അർഹരായവർക്ക് ആനുകൂല്യം ഉറപ്പാക്കും: മന്ത്രി
കൊച്ചി: മത്സ്യത്തൊഴിലാളി ക്ഷേമനിധിയിൽ നിന്ന് അനർഹരെ ഒഴിവാക്കി അർഹതപ്പെട്ടവർക്ക് മാത്രം ആനുകൂല്യം ഉറപ്പാക്കുമെന്ന് ഫിഷറീസ് മന്ത്രി ജെ. മേഴ്സിക്കുട്ടിയമ്മ. കൊച്ചി ഫിഷറീസ് സമുച്ചയത്തിൽ നിർമാണം പൂർത്തീകരിച്ച ഫ്രണ്ട് ഓഫീസും സന്ദർശകമുറിയും ഉദ്ഘാടനം ചെയ്യുകയായിരുന്നു മന്ത്രി.

തൊഴിലാളി ക്ഷേമനിധിയിൽ മത്സ്യത്തൊഴിലാളികൾ അല്ലാത്തവർ നിരവധിയുണ്ട്. അനർഹരെ ഒഴിവാക്കി അർഹരായവർക്ക് ആനുകൂല്യം ഉറപ്പാക്കുന്നതിന് അദാലത്ത് സംഘടിപ്പിക്കുമെന്നും അവർ പറഞ്ഞു. വ്യാജ രേഖകളുമായി വരുന്നവരെ തിരിച്ചറിയുന്നതിന് വകുപ്പിന്റെ വിപുലമായ നെറ്റ്വർക്ക് ഉപയോഗപ്പെടുത്തും.

തൊഴിലാളി ക്ഷേമനിധിയിൽ ചേരുന്നതിന് സമയപരിധി നിശ്ചയിക്കുന്നത് ഒഴിവാക്കും. തൊഴിലാളികളിൽ നിന്ന് അപേക്ഷകൾ ഏതു സമയത്തും സ്വീകരിക്കാനും പിന്നീട് നിശ്ചിത സമയത്ത് ചേർത്താൽ മതിയെന്നും നിർദേശം നൽകിയിട്ടുണ്ട്.

ജനകീയ ബന്ധം കൂടുതൽ ശക്‌തമാക്കുക എന്ന ലക്ഷ്യത്തോടെയാണ് മൂന്നു ജോയിന്റ് ഡയറക്ടർ ഓഫീസുകളിലും ഫ്രണ്ട് ഓഫീസ് സംവിധാനം ഏർപ്പെടുത്തുന്നത്. മത്സ്യബന്ധന മേഖലയുമായി ബന്ധപ്പെട്ട് വിവിധ പരാതികളുമായി വരുന്നവർക്ക് കൃത്യമായ മാർഗനിർദേശങ്ങൾ ഫ്രണ്ട് ഓഫീസിൽ ലഭ്യമാകും.

പരാതിയുമായി വരുന്നവർക്ക് ആരെയാണ് സമീപിക്കേണ്ടതെന്നും ഇവിടെ നിന്ന് അറിയാം. നിയമം അനുശാസിക്കുന്ന തരത്തിൽ മത്സ്യബന്ധനം നടത്തുന്നതിന് മറൈൻ എൻഫോഴ്സ്മെന്റ് ശക്‌തമാക്കണം. തീരപ്രദേശങ്ങളിൽ എല്ലാവർക്കും വീട് ലഭ്യമാക്കുന്നതിന് നടപടി സ്വീകരിക്കുമെന്നും മന്ത്രി പറഞ്ഞു. കൊച്ചി മേയർ സൗമിനി മുഖ്യാതിഥിയായിരുന്നു.

ഫ്രണ്ട് ഓഫീസിന്റെയും സന്ദർശക മുറിയുടെയും താക്കോൽദാനം ഫിഷറീസ് ഡെപ്യൂട്ടി ഡയറക്ടർ എസ്. മഹേഷിന് നൽകിക്കൊണ്ട് മന്ത്രി നിർവഹിച്ചു. തീരദേശ വികസന കോർപ്പറേഷൻ ജനറൽ മാനേജർ എസ്. അജയൻ റിപ്പോർട്ട് അവതരിപ്പിച്ചു.

കോർപ്പറേഷൻ കൗൺസിലർമാരായ കെ.ജെ. ആന്റണി, ദീപക് ജോയ്, മത്സ്യത്തൊഴിലാളി യൂണിയൻ പ്രതിനിധികളായ കുമ്പളം രാജപ്പൻ, ചാൾസ് ജോർജ്, ഫിഷറീസ് ഡയറക്ടർ മിനി ആന്റണി, മത്സ്യബോർഡ് കമ്മീഷണർ കെ.എ. സൈറ ബാനു, അഡാക്ക് എക്സിക്യൂട്ടീവ് ഡയറക്ടർ യു.എസ്. സജീവ്, ഫിർമ എക്സിക്യൂട്ടീവ് ഡയറക്ടർ പി. സഹദേവൻ, സാഫ് എക്സിക്യൂട്ടീവ് ഡയറക്ടർ സി.ആർ. സത്യവതി, ജോയിന്റ് ഡയറക്ടർ എൻ.എസ്. ശ്രീലു, മത്സ്യഫെഡ് ജില്ലാ മാനേജർ സി.ഡി. ജോർജ്, മാനേജിംഗ് ഡയറക്ടർ ലോറൻസ്, മധ്യമേഖലാ ജോയിന്റ് ഡയറക്ടർ കെ.കെ. സതീഷ് കുമാർ തുടങ്ങിയവർ പങ്കെടുത്തു.