ജർമൻ മാധ്യമപ്രവർത്തകനോട് വിശേഷങ്ങൾ പങ്കുവച്ച് കൗമാരങ്ങൾ
Friday, August 26, 2016 11:15 AM IST
കുറവിലങ്ങാട്: മാധ്യമപ്രവർത്തനത്തിന്റെ അനന്തസാധ്യതകളിലൂടെ പ്രശസ്തിയിലേയ്ക്കുയർന്ന ജർമൻ രാജകുടുംബാഗത്തെ നേരിൽക്കണ്ടപ്പോൾ കുട്ടികൾക്ക് കൗതുകവും ചോദിച്ചറിയാൻ വിശേഷങ്ങളും ഏറെയായിരുന്നു.

അനേകരുമായി അഭിമുഖം നടത്തി എക്സ്ക്ലൂസീവുകൾ സൃഷ്‌ടിച്ച് ശ്രദ്ധനേടിയ മാധ്യമപ്രവർത്തകൻ വിദ്യാർഥികളുടെ ചോദ്യങ്ങളിൽ അഭിമുഖത്തിന്റെ അനന്തസാധ്യതകളും തിരിച്ചറിഞ്ഞു. ജർമൻ മാധ്യമപ്രവർത്തകനും ബെസ്റ്റ് സെല്ലർ ബുക്കിനുള്ള അവാർഡു ജേതാവുമായ സർ അലക്സാണ്ടർ ഷോൺ ബെർഗ് നസ്രത്ത്ഹിൽ ഡി പോൾ സ്കൂൾ വിദ്യാർഥികൾക്കാണ് അറിവിന്റെ അക്ഷയഖനിയും അഭിമുഖത്തിന്റെ സാധ്യതകളും സംഭാഷണത്തിലൂടെ പകർന്നു നൽകിയത്. വിദേശമാധ്യമപ്രവർത്തനവും പ്രതിസന്ധികളും ചോദിച്ചറിഞ്ഞ വിദ്യാർഥികളോടായി എല്ലാവരെയും നാം ബഹുമാനിക്കണമെന്ന ഉപദേശവും ഷോൺ സമ്മാനിച്ചു.

ഡിപോൾ സ്കൂളിലെത്തിയ ഷോണിനെയും കുടുംബത്തെയും ബാന്റുമേളത്തോടെയാണ് വിദ്യാർഥികളും അധ്യാപകരും എതിരേറ്റത്. പ്രിൻസിപ്പൽ ഫാ. ജയ്മോൻ കുറുപ്പന്തറമുകളേൽ വിദേശകുടുംബത്തെ വിദ്യാർഥികൾക്ക് പരിചയപ്പെടുത്തി. പിന്നീട് ലളിതമായ വാക്കുകളിൽ ഷോൺ വിദ്യാർഥികളുമായി സംവദിച്ചു. ഹസ്തദാനം നടത്തിയും പുഞ്ചരിച്ചും വിദ്യാർഥികളുടെ മനം കവർന്നാണ് ഷോൺ മടങ്ങിയത്. വിദ്യാർഥി പ്രതിനിധി ഷെറിൻ ടോമി പ്രസംഗിച്ചു.