സ്വകാര്യ വാഹനങ്ങൾ അകത്ത്; ബസുകൾ പുറത്ത്
Friday, August 26, 2016 2:06 PM IST
ശ്രീകണ്ഠപുരം: ബസ്സ്റ്റാൻഡ് സ്വകാര്യ വാഹനങ്ങൾ കൈയടക്കിയതോടെ യാത്രക്കാരും ബസ് ജീവനക്കാരും നട്ടംതിരിയുന്നു. ഇരിക്കൂർ ബസ് സ്റ്റാൻഡിലാണ് യാതൊരു നിയന്ത്രണവുമില്ലാതെ സ്വകാര്യവാഹനങ്ങൾ നിർത്തിയിടുന്നത് പതിവായിരിക്കുന്നത്. ഒരേസമയം നാലും അഞ്ചും ബസുകൾ സ്റ്റാൻഡിൽ പ്രവേശിച്ചാൽ ഏറെനേരം ഗതാഗത തടസം നേരിടുന്ന അവസ്‌ഥയാണുള്ളത്. സ്വകാര്യ വാഹനങ്ങൾ നിർത്തിയിടുന്നത് കാരണം ബസുകൾക്ക് തിരിക്കുന്നതിനും പാർക്ക് ചെയ്യുന്നതിനും വലിയ ദുരിതമാണുള്ളത്.

ബസ് സ്റ്റാൻഡിന്റെ ഒരുഭാഗം ഓട്ടോറിക്ഷ സ്റ്റാൻഡാണ്. മറുഭാഗത്ത് ചെറുതും വലുതുമായ വാഹനങ്ങൾ നിർത്തിയിടുന്നതും പതിവാണ്. രാവിലെ മുതൽ രാത്രിവരെ തുടർച്ചയായി നിർത്തിയിടുന്ന വാഹനങ്ങളും ഇതിലുണ്ട്. അനധികൃത പാർക്കിംഗ് തടയണമെന്നാവശ്യപ്പെട്ട് ബസ് ജീവനക്കാരും യാത്രക്കാരും നിരവധി തവണ പോലീസിലും പഞ്ചായത്തിലും പരാതി നൽകിയിട്ടും യാതൊരു നടപടിയുമുണ്ടായിട്ടില്ലെന്ന് പറയുന്നു.