ലോറി ഡ്രൈവറെ കൊലപ്പെടുത്തിയകേസിലെ പ്രതി പോലീസ് പിടിയിൽ
പുനലൂർ: വാഴത്തോപ്പിൽ ലോറി ഡ്രൈവറെ കുത്തി കൊലപ്പെടുത്തിയ കേസിൽ പ്രതി അറസ്റ്റിൽ. കടയ്ക്കാമൺ അംബേദ്ക്കർ കോളനിയിലെ ആനക്കാരൻ ഗോപി എന്ന ഗോപി (68) ആണ് അറസ്റ്റിലായത്.

കഴിഞ്ഞ 15ന് രാത്രി വാഴത്തോപ്പ് ഫോറസ്റ്റ് ഡിപ്പോയ്ക്ക് മുന്നിൽ ലോറിയിൽ കിടന്നുറങ്ങുകയായിരുന്ന സാജൻ എസ്. പിള്ളയെ ഇയാൾ കുത്തി കൊലപ്പെടുത്തുകയായിരുന്നു. മോഷണശ്രമത്തിനിടെ ഇയാളെ കത്തികൊണ്ട് കുത്തി കൊലപ്പെടുത്തുകയായിരുന്നുവെന്ന് എഎസ്പി കാർത്തികേയൻ ഗോകുൽ ചന്ദ്രൻ അറിയിച്ചു. ആനപാപ്പാനായി ഇയാൾ വിവിധ സ്‌ഥലങ്ങളിൽ ജോലി ചെയ്തിട്ടുണ്ട്. കഴിഞ്ഞ കുറേക്കാലമായി ജോലിയില്ലാതെ ഇയാൾ പല ഭാഗങ്ങളിലായി താമസിച്ചുവരികയായിരുന്നു. വീട്ടിൽ നിന്നും പിണങ്ങി മാറി ഇയാൾ വാഴത്തോപ്പ് ഡിപ്പോയുടെ ഭാഗങ്ങളിലും കടയ്ക്കാമണ്ണിലും മറ്റും താമസിച്ചിരുന്നു.

മുമ്പ് കൂപ്പിൽ ജോലി ചെയ്തിരുന്ന സമയത്ത് ഒരാളെ കൊലപ്പെടുത്തിയ കേസിൽ പ്രതിയാണ് അറസ്റ്റിലായ ഗോപി. കേസുൽ ഇയാൾ ജയിൽ ശിക്ഷയും അനുഭവിച്ചിട്ടുണ്ട്. പോലീസ് സംഘം നടത്തിയ ശക്‌തമായ അന്വേഷണമാണ് കേസിൽ വഴിത്തിരിവായത്. മൊബൈൽ ഫോണുകൾ കേന്ദ്രീകരിച്ച് നടത്തിയ അന്വേഷണങ്ങളും നിരവധിയാളുകളെ ചോദ്യം ചെയ്തതുമെല്ലാം അന്വേഷണത്തിന് സഹായകമായി. എഴുപതോളം പേരെയാണ് പോലീസ് കേസന്വേഷണവുമായി ബന്ധപ്പെട്ട് ചോദ്യം ചെയ്തത്. കൊലചെയ്യപ്പെട്ടയാളിന്റെ കുടുംബപശ്ചാത്തലങ്ങളും ജീവിത രീതികളുമെല്ലാം പോലീസ് വിദഗ്ധമായി മനസിലാക്കുകയും ചെയ്തിരുന്നു. സിഐമാരായ അഭിലാഷ്, സാനി, നന്ദകുമാർ എന്നിവരും കേസന്വേഷണത്തിന് നേതൃത്വം നൽകി.