ഉദ്യോഗസ്‌ഥരുടെ അഭാവം ജില്ലയുടെ വികസനത്തിന് തടസമാകുന്നു: ജില്ലാ കളക്ടർ
Friday, August 26, 2016 2:07 PM IST
കാസർഗോഡ്: നിർവഹണ ഉദ്യോഗസ്‌ഥരുടെ അഭാവം ജില്ലയുടെ വികസനപ്രവർത്തനത്തിന് തടസം സൃഷ്‌ടിക്കുന്നെന്ന് ജില്ലാ കളക്ടർ കെ.ജീവൻ ബാബു പറഞ്ഞു. ഇതു ജില്ലയുടെ അടിസ്‌ഥാനസൗകര്യവികസനത്തിന് തടസമാകുന്നുണ്ട്. പ്രഭാകരൻ കമ്മീഷൻ പാക്കേജ് ഉൾപ്പെടെയുള്ള വികസനപദ്ധതികൾ നടപ്പാക്കണമെങ്കിൽ ആവശ്യത്തിന് ഉദ്യോഗസ്‌ഥരെ നിയമിക്കണം. ജില്ലയിലെ ആവശ്യത്തിന് നിർവഹണ ഏജൻസികൾ പോലുമില്ല. സിവിൽ സ്റ്റേഷനിലെ പഞ്ചിംഗ് സംവിധാനം കാര്യക്ഷമമാക്കാൻ നടപടി സ്വീകരിക്കും. അനധികൃത മണൽ കടത്ത് തടയാൻ ശക്‌തമായ നടപടികൾ സ്വീകരിച്ചിട്ടുണ്ട്. ഇതു ഫലപ്രദമാകണമെങ്കിൽ മണൽ ലഭ്യതയുള്ള രണ്ടു പുഴകളിൽ മണലെടുക്കാൻ നടപടി സ്വീകരിക്കണം. ഇതിനു നടപടി സ്വീകരിച്ചുവരികയാണ്. എൻഡോസൾഫാൻ പുനരധിവാസഗ്രാമം ഉൾപ്പെടെയുള്ള പദ്ധതികൾ പൂർത്തീകരിക്കാൻ മുന്തിയ പരിഗണന നൽകണം. എൻഡോസൾഫാൻ സെൽ നിലവിലുണ്ടായിരുന്നപ്പോൾ ദുരിതബാധിതരുടെ പ്രശ്്നങ്ങൾക്ക് ഒരു പരിധിവരെ പരിഹാരം കാണാൻ സാധിച്ചിരുന്നു. ഇപ്പോൾ സെല്ലിന്റെ പ്രവർത്തനം നിർജീവമാണ്. ഇതു പുനഃസംഘടിപ്പിക്കാൻ സർക്കാർ തലത്തിൽ സമ്മർദം ചെലുത്തും. ദുരിതബാധിതർക്കുള്ള മെഡിക്കൽ ക്യാമ്പ് ആരംഭിക്കാനും നടപടി സ്വീകരിക്കും. ജില്ലയിലെ ഭൂരഹിതരായ ആളുകൾക്ക് ഭൂമി അനുവദിക്കുന്നതിന് 34,000ത്തോളം അപേക്ഷകൾ ലഭിച്ചിരുന്നു. ഇതിൽ 16,149 പേർക്ക് മൂന്നുസെന്റ് വീതം ഭൂമി അനുവദിച്ചിട്ടുണ്ട്. അപേക്ഷ നൽകിയവർക്ക് അതതു വില്ലേജുകളിൽ ഭൂമിയില്ലാത്ത സാഹചര്യത്തിൽ തൊട്ടടുത്ത വില്ലേജുകളിലാണ് ഭൂമി അനുവദിച്ചത്. എല്ലാവരും ഭൂമി സ്വീകരിച്ചുകഴിഞ്ഞാൽ തീർത്തും വാസയോഗ്യമില്ലാത്ത ഭൂമി മാറ്റി നൽകാൻ നടപടി സ്വീകരിക്കുമെന്നും അദ്ദേഹം പറഞ്ഞു.