എടത്വ: സെന്‍റ് ജോര്‍ജ് ഫൊറോന പള്ളില്‍ വിശുദ്ധ ഗീവര്‍ഗീസ് സഹദായുടെ തിരുസ്വരൂപം മൂന്നിന് രാവിലെ 7.30ന് ദേവാലയ കവാടത്തില്‍ പ്രതിഷ്ഠിക്കും. രാവിലെ 5.45ന് വിശുദ്ധ കുര്‍ബാനയ്ക്കുശേഷം നടക്കുന്ന ചടങ്ങില്‍ പതിനായിരങ്ങള്‍ പങ്കെടുക്കും. അന്നുമുതല്‍ തീര്‍ഥാടക പ്രവാഹം ആരംഭിക്കും. തമിഴ് തീര്‍ഥാടകരുടെ തിരക്ക് ആരംഭിച്ചിട്ടുണ്ട്. പള്ളിയും പരിസരപ്രദേശങ്ങളും തീര്‍ഥാടകരെക്കൊണ്ട് നിറഞ്ഞുതുടങ്ങി. തിരുസ്വരൂപം വണങ്ങാന്‍ ദക്ഷിണേന്ത്യയിലെ ഒട്ടുമിക്ക സംസ്ഥാനങ്ങളില്‍നിന്നും ഭക്തജനങ്ങള്‍ എത്തിചേരും. തിരുസ്വരൂപത്തിനു മുമ്പില്‍ നേര്‍ച്ച-കാഴ്ച അര്‍പ്പിച്ചും മെഴുകുതിരി തെളിച്ചും പള്ളിയില്‍നിന്ന് ലഭിക്കുന്ന നേര്‍ച്ച അരിയും അരിയുണ്ടയും കഴിനൂലും വാങ്ങി മടങ്ങാനാണ് തീര്‍ഥാടകര്‍ എത്തുന്നത്.
തലയില്‍ ഇഷ്ടികയുമേന്തി പള്ളിക്കു ചുറ്റും നടന്നും മുട്ടില്‍ ഇഴഞ്ഞും പ്രദക്ഷിണം വയ്ക്കുന്നവരെക്കൊണ്ട് പള്ളിമുറ്റം നിറഞ്ഞു തടങ്ങി. തീര്‍ഥാടകരുടെ വാഹനങ്ങള്‍ പാര്‍ക്കുചെയ്യാന്‍ സെന്‍റ് അലോഷ്യസ് കോളജ് ഗ്രൗണ്ടിലും ജോര്‍ജിയന്‍, സെന്‍റ് മേരീസ്, സെന്‍റ് അലോഷ്യസ് എന്നീ സ്‌കൂള്‍ ഗ്രൗണ്ടുകളിലും സൗകര്യം ഒരുക്കിയിട്ടുണ്ട്. പ്രധാന തിരുനാള്‍ ദിനമായ മെയ് ഏഴിന് വൈകിട്ട് നാലിന് തിരുസ്വരൂപവും വഹിച്ചുള്ള പ്രധാന തിരുനാള്‍ പ്രദക്ഷിണം നടക്കും. 14ന് എട്ടാമിടദിനം രാത്രി ഒന്‍പതിന് തിരുസ്വരൂപം ദേവാലയ കവാടത്തില്‍ പ്രതിഷ്ഠിക്കുന്നതോടെ ഈവര്‍ഷത്തെ തിരുനാള്‍ സമാപിക്കും.
പള്ളിയില്‍ ഇന്ന്
എടത്വ സെന്‍റ് ജോര്‍ജ് ഫൊറോനപള്ളിയില്‍ രാവിലെ 4.30 ന് ഖാലാ ദ്ശഹറാ, വിശുദ്ധ കുര്‍ബാന (തമിഴ്) -ഫാ. ജനീസ്, 5.45ന് സപ്രാ, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന -ഫാ. ജേക്കബ് ചെത്തിപ്പുഴ, 7.45ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന -ഫാ. ജേക്കബ് പുളിന്താനത്ത്, 10ന് വിശുദ്ധ കുര്‍ബാന (തമിഴ് സീറോ മലബാര്‍) - ഫാ. തോമസ് സത്യനേശന്‍, വൈകിട്ട് നാലിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. സ്‌കറിയാ ചേപ്പില, ആറിന് വിശുദ്ധ കുര്‍ബാന (തമിഴ്)-ഫാ. സൈമണ്‍, ഏഴിന് മധ്യസ്ഥപ്രാര്‍ഥന (കുരിശടിയില്‍).
പള്ളിയില്‍ നാളെ
രാവിലെ 4.30ന് ഖാലാ ദ്ശഹറാ, വിശുദ്ധ കുർബാന (തമിഴ്) -ഫാ. സൈമണ്‍, 5.45ന് സപ്രാ, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. ഏലിയാസ് കരിക്കണ്ടത്തില്‍, 7.45ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. വര്‍ഗീസ് എടച്ചേത്ര, 10ന് വിശുദ്ധ കുര്‍ബാന (തമിഴ് സീറോ മലബാര്‍) - ഫാ. അജീഷ് അട്ടിയില്‍, 11.30ന് വിശുദ്ധ കുര്‍ബാന ( മലയാളം ലത്തിന്‍) -ഫാ. ജേക്കബ് ഒലക്കപ്പാടി, വൈകിട്ട് നാലിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. റോഷോ സ്റ്റീഫന്‍ പട്ടത്താനം, ആറിന് വിശുദ്ധ കുര്‍ബാന (തമിഴ്) - ഫാ. ജനീസ്, ഏഴിന് മധ്യസ്ഥപ്രാര്‍ഥന (കുരിശടിയില്‍).
തിരുനാളിനു കര്‍മനിരതരായി
ഹരിത കര്‍മസേന
എടത്വ: എടത്വ പള്ളി തിരുനാളിനു കൊടിയേറിയതോടെ ശുചീകരണ പ്രവര്‍ത്തനങ്ങളില്‍ കര്‍മനിരതരായി ഹരിത കര്‍മസേന. എടത്വ പഞ്ചായത്തിലെ ഹരിത കര്‍മ സേനാംഗങ്ങളാണ് പള്ളിയും പരിസര പ്രദേശങ്ങളും ശുചീകരണം നടത്തി തീര്‍ഥാടകര്‍ക്കു സേവനം നല്‍കുന്നത്. ജൈവ-അജൈവ മാലിന്യങ്ങള്‍ സംഭരിക്കാന്‍ പള്ളിയിലും പരിസര പ്രദേശങ്ങളിലും വേസ്റ്റ് ബോക്‌സുകള്‍ സ്ഥാപിച്ചിട്ടുണ്ട്. ഈ ബോക്‌സുകള്‍ നിറയുന്ന മുറയ്ക്ക് മാലിന്യം സംഭരിച്ച് മാറ്റും. നിരവധി ഹരിത കര്‍മസേന പ്രവര്‍ത്തകര്‍ അടങ്ങുന്ന ടീമായാണ് ശുചീകരണ പ്രവര്‍ത്തനങ്ങള്‍ നടത്തുന്നത്.