ബൈക്കുകൾ കൂട്ടിയിടിച്ച് യുവാവ് മരിച്ചു; മൂന്നുപേർക്ക് പരിക്ക്
Friday, August 26, 2016 4:21 PM IST
കുണ്ടറ: കുണ്ടറയ്ക്കുസമീപം തൊണ്ടിറക്ക് മുക്കിൽ ബൈക്കുകൾ കൂട്ടിയിടിച്ച് ഒരാൾ മരിച്ചു. ബൈക്ക് യാത്രക്കാരായ രണ്ട് പേർക്കും വീടിന് സമീപം ബസ് കാത്തുനിന്ന വിദ്യാർഥിക്കും പരിക്കേറ്റു. കൊല്ലം തേനി ദേശീയപാതയിൽ ഇന്നലെ രാവിലെ 9.30ന് ആയിരുന്നു അപകടം. നീരാവിൽ പ്ലാന്തോട്ടത്ത് കിഴക്കതിൽ ഭാസ്കരൻ പിള്ളയുടെ മകൻ മഹേഷ് (22) ആണ് മരിച്ചത്.

ബസ് കാത്തുനിന്ന കൊട്ടാരക്കര എൻഎസ്എസ് കോളജ് വിദ്യാർഥി തൊണ്ടിറക്കുമുക്ക് ഗുരുകൃപയിൽ ഉണ്ണിക്കണ്ണൻ (18), സ്കൂട്ടർ യാത്രക്കാരായ കൈതാകോടി ബിജോയ് ഭവനിൽ ബിജോയ് (22), പാലക്കട ജയന്തി കോളനിയിൽ വിഷ്ണു (22) എന്നിവർക്കാണ് പരിക്കേറ്റത്. ബിജോയിയും വിഷ്ണുവും യാത്രചെയ്തിരുന്ന ബൈക്കും മഹേഷിന്റെ ബൈക്കും കൂട്ടിയിടിച്ചാണ് അപകടമുണ്ടായത്. ഇടിക്കുശേഷം മഹേഷിന്റെ ബൈക്ക് നിയന്ത്രണംവിട്ട് ബസ് കാത്ത് നിൽക്കുകയായിരുന്ന ഉണ്ണിക്കണ്ണന്റെ പുറത്തേക്ക് മറിയുകയായിരുന്നു.

മഹേഷിനെയും പരിക്കേറ്റ മൂന്ന്പേരെയും നാട്ടുകാർ കൊല്ലത്തെ സ്വകാര്യ ആശുപത്രിയിലെത്തിച്ചു. ഉണ്ണിക്കണ്ണന്റെ തലയ്ക്കു പരിക്കും കാലിന് ഒടിവുമുണ്ട്. തലയ്ക്ക് പരിക്കേറ്റ വിഷ്ണുവിന്റെ നില ഗുരുതരമാണ്. അഞ്ചാലുംമൂട്ടിലെ തുണിക്കടയിൽ സെയിൽസ്മാനായി ജോലിചെയ്തുവരികയായിരുന്നു മഹേഷ്. സുഹൃത്തിന്റെ വിവാഹത്തിൽ പങ്കെടുക്കാൻ വ്യാഴാഴ്ച മുളവനയിലേക്ക് പോയിരുന്നു. തിരിച്ചുവരുന്നവഴിയായിരുന്നു അപകടം. അമ്മ: മിനി. സഹോദരി മനിഷ. മഹേഷിന്റെ സംസ്കാരം ഇന്ന് വീട്ടുവളപ്പിൽ നടക്കും.