തിരുവല്ല ഇരട്ടപ്പാതയിൽ ട്രെയിനുകൾക്ക് ഉടൻ പച്ചക്കൊടി
Friday, August 26, 2016 10:37 AM IST
തിരുവല്ല: കാത്തിരിപ്പിനൊടുവിൽ തിരുവല്ല ഇരട്ടപ്പാതയ്ക്കു പച്ചക്കൊടിയായി. യാത്രാവണ്ടികൾ ഉൾപ്പെടെയുള്ള തീവണ്ടികൾ കടത്തിവിടുന്നതു സംബന്ധിച്ച് റെയിൽവേ സുരക്ഷാവിഭാഗം കമ്മീഷണറുടെ പരിശോധന പൂർത്തിയായി. പരിശോധനാ റിപ്പോർട്ടിന്റെ അടിസ്‌ഥാനത്തിൽ പാത തുറന്നുകൊടുക്കുന്നതോടെ ദീർഘകാലമായുള്ള കാത്തിരിപ്പിനാണ് വിരാമമാകുന്നത്.

ഇതോടെ തിരുവനന്തപുരം മുതൽ തിരുവല്ല വരെ കാത്തുകിടപ്പില്ലാതെ തീവണ്ടികൾക്കു സഞ്ചരിക്കാനാകും. നാല് പ്ലാറ്റ്ഫോമുകളുമായി തിരുവല്ല റെയിൽവേ സ്റ്റേഷൻ വികസനത്തിനും സാധ്യത തെളിഞ്ഞു. ഒറ്റപ്പാത ആയിരുന്നതിനാൽ തീവണ്ടികൾ സ്റ്റേഷനുകളിൽ ക്രോസിംഗിനായി കാത്തുകിടക്കേണ്ടിവന്നിരുന്നു. ഇത് ഏറെ സമയനഷ്‌ടമുണ്ടാക്കി.

തെക്കുനിന്നുള്ള തീവണ്ടികൾ തിരുവനന്തപുരം മുതൽ തിരുവല്ല വരെ ഇനി കാത്തുകിടപ്പില്ലാതെ ഓടിക്കാനാകും. കോട്ടയം വഴിയുള്ള കായംകുളം – എറണാകുളം പാത ഇരട്ടിപ്പിക്കൽ നടപടികൾ ആരംഭിച്ചിട്ടു ഒരു പതിറ്റാണ്ടിലേറെയായി. സ്‌ഥലമേറ്റെടുക്കൽ അടക്കം പൂർത്തിയാകാൻ ഉണ്ടായ കാലതാമസം കാരണം നടപടികൾ ഏറെ നീണ്ടു. 2003ൽ സ്‌ഥലമേറ്റെടുക്കലിനായി അളവുകൾ പൂർത്തിയാക്കി കല്ലിട്ടതാണ്. കായംകുളത്തു നിന്ന് ചിങ്ങവനം വരെയും എറണാകുളത്തു നിന്ന് ചിങ്ങവനം വരെയുമായി രണ്ട് ഭാഗങ്ങളായാണ് പണികൾ ആരംഭിച്ചത്. കായംകുളം – ചിങ്ങവനം പാതയിൽ ആദ്യഘട്ടമായി മാവേലിക്കര വരെയുള്ള ഇരട്ടപ്പാത പൂർത്തീകരിച്ചു. പിന്നീട് മാവേലിക്കര – ചെങ്ങന്നൂർ പണികൾ നടത്തി.

അടുത്ത ഘട്ടം ചെങ്ങന്നൂർ – ചങ്ങനാശേരിയാണ് ലക്ഷ്യമിട്ടതെങ്കിലും തിരുവല്ല വരെ മാത്രമേ പൂർത്തീകരിക്കാനായിട്ടുള്ളൂ.ചെങ്ങന്നൂർ വരെയുള്ള ഇരട്ടപ്പാതയിലൂടെ മൂന്നുവർഷം മുമ്പ് തീവണ്ടി ഓടിത്തുടങ്ങിയിരുന്നു. അവിടെനിന്നും ഒമ്പത് കിലോമീറ്റർ ദൂരമാണ് ഇപ്പോൾ പൂർത്തീകരിച്ചിരിക്കുന്നത്. ഇതിൽ ഏഴ് കിലോമീറ്ററും പത്തനംതിട്ട ജില്ലയിലായതിനാൽ സ്‌ഥലമേറ്റെടുക്കൽ അടക്കമുള്ള റവന്യുജോലികൾ പൂർത്തീകരിച്ചത് പത്തനംതിട്ട കളക്ടറേറ്റിലാണ്. സ്‌ഥലമേറ്റെടുക്കൽ, പാലം നിർമാണം, മണ്ണിട്ടു നികത്തൽ തുടങ്ങിയ നടപടിക്രമങ്ങളിൽ തടസങ്ങളേറെയുണ്ടായി. നാല് അടിപ്പാതകളുടെ നിർമാണമാണ് പൂർത്തീകരിച്ചിരിക്കുന്നത്. ഇരുവെള്ളിപ്ര, കുറ്റൂർ, പ്രാവിൻകൂട്, കോടിയാട്ടുകര എന്നിവിടങ്ങളിൽ അടിപ്പാതകളുണ്ടായതോടെ വാഹനയാത്രയും സുഗമമായി. പ്രാവിൻകൂട് അടിപ്പാതയാണ് ഏറ്റവുമൊടുവിൽ കമ്മീഷൻ ചെയ്തത്. പാത കടന്നുപോകുന്ന കല്ലിശേരിയിൽ ജലഅഥോറിറ്റിയുടെ ട്രാൻസ്ഫോർമർ നീക്കം ചെയ്യാൻ വൈകിയതും നിർമാണം പൂർത്തീകരിക്കാൻ കാലതാമസം നേരിട്ടു.

നിർമാണ ജോലികൾക്കാവശ്യമായ മണ്ണ് തുടക്കത്തിൽ ലഭ്യമായിരുന്നെങ്കിലും പിന്നീട് ഇതും ലഭിക്കാൻ തടസമുണ്ടായി. പാടശേഖരങ്ങളും നദിയുടെ പുറമ്പോക്കുകളും അടക്കം മണ്ണിട്ടുയർത്തേണ്ടതുണ്ടായിരുന്നു. ജില്ലയുടെ പല ഭാഗങ്ങളിൽ നിന്നും റെയിൽവേ ആവശ്യത്തിനായി മണ്ണ് എത്തിച്ചിരുന്നു. പ്രാദേശികമായ എതിർപ്പുകൾ ഉണ്ടായപ്പോൾ പിന്നീട് പല സ്‌ഥലങ്ങളിലും മണ്ണെടുപ്പ് നടന്നില്ല. കോട്ടയം തുരങ്കത്തിനു സമീപത്തെ റെയിൽവേ ഭൂമിയിൽ നിന്നാണ് ഏറ്റവുമൊടുവിൽ മണ്ണ് എത്തിച്ചത്.തിരുവല്ലയ്ക്ക് നാല് പ്ലാറ്റ്ഫോമുകൾ ലഭിച്ചതും വികസനസാധ്യത വർധിപ്പിക്കുന്നതാണ്. ചെങ്ങന്നൂരിൽ മൂന്ന് പ്ലാറ്റ്ഫോമുകൾ മാത്രമായപ്പോൾ ചരക്കുവണ്ടികൾക്കെന്ന പേരിലാണ് നിലവിൽ തിരുവല്ലയിൽ നാലാം നമ്പർ പ്ലാറ്റ്ഫോം പണിതിരിക്കുന്നത്. പ്ലാറ്റ്ഫോം യാത്രാവണ്ടികൾക്ക് നിലവിൽ ഉപകാരപ്രദമല്ലെങ്കിലും അവശ്യഘട്ടങ്ങളിൽ ഉപയോഗിക്കുന്നുണ്ട്.

തിരുവല്ല സ്റ്റേഷൻ കേന്ദ്രീകരിച്ച് റെയിൽവേ ഗുഡ്സ് യാർഡ് വരുന്നുവെന്ന പ്രചാരണമുണ്ട്. ഇതിനെതിരെ പ്രാദേശികമായ എതിർപ്പ് ഉയർന്നതോടെ പദ്ധതിയെ സംബന്ധിച്ച് റെയിൽവേ വിശദീകരണം നടത്തിയിട്ടില്ല.തിരുവല്ല – ചങ്ങനാശേരി പാതയാണ് അടുത്ത ഘട്ടത്തിൽ പൂർത്തീകരിക്കാനുള്ളത്.

നിർമാണത്തിലിരിക്കുന്ന രണ്ടാംപാത മൂന്നുമാസത്തിനുള്ളിൽ പൂർത്തീകരിക്കുമെന്നു പറയുന്നു. ചങ്ങനാശേരി യാർഡിലെ ജോലികൾ പൂർത്തിയാകാനുണ്ട്. വാഴൂർ റോഡിലെ പഴയ മേൽപാലത്തിലെ പൈപ്പുകൾ പുതിയ മേൽപാലത്തിലേക്കു ജലഅഥോറിറ്റി മാറ്റി സ്‌ഥാപിക്കാത്തതും പണികൾക്കു തടസമായി. ചങ്ങനാശേരി – ചിങ്ങവനം പാതയുടെ ജോലികളാകട്ടെ അനന്തമായി നീളുകയാണ്. സ്‌ഥലമേറ്റെടുക്കൽ അടക്കം പൂർത്തീകരിക്കാനുണ്ട്.