ഷൊർണൂർ മേഖലയിൽ നെൽകൃഷിയിൽ ഗണ്യമായ കുറവ്; കൃഷിഭൂമി തരിശിടുന്നു
Friday, August 26, 2016 10:39 AM IST
ഷൊർണൂർ: ഷൊർണൂരിലും പരിസരപ്രദേശങ്ങളിലും ഇത്തവണ നെൽകൃഷി ഇറക്കിയതിൽ ഗണ്യമായ കുറവ്. വാണിയംകുളം ഗ്രാമപഞ്ചായത്തിലും ഷൊർണൂർ നഗരസഭയിലുമാണ് നെൽകൃഷി കുറഞ്ഞത്.

മുൻകാലങ്ങളെ അപേക്ഷിച്ച് കൃഷിഭൂമി തരിശിട്ട കർഷകരുടെ എണ്ണം ഇക്കുറി കൂടി വന്നതാണ് മുഖ്യപ്രശ്നമായത്.

വാണിയംകുളം ഗ്രാമപഞ്ചായത്തിൽ മാത്രം അറുന്നൂറ് ഏക്കർ നെൽകൃഷിയുള്ളതിൽ നാല്പതേക്കറിൽ മാത്രമാണ് ഇത്തവണ കൃഷിയിറക്കിയത്. ഷൊർണൂർ നഗരസഭയിൽ നൂറേക്കറിൽ മാത്രമാണ് നെൽകൃഷിയുള്ളത്. ഭൂരിഭാഗം നെൽവയലുകളിലും കൃഷിയിറക്കാത്തതുമൂലം ഇത്തവണ ഒന്നാംവിള വൻതോതിൽ കുറയുമെന്ന കാര്യത്തിൽ ഒരു സംശയവുംവേണ്ട.

കഴിഞ്ഞതവണ ഉണ്ടായതിനേക്കാൾ കൂടുതൽ കർഷകർ കൃഷി ഉപേക്ഷിച്ച സ്‌ഥിതിയാണ് ഇത്തവണയുള്ളത്. കൃഷിഭവനുകളാണ് ഇതുസംബന്ധിച്ച് കണക്കുകൾ പുറത്തുവിട്ടത്. ഉത്പാദനചെലവു വർധിച്ചതാണ് നെൽകൃഷി ഉപേക്ഷിക്കാൻ കർഷകരെ പ്രേരിപ്പിച്ചത്. തൊഴിലാളിക്ഷാമവും മുഖ്യകാരണമാണ്. എന്നാൽ രണ്ടാംവിളയ്ക്ക് കർഷകർ വിത്തിറക്കുമെന്നാണ് സൂചന. രണ്ടാംവിളയും പിന്നീട് പുഞ്ചകൃഷിയും ചെയ്തിരുന്ന ജില്ലയുടെ പടിഞ്ഞാറൻ മേഖലയാണ് നെൽകൃഷിയിൽനിന്നും പിറകോട്ടുപോയത്. ഷൊർണൂർ മേഖലയിൽ കൃഷിഭൂമിയുടെ ഘടനയാണ് പ്രശ്നം. വെള്ളം ഒഴുകിപോകാൻ സംവിധാനമില്ലാത്തതിനാൽ കൃഷി നശിക്കുകയാണെന്ന് കർഷകർ പറയുന്നു. ഇതിനു പുറമേ പന്നിശല്യവും വ്യാപകമാണ്. ഇതു രണ്ടിനും പരിഹാരം കാണാൻ കർഷകർക്ക് ഇതുവരെ കഴിഞ്ഞിട്ടില്ല. കൃഷി സ്‌ഥലത്തിനു മുകളിലൂടെ വെള്ളം ഒഴുകിപോകുന്നതിനുള്ള ചാലുകൾ നിർമിച്ചെങ്കിലും ഇതു പോരെന്നാണ് കർഷകർ പറയുന്നത്.

കൃഷിഭവന്റെ ഇടപെടലുകൾമൂലം ചില സ്‌ഥലങ്ങളിലെ തരിശുഭൂമിയിൽ നെൽകൃഷി ചെയ്യാൻ കർഷകർ ശ്രമിക്കുന്നുണ്ട്.