിയോ പ്രൈമറി ഹെൽത്ത് സെന്റർ, തടിക്കടവ് കർഷക സ്നേഹ ജനശ്രീ യൂണിറ്റ് ബാലപുരം എന്നിവയുടെ സംയുക്താഭിമുഖ്യത്തിൽ സൗജന്യ ഹോമിയോ മെഡിക്കൽ ക്യാമ്പും പകർച്ചപ്പനി പ്രതിരോധ മരുന്ന് വിതരണവും നടത്തി.
പഞ്ചായത്തംഗം ജോസ് വെട്ടുകല്ലാംകുഴിയിൽ ഉദ്ഘാടനം ചെയ്തു. ജോഷി പൂങ്കുടിയിൽ അധ്യക്ഷത വഹിച്ചു. തങ്കമ്മ സണ്ണി, ഷെർലി ചാക്കോ, സജി നിരപ്പേൽ, കുര്യൻ വലിയപറമ്പിൽ എന്നിവർ പ്രസംഗിച്ചു. ഡോ. സി.കെ. മേഘ, ഡോ. ജാസ്മിൻ എന്നിവർ നേതൃത്വം നൽകി.
Leader Page
അന്തസോടെ ജീവിക്കാനുള്ള അവകാശം ഉറപ്പുനൽകുന്ന ഇന്ത്യൻ ഭരണഘടനയുടെ ഇരുപത്തിയൊന്നാം അനുച്ഛേദത്തിന്റെ പരിധിയിൽ അന്തസോടെ മരിക്കാനുള്ള അവകാശവും ഉൾപ്പെടുന്നു എന്ന സുപ്രീംകോടതിയുടെ നിലപാട് വീണ്ടും ശക്തമായി ഉച്ചരിക്കുന്ന വിധിയാണ് ഹരീഷ് റാണ കേസിൽ വന്നത്. നിഷ്ക്രിയ ദയാവധവുമായി ബന്ധപ്പെട്ട മാർഗനിർദേശങ്ങൾ കോടതിതന്നെ മുമ്പ് നൽകിയിരുന്നെങ്കിലും അവ പ്രായോഗികമായി നടപ്പിലാക്കിയ ആദ്യ പ്രധാന വിധികളിലൊന്നായി ഇതിനെ കാണാം.
‘യൂത്തനേസ്യ’ (euthanasia) എന്ന ഇംഗ്ലീഷ് പദം സാധാരണയായി ‘ദയാവധം’ എന്നാണു മലയാളത്തിൽ ഭാഷാന്തരം ചെയ്ത് ഉപയോഗിക്കുന്നത്. ഗ്രീക്ക് ഭാഷയിലെ eu (നല്ലത്), thanatos (മരണം) എന്നീ വാക്കുകളിൽനിന്നാണ് ഇതിന്റെ ഉദ്ഭവം. എന്നാൽ, മനുഷ്യജീവിതത്തിന്റെ അവസാനഘട്ടവുമായി ബന്ധപ്പെട്ട ഈ വിഷയത്തിൽ നിയമപരവും നൈതികവുമായ വ്യത്യാസങ്ങൾ ഉള്ളതിനാൽ, ജീവൻ നേരിട്ട് അവസാനിപ്പിക്കുന്ന സജീവ ദയാവധവും (active euthanasia) ചികിത്സ പിൻവലിക്കുന്ന നിഷ്ക്രിയ ദയാവധവും (passive euthanasia) തമ്മിലുള്ള വ്യത്യാസം നിർണായകമാണ്. ഇന്ത്യൻ നിയമത്തിൽ അനുവദിച്ചിരിക്കുന്നത് രണ്ടാമത്തേതാണ്.
കോടതിയുടെ മുമ്പിലുണ്ടായിരുന്ന പ്രധാന ചോദ്യങ്ങൾ
ഹരീഷ് റാണയുടെ കേസിൽ സുപ്രീംകോടതിക്ക് പരിഗണിക്കേണ്ടിവന്നത് ചില നിർണായക നിയമചോദ്യങ്ങളായിരുന്നു. ക്ലിനിക്കൽ സഹായത്തോടെ നൽകുന്ന പോഷണവും ജലവും പിൻവലിക്കാവുന്ന വൈദ്യചികിത്സയായി പരിഗണിക്കാമോ എന്നതാണ് പ്രധാന ചോദ്യമായി ഉയർന്നത്. രോഗിയുടെ വയറ്റിലേക്ക് ശസ്ത്രക്രിയ വഴി സ്ഥാപിച്ചിരിക്കുന്ന പെർക്യൂട്ടേനിയസ് എൻഡോസ്കോപിക് ഗാസ്ട്രോസ്റ്റമി ട്യൂബ് വഴിയാണ് പോഷണം നൽകിയിരുന്നത്. അതുകൊണ്ട്, ഈ നടപടിയെ സാധാരണ പരിചരണമായി കണക്കാക്കണമോ, അതോ ഒരു വൈദ്യചികിത്സയായി കാണണമോ എന്ന് കോടതി പരിശോധിച്ചു.
രണ്ടാമതായി പരിഗണിച്ചത്, രോഗിക്ക് സ്വന്തം തീരുമാനം അറിയിക്കാനാവാത്ത സാഹചര്യത്തിൽ എന്താണ് ‘രോഗിയുടെ ഏറ്റവും നല്ല താത്പര്യം’ എന്നതായിരുന്നു. അതായത്, വെജിറ്റേറ്റീവ് അവസ്ഥയിൽ കഴിയുന്ന രോഗിക്ക് ചികിത്സ തുടരുന്നത് യഥാർഥത്തിൽ ഗുണകരമാണോ, അതോ രോഗിക്ക് ക്ലേശകരമാകുന്ന വിധത്തിൽ ജൈവജീവിതം നീട്ടിക്കൊണ്ടുപോകൽ മാത്രമാണോ അത് എന്നതായിരുന്നു തീരുമാനിക്കേണ്ടിയിരുന്നത്.
മൂന്നാമതായി, 2018ലെ ‘കോമൺ കോസ് വേഴ്സസ് യൂണിയൻ ഓഫ് ഇന്ത്യ’ വിധിയിൽ സുപ്രീംകോടതി രൂപപ്പെടുത്തിയ മാർഗനിർദേശങ്ങൾ പ്രായോഗികമായി എങ്ങനെ നടപ്പാക്കണം എന്നതും കോടതി പരിശോധിച്ചു. പ്രത്യേകിച്ച്, ഈ തത്വങ്ങളെ അടിസ്ഥാനമാക്കി വൈദ്യചികിത്സ പിൻവലിക്കണോ എന്നതും.
കോടതിയുടെ നിർണയം
സുപ്രീംകോടതിയുടെ 2018ലെ വിധിയുടെ അടിസ്ഥാനത്തിൽ നിഷ്ക്രിയ ദയാവധത്തിനായി 2024ൽ റാണയുടെ പിതാവ് ഡൽഹി ഹൈക്കോടതിയിൽ നൽകിയ അപേക്ഷ തള്ളുകയാണുണ്ടായത്. 2024 ഓഗസ്റ്റിൽ സുപ്രീംകോടതിയും സമാന നിലപാടാണ് സ്വീകരിച്ചത്. അതേസമയം, കേന്ദ്ര-സംസ്ഥാന ഗവൺമെന്റുകളോട് ചികിത്സയ്ക്കുള്ള സഹായം നൽകാൻ കോടതി നിർദേശിച്ചിരുന്നു. എന്നാൽ, 2025ൽ ഹരീഷ് റാണയുടെ ആരോഗ്യസ്ഥിതി കൂടുതൽ മോശമായ സാഹചര്യത്തിൽ വീണ്ടും അദ്ദേഹത്തിന്റെ പിതാവ് കോടതിയെ സമീപിക്കുകയും തത്ഫലമായി ചികിത്സയുടെ ഫലപ്രാപ്തി സംബന്ധിച്ച് റിപ്പോർട്ട് നൽകാൻ വിദഗ്ധ വൈദ്യസമിതികളോട് കോടതി നിർദേശിക്കുകയും ചെയ്തു. രോഗിയുടെ ആരോഗ്യം പൂർണമായും തിരിച്ചുകിട്ടാൻ സാധ്യതയില്ലെന്നും ചികിത്സ തുടരുന്നതു ജീവിതത്തിന്റെ ഗുണമേന്മ മെച്ചപ്പെടുത്തുന്നില്ലെന്നും, ജൈവ നിലനിൽപ്പ് മാത്രമാണു നീട്ടുന്നതെന്നും വൈദ്യസംഘങ്ങൾ റിപ്പോർട്ട് ചെയ്തു. ഈ സാഹചര്യത്തിൽ, ചികിത്സ തുടരുന്നത് രോഗിയുടെ മികച്ച താത്പര്യത്തിനൊത്തതല്ല എന്ന നിഗമനത്തിലെത്തിയാണ് കോടതി ചികിത്സ പിൻവലിക്കാൻ അനുമതി നൽകിയത്.
ട്യൂബിലൂടെ നൽകുന്ന ക്ലിനിക്കൽ പോഷണം സാധാരണമായി ഭക്ഷണം നൽകുന്ന പ്രക്രിയ എന്നതിനേക്കാൾ സാങ്കേതികവും വൈദ്യശാസ്ത്രപരവുമായ ഇടപെടലുകൾ ഉൾക്കൊള്ളുന്ന അസാധാരണ ചികിത്സാപദ്ധതിയുടെ ഭാഗമാണ് എന്നാണ് കോടതി നിരീക്ഷിച്ചത്. ശസ്ത്രക്രിയ, മെഡിക്കൽ മേൽനോട്ടം, പ്രത്യേക ഉപകരണങ്ങൾ എന്നിവയുടെ സഹായത്തോടെ മാത്രമേ ഇത് സാധ്യമാകൂ. അത്തരത്തിലുള്ള ചികിത്സകൾ രോഗിക്ക് ഗുണകരമല്ലാത്ത സാഹചര്യത്തിൽ അവ പിൻവലിക്കുന്നതു നിയമപരമായി അനുവദനീയമാണ്.
2018ലെ വിധിയുടെ പ്രായോഗിക ആവിഷ്കാരം
2011ലെ അരുണ ഷാൻബാഗ് കേസിലെ വിധിയിൽ കർശനമായ നിബന്ധനകളോടെ നിഷ്ക്രിയ ദയാവധം അനുവദിക്കാമെന്ന് കോടതി വിധിച്ചിരുന്നു. ഇതേത്തുടർന്ന് കോമൺ കോസ് വേഴ്സസ് യൂണിയൻ ഓഫ് ഇന്ത്യ 2018 കേസിൽ ഭരണഘടനാ ബെഞ്ച് ഈ വിഷയത്തെ കൂടുതൽ വ്യക്തതയോടെ വ്യാഖ്യാനിക്കുകയുണ്ടായി. 2018ലെ വിധിയിൽ, ചികിത്സ പിൻവലിച്ചുകൊണ്ടുള്ള നിഷ്ക്രിയ ദയാവധത്തെ ഭരണഘടനയുടെ 21-ാം അനുച്ഛേദത്തിൽ ഉൾപ്പെടുന്ന മനുഷ്യാന്തസിന്റെ അവകാശവുമായി ബന്ധപ്പെടുത്തിയിരുന്നു. അതേസമയം, ജീവൻ നേരിട്ട് അവസാനിപ്പിക്കുന്ന സജീവ ദയാവധം ഇന്ത്യൻ നിയമത്തിൽ ഇപ്പോഴും അനുവദനീയമല്ലെന്ന് കോടതി വീണ്ടും ഓർമിപ്പിച്ചു. ഈ വിധിയുടെ പ്രായോഗിക ആവിഷ്കാരം എന്ന നിലയിലാണ് സുപ്രീംകോടതിയുടെ പുതിയ വിധി പ്രസക്തമായിരിക്കുന്നത്.
മനുഷ്യാന്തസും കോടതിവിധിയും
കോടതി ഈ വിഷയത്തെ വൈദ്യശാസ്ത്രപരമായ കാര്യമായി മാത്രമല്ല, മനുഷ്യാന്തസിന്റെ പ്രശ്നമായും പരിഗണിച്ചു. രോഗിക്ക് തിരിച്ചുവരവ് സാധ്യമല്ലാത്ത സാഹചര്യത്തിൽ, നിർബന്ധിതമായ ചികിത്സ തുടർന്നുകൊണ്ട് വെറും ജൈവ നിലനിൽപ്പ് നീട്ടുന്നത് മനുഷ്യാന്തസിനോട് പൊരുത്തപ്പെടുന്നതല്ലെന്ന നിലപാടാണ് കോടതി സ്വീകരിച്ചത്.
ഈ സാഹചര്യത്തിൽ ചികിത്സ പിൻവലിക്കുന്നത് ജീവിതത്തെ ഉപേക്ഷിക്കലായല്ല, അനിവാര്യമായ മരണത്തെ മനുഷ്യാന്തസോടെ സ്വീകരിക്കാൻ അനുവദിക്കുന്ന നടപടി എന്ന നിലയിലാണ് കോടതി കാണുന്നത്.
കോർപറേറ്റ് ആശുപത്രികളുടെ ധാർമികത
വൈദ്യശാസ്ത്രവും ആരോഗ്യസംരക്ഷണ മേഖലയും വളരെയധികം പുരോഗമിച്ച കാലമാണിത്. കോർപറേറ്റ് ആശുപത്രികളും അത്യന്തം ചെലവേറിയ ചികിത്സാ സംവിധാനങ്ങളും ചില ധാർമിക പ്രശ്നങ്ങൾ ഉയർത്തുന്നുണ്ട്. ധാർമികശാസ്ത്രം ചികിത്സയെ സാധാരണമെന്നും അസാധാരണമെന്നും തരംതിരിക്കുന്നു. അസാധാരണ ചികിത്സാവിധികൾ ചിലപ്പോഴെങ്കിലും ലാഭേച്ഛയോടെയാണ് എന്ന വിമർശനങ്ങൾ ധാരാളമുണ്ട്. അനുപാതരഹിതവും രോഗിക്ക് ഫലം ചെയ്യാത്തതും ബുദ്ധിമുട്ടുകൾ സൃഷ്ടിക്കുന്നതുമായ അസാധാരണ ചികിത്സകൾ സ്വീകരിക്കുന്നത് നിർബന്ധമല്ല എന്നതാണ് വൈദ്യ നൈതികശാസ്ത്രത്തിന്റെ പൊതു സിദ്ധാന്തം.
നിയമനിർമാണത്തിനുള്ള ആവശ്യകത
ഇന്ത്യയിൽ ഇതുമായി ബന്ധപ്പെട്ട വ്യക്തമായ നിയമം ഇതുവരെ രൂപീകരിക്കപ്പെട്ടിട്ടില്ലെന്ന കാര്യം കോടതി വീണ്ടും ചൂണ്ടിക്കാട്ടി. മുമ്പ് നിയമ കമ്മീഷൻ നൽകിയ റിപ്പോർട്ടുകളും ഈ വിഷയത്തിൽ നിയമം കൊണ്ടുവരേണ്ടതിന്റെ ആവശ്യകതയെക്കുറിച്ച് സൂചിപ്പിച്ചിരുന്നു. അതിനാൽ, ഇത്തരത്തിലുള്ള കേസുകൾക്കായി വ്യക്തവും ഏകീകൃതവുമായ നിയമരൂപരേഖ പാർലമെന്റ് നിർദേശിക്കേണ്ടതുണ്ടെന്ന് കോടതി അഭിപ്രായപ്പെട്ടു.
കത്തോലിക്ക സഭയുടെ നിലപാട്
മനുഷ്യജീവിതത്തിന്റെ മൂല്യവും മനുഷ്യാന്തസും സംബന്ധിച്ച കത്തോലിക്ക സഭയുടെ പഠനം സ്ഥിരവും സുവ്യക്തവുമാണ്. ‘സഭ ആധുനിക ലോകത്തിൽ’ എന്ന രണ്ടാം വത്തിക്കാൻ കൗൺസിലിന്റെ പ്രമാണരേഖയിൽ കൊലപാതകം, വംശഹത്യ, ഗർഭഛിദ്രം, ആത്മഹത്യ എന്നിവ പോലെതന്നെ ദയാവധവും മനുഷ്യജീവനെതിരേയുള്ളതും മനുഷ്യാന്തസിനെ നശിപ്പിക്കുന്നതുമായ അതിക്രമമാണെന്നും അതുകൊണ്ട് സ്രഷ്ടാവിനും മനുഷ്യവംശത്തിനും എതിരേയുള്ള ഗൗരവമുള്ള തെറ്റാണെന്നും പഠിപ്പിക്കുന്നു (പ്രമാണരേഖ, ഖണ്ഡിക 28).
അനുപാതരഹിതമായ ചികിത്സാമാർഗങ്ങൾ
എങ്കിലും, വൈദ്യശാസ്ത്രത്തിന്റെ പുരോഗതിയോടെ മനുഷ്യജീവിതത്തിന്റെ അവസാനഘട്ടത്തിൽ പുതിയ നൈതികചോദ്യങ്ങൾ ഉയരുന്നുണ്ടെന്ന് സഭ അംഗീകരിക്കുന്നു. ഇതിനെക്കുറിച്ച് വിശ്വാസ തിരുസംഘം 1980ൽ പ്രസിദ്ധീകരിച്ച ‘ദയാവധം സംബന്ധിച്ച പ്രഖ്യാപനം’ എന്ന രേഖയിൽ അവസാന ഭാഗത്ത് ചികിത്സയുടെ ഉപയോഗ
National
ന്യൂഡൽഹി: അർബുദം, പ്രമേഹം തുടങ്ങിയ രോഗങ്ങൾക്ക് മന്ത്രവിദ്യയിലൂടെയും മാന്ത്രിക വസ്തുക്കളിലൂടെയും പ്രതിവിധി നൽകാമെന്നു വാഗ്ദാനം ചെയ്തുകൊണ്ടുള്ള തെറ്റിദ്ധരിപ്പിക്കുന്ന പരസ്യങ്ങൾക്കെതിരേ കേന്ദ്രഭരണ പ്രദേശങ്ങളിലെ ഭരണാധികാരികൾക്ക് അധികാരം നൽകി കേന്ദ്രം.
ഇത്തരം തെറ്റായ പരസ്യങ്ങളുമായി ബന്ധപ്പെട്ട് ഏതു രേഖ പിടിച്ചെടുക്കാനും ഏതു സ്ഥലവും പരിശോധിക്കാനും അഞ്ച് കേന്ദ്രഭരണ പ്രദേശങ്ങളിലെ അഡ്മിനിസ്ട്രേറ്റർമാർക്കും ലഫ്. ഗവർണർമാർക്കുമാണ് കേന്ദ്രം അധികാരം നൽകിയിരിക്കുന്നത്.
മാന്ത്രികമായ പ്രതിവിധികൾ ഉറപ്പുനൽകുന്ന, തെറ്റിദ്ധരിപ്പിക്കുന്ന പരസ്യങ്ങൾ നിരോധിച്ചിട്ടുള്ള 1954ലെ ഡ്രഗ്സ് ആൻഡ് മാജിക് റെമഡീസ് ആക്ടിനു കീഴിലാണ് കേന്ദ്രം ലഫ്. ഗവർണർമാർക്ക് അധികാരം നൽകുന്നത്.
ലക്ഷദ്വീപ്, ചണ്ഡിഗഡ്, ദാദ്ര ആൻഡ് നാഗർ ഹവേലി, ദാമൻ ആൻഡ് ദിയു, പുതുച്ചേരി, ജമ്മു കാഷ്മീർ എന്നീ കേന്ദ്രഭരണ പ്രദേശങ്ങളിലാണ് നിയമം നടപ്പിലാക്കാനുള്ള അധികാരം അതത് ലഫ്. ഗവർണർമാർക്കു നൽകിയത്. ഇതുസംബന്ധിച്ചുള്ള വിജ്ഞാപനം ആഭ്യന്തരമന്ത്രാലയം ഔദ്യോഗിക ഗസറ്റിൽ പ്രസിദ്ധീകരിച്ചിട്ടുണ്ട്.
നേരത്തേ നിയമത്തിനു കീഴിൽ എവിടെ പരിശോധിക്കാനും രേഖകൾ പിടികൂടാനും കുറ്റങ്ങൾക്കെതിരേ നടപടിയെടുക്കാനും ഓഫീസർമാരെ നിയമിക്കാനുള്ള അധികാരം അതത് സംസ്ഥാന സർക്കാരുകൾ ചുമതലപ്പെടുത്തിയ ഓഫീസർമാർക്കായിരുന്നെങ്കിലും പുതിയ വിജ്ഞാപനത്തിലൂടെ ഓഫീസർമാരെ ചുമതലപ്പെടുത്തുന്ന അധികാരം ഇപ്പോൾ കേന്ദ്രഭരണ പ്രദേശങ്ങളിലെ ലഫ്. ഗവർണർമാർക്കോ അഡ്മിനിസ്ട്രേറ്റർമാർക്കോ കൈമാറിയിരിക്കുകയാണ്.
International
ലണ്ടൻ: ഗർഭകാലത്ത് പാരസെറ്റമോൾ മരുന്നു കഴിക്കുന്നത് സുരക്ഷിതമാണെന്ന് വിദഗ്ധ സമിതി. കുഞ്ഞിന് ഓട്ടിസം, എഡിഎച്ച്ഡി, വളർച്ചാ തടസങ്ങൾ എന്നിവ ഉണ്ടാകില്ല.
പാരസെറ്റമോൾ ഗർഭിണികൾക്കു സുരക്ഷിതമല്ലെന്ന് അമേരിക്കൻ പ്രസിഡന്റ് ട്രംപ് പ്രസ്താവന നടത്തിയ പശ്ചാത്തലത്തിലാണ് സമിതി വിശദമായ വിലയിരുത്തലിന് മുതിർന്നത്.
ഗർഭിണികൾ പാരസെറ്റമോളിനെതിരേ പോരാടണമെന്നും ട്രംപ് കഴിഞ്ഞ വർഷം പറഞ്ഞിരുന്നു. ട്രംപിന്റെ വാക്കുകൾ ഗർഭിണികളെ ആശയക്കുഴപ്പത്തിലാക്കുക മാത്രമല്ല, വൈദ്യവൃത്തങ്ങളെ അന്പരിപ്പിക്കുകയുമുണ്ടായി.
ഗർഭകാലത്തെ പരാസെറ്റമോൾ ഉപയോഗവുമായി ബന്ധപ്പെട്ട് അടുത്തകാലത്തുണ്ടായ 43 പഠനങ്ങൾ വിലയിരുത്തിയാണ് വിദഗ്ധ സമിതി തീർച്ചയിലെത്തിയത്. സമിതിയുടെ കണ്ടെത്തലുകൾ ലാൻസെറ്റ് ജേർണലിൽ ‘ഒബ്സ്റ്റെറിക്സ്, ഗൈനക്കോളജി ആൻഡ് വുമൺസ് ഹെൽത്ത്’ എന്ന പേരിൽ പ്രസിദ്ധീകരിച്ചിട്ടുണ്ട്.
Business
മുംബൈ: ഇന്ത്യയിൽ വിറ്റുവരവിന്റെ അടിസ്ഥാനത്തിൽ എലി ലില്ലിയുടെ അമിത വണ്ണത്തിനുള്ള മരുന്നായ മൗൻജാരോ ഒക്ടോബറിൽ ഏറ്റവും കൂടുതൽ വിറ്റഴിക്കപ്പെട്ട മരുന്നായി. കഴിഞ്ഞ മാസം 100 കോടി രൂപയുടെ വില്പനയാണ് മൗൻജാരോ നേടിയതെന്ന് ഫാർമറാക്ക് എന്ന റിസർച്ച് സ്ഥാപനം റിപ്പോർട്ട് ചെയ്തു.
മൗൻജാരോ ഗ്ലാക്സോ സ്മിത്ത്ക്ലൈൻ (ജിഎസ്കെ)ന്റെ ആന്റിബയോട്ടിക് മരുന്നായ ഓഗ്മെന്റിന്റെ വിറ്റുവരവിനെ മറികടന്നു. 80 കോടി രൂപയുടെ വിറ്റുവരവാണ് ഓഗ്മെന്റിൻ നേടിയത്. ഒക്ടോബറിൽ എണ്ണത്തിൽ ഓഗ്മെന്റിന്റെ വിൽപ്പന മൗൻജാരോയെക്കാൾ മുകളിലാണ്. എന്നാൽ, മരുന്നിന്റെ വിലയാണ് മൗൻജാരോയെ വിൽപ്പന മൂല്യത്തിൽ ഒന്നാം സ്ഥാനത്തെത്തിച്ചത്.
ഈ വർഷം മാർച്ചിലാണ് മൗൻജാരോ ഇന്ത്യൻ വിപണിയിൽ പുറത്തിറക്കിയത്. രക്തത്തിലെ പഞ്ചസാരയുടെ അളവ് നിയന്ത്രിക്കാനും ദഹനം മന്ദഗതിയിലാക്കാനും സഹായിക്കുന്ന മൗൻജാരോയ്ക്ക് ഇന്ത്യൻ വിപണിയിൽ വൻ സ്വീകാര്യതയാണ് ലഭിച്ചത്. ഏതാനും മാസങ്ങൾക്കുള്ളിൽ തന്നെ വിൽപ്പന ഇരട്ടിയായി വർധിച്ചു.
എലി ലില്ലിയുടെ എതിരാളികളായ നോവോ നോർഡിസ്ക് അമിത വണ്ണത്തിനുള്ള മരുന്നായ വെഗോവി ജൂണിലാണ് ഇന്ത്യൻ വിപണിയിൽ അവതരിപ്പിച്ചത്. എന്നാൽ, മൗൻജാരോയുടെ വില്പന മൂല്യത്തെ മറികടക്കാൻ വെഗോവിക്കായില്ല. ഒക്ടോബർ വരെ മൗൻജാരോ 333 കോടി രൂപയുടെ വരുമാനം നേടി.
ഒക്ടോബറിൽ വെഗോവിയേക്കാൾ 10 മടങ്ങ് കൂടുതലായിരുന്നു മൗൻജാരോയുടെ ഇന്ത്യൻ ഉപഭോഗം.ലില്ലി കഴിഞ്ഞ മാസം 2,62,000 മൗൻജാരോ യൂണിറ്റുകൾ വിറ്റപ്പോൾ വെഗോവി 26,000 യൂണിറ്റുകളും വിറ്റു.
ഈ രണ്ടു മരുന്നുകളും ജിഎൽപി-1 റിസപ്റ്റർ അഗോണിസ്റ്റ് എന്ന വിഭാഗത്തിൽപ്പെടുന്നു. വിശപ്പ് നിയന്ത്രിക്കുന്ന ഇവ തലച്ചോറിലെ വിശപ്പിനെ നിയന്ത്രിക്കുന്ന കേന്ദ്രങ്ങളിൽ പ്രവർത്തിച്ച്, ആളുകൾക്ക് വയർ നിറഞ്ഞതായി തോന്നിക്കും. ദഹനം മന്ദഗതിയിലാക്കുന്നു. പ്രമേഹ ചികിത്സയിൽ രക്തത്തിലെ പഞ്ചസാരയുടെ അളവ് കൂടുന്പോൾ മാത്രം ഇൻസുലിൻ ഉത്പാദനം വർധിപ്പിക്കാൻ ഈ മരുന്നുകൾ പാൻക്രിയാസിനെ സഹായിക്കുന്നു.
ജീവിതശൈലീ രോഗങ്ങൾ ഉയർന്നുവരുന്ന ഇന്ത്യയിൽ അമിത ഭാരം കുറയ്ക്കാനുള്ള ചികിത്സകൾക്ക് ഏറിവരുന്ന ആവശ്യകതയുടെ പ്രതിഫലനമാണ്് ഈ മരുന്നുകൾക്ക് ലഭിക്കുന്ന വൻ സ്വീകാര്യത.
മൗൻജാരോയെ മറ്റൊരു ബ്രാൻഡ് നാമത്തിൽ വിൽക്കുന്നതിനായി കഴിഞ്ഞ മാസം ഇന്ത്യൻ മരുന്ന് നിർമാതാക്കളായ സിപ്ലയുമായി ലില്ലി ഒരു കരാറിൽ ഒപ്പുവയ്ക്കുകയും ചെയ്തു.
Kerala
പാലക്കാട്: ആലത്തൂരില് ജ്യൂസാണെന്ന് കരുതി കുളമ്പ് രോഗത്തിനുള്ള മരുന്ന് കുടിച്ച സഹോദരങ്ങള് ആശുപത്രിയില്. ആലത്തൂര് വെങ്ങന്നൂര് സ്വദേശികളായ പത്തും ആറും വയസുള്ള കുട്ടികളെയാണ് ആശുപത്രിയില് പ്രവേശിപ്പിച്ചത്.
തിങ്കളാഴ്ച്ച് വൈകുന്നേരം നാലോയായിരുന്ന സംഭവം. കുപ്പിയില് നിറച്ച് വച്ചിരുന്ന മരുന്നാണ് കുട്ടികള് ജ്യൂസെന്ന് തെറ്റിദ്ധരിച്ച് കുടിച്ചത്.
രുചിവ്യത്യാസം തോന്നിയപ്പോള് മരുന്ന് തുപ്പിക്കളഞ്ഞു. എന്നാല് കുളമ്പ് രോഗത്തിന് പുരട്ടുന്ന മരുന്നില് അമ്ളത്തിന്റെ സാന്നിധ്യം ഉള്ളതിനാല് വായിക്കും തൊണ്ടയ്ക്കും പൊള്ളലേറ്റു.
കുട്ടികള് അങ്കമാലിയിലെ സ്വകാര്യ ആശുപത്രിയില് ചികിത്സയില് കഴിയുകയാണ്. അപകടനില തരണം ചെയ്തതായി ആശുപത്രി അധികൃതര് അറിയിച്ചു.
District News
പെരിന്തൽമണ്ണ: പെരിന്തൽമണ്ണ കിംസ് അൽശിഫ ആശുപത്രിയുടെ 35-ാം വാർഷിക ആഘോഷങ്ങളുടെ ഭാഗമായി നിരവധി ജനോപകാരപ്രദമായ പദ്ധതികൾ നടപ്പാക്കുമെന്ന് ബന്ധപ്പെട്ടവർ വാർത്താസമ്മേളനത്തിൽ അറിയിച്ചു. ഇതിനോടനുബന്ധിച്ച് നിർധനരായ 10 രോഗികൾക്ക് സൗജന്യമായും 50 രോഗികൾക്ക് സൗജന്യ നിരക്കിലും വൃക്കമാറ്റിവയ്ക്കൽ ശസ്ത്രക്രിയ ചെയ്തുകൊടുക്കുന്ന "പുനർജനി’ പദ്ധതിക്ക് തുടക്കം കുറിക്കുകയാണെന്ന് ഭാരവാഹികൾ പറഞ്ഞു.
ഇതിനോടകം കിംസ് അൽശിഫ റീനൽ ട്രാൻസ്പ്ലാന്റ് വിഭാഗത്തിന്റെ നേതൃത്വത്തിൽ വിദേശികളടക്കം നിരവധി പേർക്ക് വൃക്ക മാറ്റിവയ്ക്കൽ ശസ്ത്രക്രിയ പൂർത്തീകരിച്ചിട്ടുണ്ട്. പദ്ധതി പ്രഖ്യാപനത്തിന്റെ ഉദ്ഘാടനം 31ന് പാണക്കാട് സാദിഖലി ശിഹാബ് തങ്ങൾ നിർവഹിക്കും. ചടങ്ങിൽ രാഷ്ട്രീയ, സാമൂഹിക, സന്നദ്ധ, ചാരിറ്റി സേവന മേഖലകളിലെ പ്രമുഖർ പങ്കെടുക്കും.
കിംസ് അൽശിഫയിൽ നടത്തിയ വാർത്താസമ്മേളനത്തിൽ വൈസ് ചെയർമാൻ ആൻഡ് എക്സിക്യൂട്ടീവ് ഡയറക്ടർ ഡോ.പി. ഉണ്ണീൻ, സിഇഒ കെ.സി. പ്രിയൻ, മെഡിക്കൽ സൂപ്രണ്ട് ഡോ. മുഹമ്മദ് യഹിയ, ട്രാൻസ്പ്ലാന്റ് ഫിസിഷ്യൻമാരായ ഡോ. പി.എം. ഗണേഷൻ, ഡോ. നയന എം. ബാബു, ഡോ. എൻ. നിഷാദ്, ട്രാൻസ്പ്ലാന്റ് സർജൻമാരായ ഡോ.പി.എം. മുരളി, ഡോ. രാഹുൽനാരായണൻ, ക്ലിനിക്കൽ അഡ്മിനിസ്ട്രേറ്റർ ഡോ.ഷാഹുൽ ഹമീദ് എന്നിവർ പങ്കെടുത്തു. പദ്ധതിയുടെ വിവരങ്ങൾക്ക് ഫോണ്: 9447342202, 9446371500.
District News
പെരിന്തൽമണ്ണ: പെരിന്തൽമണ്ണ പട്ടാമ്പി റോഡ് ജൂബിലി ജംഗ്ഷനിലെ മെഡിക്കൽ ഉപകരണങ്ങളുടെ ഹോൾസെയിൽ ഡീലറായ മെഡി ടെക് എന്റർപ്രൈസസ് പ്രവർത്തിക്കുന്ന കെട്ടിടത്തിലെ ഗോഡൗണിനാണ് തീപിടിച്ചത്.
ഇന്നലെ പുലർച്ചെ ആറര മണിയോടെയാണ് കെട്ടിടത്തിൽ നിന്നും പുക ഉയരുന്നതായി നാട്ടുകാർ കണ്ടത്. പാക്കത്ത് മുസ്തഫയുടേതാണ് കെട്ടിടം. മൂന്നു കോടിയുടെ നാശനഷ്ടം ഉണ്ടായതായിമെഡി ടെക് എന്റർപ്രൈസസ് ഉടമ കെ പി ഷാഫി അവകാശപ്പെടുന്നു.
പെരിന്തൽമണ്ണയിൽ നിന്നെത്തിയ രണ്ട് ഫയർ യൂണിറ്റും മലപ്പുറം ജില്ലാ ട്രോമാ കെയർ പെരിന്തൽമണ്ണ സ്റ്റേഷൻ യൂണിറ്റ് ലീഡർ ജബ്ബാർ ജൂബിലിയുടെ നേതൃത്വത്തിൽ ഉള്ള ട്രോമാകെയർ പ്രവർത്തകരും ചേർന്ന് തീ പരിപൂർണ്ണമായും അണച്ചു.
പെരിന്തൽമണ്ണ സ്റ്റേഷൻ ഓഫീസർ സി ബാബുരാജ് നേതൃത്വത്തിൽ ഫയർഫോഴ്സ് അംഗങ്ങളായ സുർജിത്, പ്രശാന്ത് ,നസീർ ,രാമദാസ്, സഫീർ, സുജിത്ത് ,വിശ്വനാഥൻ, ഉണ്ണികൃഷ്ണൻ എന്നിവരും , ട്രോമാ കെയർ അംഗങ്ങളായഷഫീദ് പാതായ്ക്കര,സുബീഷ് പരിയാപുരം,സനൂബ് തട്ടാരക്കാട്,ഫാറൂഖ് പൂപ്പലം, അമ്പിളി ജിജൻ, വാഹിദ അബു, ജിൻഷാദ്,സിന്ധു മാനത്ത് മങ്കലം,വിനോദ് മുട്ടുങ്ങൽ, എന്നിവരും ഈ ഉദ്യമത്തിൽ പങ്കെടുത്തു.
Kerala
തിരുവനന്തപുരം: തിരുവനന്തപുരം ആർസിസി ആശുപത്രിയിൽ രോഗികൾക്ക് മരുന്ന് മാറി നൽകി. തലച്ചോറിലെ കാൻസറിന്, ശ്വാസകോശ കാൻസറിനുള്ള മരുന്ന് നൽകിയെന്ന വിവരമാണ് പുറത്ത് വരുന്നത്.
മരുന്ന് പായ്ക്ക് ചെയ്തതിലെ പിഴവാണെന്നും ഗ്ലോബെല ഫാർമ കമ്പനിയെ കരിമ്പട്ടികയിൽ പെടുത്തിയെന്നും ആശുപത്രി അധികൃതർ പറഞ്ഞു. ആർസിസി സ്റ്റോറിലെ ജീവനക്കാരാണ് മരുന്നു മാറിയ വിവരം അറിഞ്ഞത്.
അതേസമയം രണ്ടായിരത്തിലധികം കുപ്പി മരുന്ന് രോഗികൾക്ക് നൽകിയതായും ഈ രോഗികളെ ബന്ധപ്പെടാനുള്ള ശ്രമം ആരംഭിച്ചതായും ആശുപത്രി അധികൃതർ അറിയിച്ചു. മരുന്ന് പാക്കിംഗിൽ കമ്പനിക്ക് വന്ന പിഴവാണ് വീഴ്ചയ്ക്ക് കാരണമെന്നാണ് സൂചന.
Kerala
തിരുവനന്തപുരം: തമിഴ്നാട് സർക്കാർ ലൈസന്സ് മരവിപ്പിച്ചതിനെ തുടർന്ന് ശ്രീശൻ ഫാര്മസ്യൂട്ടിക്കൽസിന്റെ കേരളത്തിലെ മരുന്ന് വിൽപ്പന നിരോധിച്ചെന്ന് മന്ത്രി വീണാ ജോർജ്. സ്ഥാപനത്തിനെതിരെ തമിഴ്നാട് ഡ്രഗ്സ് കണ്ട്രോളര് ആരംഭിച്ച നടപടികളുടെ പശ്ചാത്തലത്തിലാണ് നടപടിയെന്ന് മന്ത്രി പറഞ്ഞു.
Respifresh TR, 60ml syrup, Batch. No. R01GL2523 എന്ന മരുന്നിന് ഗുണനിലവാരമില്ലെന്ന് ഗുജറാത്ത് ഡ്രഗ്സ് കണ്ട്രോളര് അറിയിച്ച സാഹചര്യത്തിലാണ് നടപടി. സംസ്ഥാനത്ത് അഞ്ച് വിതരണക്കാരാണ് ഈ മരുന്ന് വിതരണം നടത്തുന്നത്.
അവർക്ക് മരുന്ന് വിതരണം നിർത്തിവയ്ക്കാൻ നിർദേശം നൽകിയിട്ടുണ്ട്. ഈ മരുന്ന് വിൽപ്പന നടത്തുന്നവർക്കെതിരെ കർശന നടപടി സ്വീകരിക്കും. കൈവശമുള്ളവർ ഉപയോഗിക്കരുത്. ഈ മരുന്നുകൾ സർക്കാർ ആശുപത്രികൾ വഴി വിതരണം ചെയ്യുന്നില്ലെന്നും മന്ത്രി പറഞ്ഞു.
അംഗീകൃത ഡോക്ടറുടെ കുറിപ്പടി ഇല്ലാതെ 12 വയസിനു താഴെയുള്ള കുട്ടികൾക്ക് വേണ്ടി മരുന്ന് നൽകുന്ന സ്ഥാപനങ്ങൾക്കെതിരെ കർശന നടപടി സ്വീകരിക്കാനും മന്ത്രി നിർദേശം നൽകി.
International
സ്റ്റോക്ഹോം: 2025ലെ വൈദ്യശാസ്ത്ര നൊബേൽ പുരസ്കാരത്തിന് മൂന്നു പേർ അര്ഹരായി. യുഎസ് ഗവേഷകരായ മാരി ഇ. ബ്രൻകോവ്, ഫ്രെഡ് റാംസ്ഡെൽ, ജാപ്പനീസ് ഗവേഷക ഷിമോൺ സാകാഗുച്ചി എന്നിവർക്കാണ് പുരസ്കാരം.
ശരീരത്തെ ദോഷകരമായി ബാധിക്കുന്നതിൽ നിന്ന് രോഗപ്രതിരോധ സംവിധാനത്തെ തടയുന്ന പെരിഫറൽ ഇമ്യൂൺ ടോളറൻസ് സംബന്ധിച്ച വഴിത്തിരിവായ കണ്ടെത്തലുകൾക്കാണ് നൊബേൽ. നൊബേല് അസംബ്ലിയാണ് പുരസ്കാര പ്രഖ്യാപനം നടത്തിയത്. വാലന്ബെര്ഗ്സലേനിലുള്ള കരോലിന്സ്ക ഇന്സ്റ്റിറ്റ്യൂട്ടിലാണ് പ്രഖ്യാപനം നടന്നത്.
മേരി ഇ. ബ്രൺകോവ് സിയാറ്റിലിലെ ഇൻസ്റ്റിറ്റ്യൂട്ട് ഓഫ് ബയോളജിയിലെ ഗവേഷകയാണ്. ഫ്രെഡ് റാംസ്ഡെൽ സാൻ ഫ്രാൻസിസ്കോയിലെ സൊനോമ ബയോതെറാപ്യൂട്ടിക്സ് സ്ഥാപകനും ഷിമോൺ സാകാഗുച്ചി ജപ്പാനിലെ ഒസാക സർവകലാശാലയിലെ ഗവേഷകനുമാണ്.
അതേസമയം, മറ്റു മേഖലകളിലെ പുരസ്കാരങ്ങൾ വരുംദിവസങ്ങളില് പ്രഖ്യാപിക്കും. ചൊവ്വാഴ്ച ഭൗതികശാസ്ത്രം, ബുധനാഴ്ച രസതന്ത്രം, വ്യാഴാഴ്ച സാഹിത്യം, വെള്ളിയാഴ്ച സമാധാനം, ശനിയാഴ്ച സാമ്പത്തിക ശാസ്ത്രം എന്നീ നൊബേലുകളും പ്രഖ്യാപിക്കും. സര്ട്ടിഫിക്കറ്റ്, സ്വര്ണ മെഡല്, 13.31 കോടി രൂപയുടെ ചെക്ക് എന്നിവയാണ് പുരസ്കാരം നേടിയവര്ക്ക് ലഭിക്കുക.