നായ്ശല്യം രൂക്ഷം: ഭയന്നുവിറച്ച് സ്കൂൾ കുട്ടികൾ
Friday, August 26, 2016 10:38 AM IST
മൂന്നാർ: നായ്ശല്യം രൂക്ഷമായതോടെ സ്കൂൾ കുട്ടികളും നാട്ടുകാരും ഭീതിയിലായി. നായ്ക്കൾ നിയന്ത്രണമില്ലാതെ തെരുവിൽ അലഞ്ഞുനടക്കുന്നതുമൂലം കുട്ടികളെ സ്കൂളിലയയ്ക്കാൻപോലും രക്ഷിതാക്കൾ ഭയക്കുകയാണ്.

മൂന്നാർ ടൗണിൽ പട്ടാപ്പകൽ അലഞ്ഞുനടക്കുന്ന നായ്ക്കളാണ് പ്രശ്നം സൃഷ്‌ടിക്കുന്നത്. നായ്ക്കളുടെ ആക്രമണം മൂലമുണ്ടാകുന്ന വാർത്തകൾ പതിവായതോടെ ഭീതി വർധിച്ചിരിക്കുകയാണ്. മൂന്നാർ ടൗണിൽ മാലിന്യം പെരുകുന്നത് നായ്ശല്യം രൂക്ഷമാകുന്നതിന് കാരണമാണ്.

ശുചീകരണ തൊഴിലാളികളെ നായ്ശല്യം വലയ്ക്കുന്നുണ്ട്. രാത്രി മുഴുവൻ ടൗണിലൂടെ അലഞ്ഞുതിരിയുന്ന നായ്ക്കൾ അതിരാവിലെ ടൗൺ വൃത്തിയാക്കാനെത്തുന്ന തൊഴിലാളികൾക്കും പ്രശ്നം സൃഷ്‌ടിക്കുന്നുണ്ട്. പ്രഭാതസവാരിക്ക് ഇറങ്ങുന്ന നാട്ടുകാർക്കും നായ്ക്കൾ ശല്യമാണ്. രാത്രിയിൽ മൂന്നാർ ടൗണിൽ ആളൊഴിഞ്ഞ കെട്ടിടങ്ങളിലാണ് നായ്ക്കൾ അഭയം തേടുന്നത്. നായ്ക്കളുടെ ശല്യം ചൂണ്ടിക്കാട്ടി നാട്ടുകാർ പഞ്ചായത്തിൽ നിരവധിതവണ പരാതി നൽകിയെങ്കിലും നിയമങ്ങളുടെ സങ്കീർണത നടപടിയെടുക്കുന്നതിന് വിഘാതമാകുന്നുണ്ട്.