നഗരത്തിലെ ഓട്, ചെമ്പ് മൊത്ത വ്യാപാരസ്‌ഥാപനത്തിനു തീ പിടിച്ചു; കോടികളുടെ നഷ്‌ടം
Friday, August 26, 2016 11:15 AM IST
കോട്ടയം: നഗരത്തിൽ തിരുനക്കര പടിഞ്ഞാറേനട ഭാഗത്ത് ചിൽഡ്രൻസ് ലൈബ്രറിക്കുസമീപം ഓട്, ചെമ്പ് തുടങ്ങിയവയുടെ മൊത്ത വ്യാപാര സ്‌ഥാപനത്തിനു തീപിടിച്ചു കോടികളുടെ നഷ്ടം. ഇന്നലെ പുലർച്ചെ ഒരു മണിയോടെയുണ്ടായ തീപിടിത്തം രാവിലെ ആറോടെയാണ് നിയന്ത്രിക്കാനായത്. ഫയർഫോഴ്സിന്റെ ഏഴു യൂണിറ്റ് വളരെ പണിപ്പെട്ടാണു തീയണച്ചത്.

ചെമ്പ്, ഓട് എന്നിവയിൽ തീർത്ത വസ്തുക്കളുടെ മൊത്തവ്യാപാരസ്‌ഥാപനമായ അന്നപൂർണി എന്ന സ്‌ഥാപനമാണ് കത്തി നശിച്ചത്. തീപിടിത്തത്തിൽ കടയോടു ചേർന്നുള്ള അറയും നിരയുമുള്ള വീടും പൂർണമായും കത്തിനശിച്ചു. ചെമ്പു പാത്രങ്ങൾ, നിലവിളക്ക്, വിഗ്രഹങ്ങൾ, ട്രോഫി തുടങ്ങിയവും വർഷങ്ങൾ പഴക്കമുള്ള അമൂല്യ ശേഖരവും കത്തി നശിച്ചതിൽ ഉൾപ്പെടുന്നു.

പ്രാഥമിക നിഗമനത്തിൽ കടയ്ക്കു പുറത്തു നിന്നാണു തീപിടിത്തമുണ്ടായതെന്നാണ് കരുതുന്നതെന്ന് ഫയർഫോഴ്സ് ഉദ്യോഗസ്‌ഥർ പറഞ്ഞു. വേസ്റ്റുകൾ കൂട്ടിയിട്ടു കത്തിച്ചപ്പോൾ തീപടർന്നു പിടിച്ചതാകാമെന്നും കരുതുന്നു. എന്നാൽ ഇക്കാര്യത്തിൽ വ്യക്‌തത കൈവന്നിട്ടില്ല.

പുലർച്ചെ വഴിയാത്രക്കാരാണ് തീ പിടിത്ത വിവരം ഫയർഫോഴ്സിൽ അറിയിച്ചത്. കോട്ടയം കാരാപ്പുഴ പുത്തൻപറമ്പിൽ തങ്കേശ്വരന്റെ ഉടമസ്‌ഥതയിലുള്ള സ്‌ഥാപനമാണ്.ചെമ്പിനും ഓടിനും തീ പിടിച്ചതോടെ ഫയർഫോഴ്സ് ഉദ്യോഗസ്‌ഥർക്കു പോലും അടുക്കാനാകാത്ത സ്‌ഥിതിയായിരുന്നു.ഫയർഫോഴ്സിന്റെ കോട്ടയത്തെ നാലും ചങ്ങനാശേരിയിലെ രണ്ടും പാമ്പാടിയിലെ ഒരു യൂണിറ്റും അഞ്ചു മണിക്കൂറോളം പ്രയത്നിച്ചാണ് തീ നിയന്ത്രണവിധേയമാക്കിയത്. ജില്ലാ ഫയർഓഫീസർ അജി വി. കുര്യാക്കോസ് നേതൃത്വം നല്കി. ഷോർട്ട് സർക്യൂട്ടാണു തീ പിടിത്തത്തിനു കാരണമെന്നു സംശയിക്കുന്നതായി കട ഉടമകൾ പറഞ്ഞു