പുറ്റിംഗൽ: ജുഡീഷൽ കമ്മീഷൻ ഇന്ന് പരവൂർ സന്ദർശിക്കും
എസ്.ആർ.സുധീർ കുമാർ

കൊല്ലം: പരവൂർ പുറ്റിംഗൽ വെടിക്കെട്ട് ദുരന്തം അന്വേഷിക്കാൻ സംസ്‌ഥാന സർക്കാർ നിയമിച്ച പുതിയ ജുഡീഷൽ കമ്മീഷൻ ഇന്ന് പരവൂർ സന്ദർശിക്കും.

ജസ്റ്റിസ് പി.എസ്.ഗോപിനാഥൻ കമ്മീഷൻ വൈകുന്നേരം നാലോടെ ക്ഷേത്രത്തിലും പരിസര പ്രദേശങ്ങളിലും സന്ദർശനത്തിന് എത്തുമെന്നാണ് വിവരം. കമ്മീഷൻ പ്രവർത്തനം ആരംഭിക്കുന്നതിന് മുന്നോടിയായാണ് സന്ദർശനം.

ക്ഷേത്ര കമ്മിറ്റി ഭാരവാഹികളുമായോ പരിസരവാസികളുമായോ കമ്മീഷൻ ആശയ വിനിമയം നടത്തുമോ എന്ന കാര്യം വ്യക്‌തമല്ല. ദുരന്തം നടന്ന് കൃത്യം ഒരു വർഷവും പത്ത് ദിവസവും പിന്നിടുമ്പോഴാണ് കമ്മീഷൻ പരവൂരിൽ എത്തുന്നത് എന്നൊരു പ്രത്യേകത കൂടിയുണ്ട്.

കഴിഞ്ഞ വർഷം ഏപ്രിൽ പത്തിനാണ് രാജ്യത്തെ നടുക്കിയ 110 പേരുടെ മരണത്തിന് ഇടയാക്കിയ വെടിക്കെട്ട് അപകടം നടന്നത്. അന്ന് ദുരന്തത്തെ കുറിച്ച് അന്വേഷിക്കാൻ സംസ്‌ഥാന സർക്കാർ ഒരു ജുഡീഷൽ കമ്മീഷനെ നിയോഗിച്ചിരുന്നു. റിട്ട. ജസ്റ്റിസ് എൻ.കൃഷ്ണൻ നായരെയാണ് അന്ന് അന്വേഷണ കമ്മീഷനായി നിയമിച്ചത്.

എന്നാൽ കമ്മീഷന്റെ പ്രവർത്തനത്തിനുള്ള ഒരു അടിസ്‌ഥാന സൗകര്യവും സർക്കാർ ഏർപ്പാടാക്കിയിരുന്നില്ല. ഇതിനെ തുടർന്ന് കൃഷ്ണൻ നായർ കമ്പീഷൻ സർക്കാരിനെ രാജി അറിയിച്ചു.

ഇത് സംസ്‌ഥാനത്ത് വൻ വിവാദത്തിന് തിരി കൊളുത്തിയതോടെ കമ്മീഷന്റെ കാലാവധി നീട്ടിക്കൊടുക്കാമെന്ന് സർക്കാർ പ്രഖ്യാപിച്ചെങ്കിലും ജസ്റ്റിസ് കൃഷ്ണൻ നായർ അതിന് വഴങ്ങിയില്ല.

ഒടുവിൽ സർക്കാർ അദ്ദേഹത്തിന്റെ രാജി സ്വീകരിക്കുകയായിരുന്നു. ഇത് ഇപ്പോഴത്തെ ഇടത് സർക്കാരിനെ സംബന്ധിച്ചിടത്തോളം വലിയ നാണക്കേടാകുകയും ചെയ്തു.

ഇതേ തുടർന്നാണ് ജസ്റ്റിസ് പി.എസ്.ഗോപിനാഥനെ കമ്മീഷനായി നിയമിച്ചത്. ഈ കമ്മീഷന്റെ പ്രവർത്തനം എറണാകുളത്തെ ജിസിഡിഎ കോംപ്ലക്സിൽ ആരംഭിച്ച് കഴിഞ്ഞു.

എറണാകുളം കേന്ദ്രീകരിച്ചായിരിക്കും കമ്മീഷൻ പ്രവർത്തിക്കുക. ഓഫീസ് പ്രവർത്തനം എറണാകുളത്ത് ആണങ്കിലും ക്യാമ്പ് ഓഫീസ് പരവൂരിൽ ഉണ്ടാകുമെന്നാണ് വിവരം. ക്യാമ്പ് സിറ്റിംഗ് പരവൂരിലും കൊല്ലത്തുമായി നടക്കും.

കമ്മീഷന്റെ ടേംസ് ഒഫ് റഫറൻസ് നിശ്ചയിച്ച് കഴിഞ്ഞു. സെക്രട്ടറിയെയും സർക്കാർ നിയോഗിച്ചു. കമ്മീഷന്റെ പ്രവർത്തനം സുഗമമായും അടിയന്തിരമായും പൂർത്തീകരിക്കുന്നതിനും ഒരു അഭിഭാഷകന്റെ സേവനം കൂടി സർക്കാർ ലഭ്യമാക്കും. അതേ സമയം വെടിക്കെട്ട് ദുരന്തം അന്വേഷിച്ച െരകെംബ്രാഞ്ച് സംഘത്തിന് ഇപ്പോഴും കുറ്റപത്രം കോടതിയിൽ സമർപ്പിക്കാൻ കഴിഞ്ഞിട്ടില്ല.

ഹൈക്കോടതിയുടെ ഇടപെടലിനെ തുടർന്ന് ചില കാര്യങ്ങളിൽ കൂടുതൽ വ്യക്‌തത വരുത്തുന്നതിന് അടുത്തിടെയും കുറെ പേരിൽ നിന്ന് മൊഴിയെടുക്കുകയുണ്ടായി. ഇത് സംബന്ധിച്ച് സംസ്‌ഥാന പോലീസ് മേധാവി ഹൈക്കോടതിയിൽ റിപ്പോർട്ട് നൽകിയ ശേഷമായിരിക്കും കുറ്റപത്രം സമർപ്പിക്കുക.

െരകെംബ്രാഞ്ച് സംഘം കേസിൽ പോലീസ്, റവന്യൂ ഉദ്യോഗസ്‌ഥരെ പ്രതിചേർത്തിട്ടില്ല. അതേ സമയം കേന്ദ്ര സർക്കാർ നിയോഗിച്ച എ.കെ. യാദവ് കമ്മീഷൻ ഉദ്യോഗസ്‌ഥ വീഴ്ച ചൂണ്ടിക്കാണിച്ചിട്ടുണ്ട്. ഇപ്പോഴത്തെ ജുഡീഷൽ കമ്മീഷനും ഈ നിഗമനത്തിൽ എത്തിയാൽ സർക്കാരും െരകെം ബ്രാഞ്ചും വെട്ടിലാകും.

കേസിൽ പാരിപ്പള്ളി ആർ.രവീന്ദ്രനെ സംസ്‌ഥാന സർക്കാർ സ്പെഷൽ പബ്ലിക് പ്രോസിക്യൂട്ടറായി നിയമിച്ചിട്ടുണ്ട്. കേസിന്റെ വേഗത്തിലുള്ള വിചാരണയ്ക്ക് പ്രത്യേക കോടതി വേണമെന്ന് പ്രോസിക്യൂട്ടറും െരകെംബ്രാഞ്ച് ഉദ്യോഗസ്‌ഥരും സർക്കാരിനോട് ആവശ്യപ്പെട്ടിട്ടുണ്ട്.

ഈ ആവശ്യം ഇപ്പോൾ ഹൈക്കോടതിയുടെ പരിഗണനയിലാണ്. അതേ സമയം പ്രത്യേക കോടതി പരവൂരിൽ തന്നെ വേണമെന്ന ആവശ്യവും ശക്‌തമായിട്ടുണ്ട്.