യുഎസിന്‍റെ അധികനികുതി കയറ്റുമതിയെ തളര്‍ത്തും: ഡോ. കെ.എന്‍. രാഘവന്‍
Thursday, June 26, 2025 11:49 PM IST
കൊച്ചി: അമേരിക്ക ഇപ്പോള്‍ ചുമത്തിയിരിക്കുന്ന അധിക നികുതി കയറ്റുമതിക്കാര്‍ക്ക് കനത്ത നഷ്‌ടമുണ്ടാക്കുന്നുണ്ടെന്ന് സീഫുഡ് എക്‌സ്‌പോര്‍ട്ടേഴ്‌സ് അസോസിയേഷന്‍ ഓഫ് ഇന്ത്യ സെക്രട്ടറി ജനറല്‍ ഡോ. കെ.എന്‍. രാഘവന്‍.
ബ്യൂറോ ഓഫ് എനര്‍ജി എഫിഷ്യന്‍സിയും എനര്‍ജി മാനേജ്‌മെന്‍റ് സെന്‍ററും സംയുക്തമായി സംഘടിപ്പിച്ച ശില്പശാലയില്‍ മുഖ്യപ്രഭാഷണം നടത്തുകയായിരുന്നു അദ്ദേഹം.
മത്സ്യോത്പന്ന കയറ്റുമതി മേഖല കടുത്ത വെല്ലുവിളികളിലൂടെയാണ് കടന്നുപോകുന്നത്. കേരളത്തിലെ മത്സ്യോത്പന്നങ്ങളുടെ പ്രഥമ വിപണി അമേരിക്കയാണ്. ഇപ്പോള്‍ അമേരിക്ക ചുമത്തിയിരിക്കുന്ന അധിക നികുതി ഈ വ്യവസായത്തെ ആകെ തളര്‍ത്തിയിരിക്കുകയാണ്. കയറ്റുമതിയിലെ പ്രതിബന്ധങ്ങള്‍ തരണം ചെയ്യാന്‍ ഊര്‍ജ സംരക്ഷണ പദ്ധതികളിലൂടെ കഴിയുമെന്നും കെ.എന്‍. രാഘവന്‍ പറഞ്ഞു.
കേരള എനര്‍ജി മാനേജ്‌മെന്‍റ് സെന്‍റര്‍ ഡയറക്ടര്‍ ഡോ. ആര്‍. ഹരികുമാര്‍, കേരള ഇഎംസിഎന്‍എംഇഇ മേധാവി ജോണ്‍സണ്‍ ഡാനിയേല്‍, ബ്യൂറോ ഓഫ് എനര്‍ജി എഫിഷ്യന്‍സി ജോയിന്‍റ് ഡയറക്ടര്‍ രവിശങ്കര്‍ പ്രജാപതി, എംപിഇഡിഎ ഡയറക്ടര്‍ ഡോ. എം.കെ. രാംമോഹന്‍, സീ ഫുഡ് എക്‌സ്‌പോര്‍ട്ടേഴ്‌സ് അസോസിയേഷന്‍ ഓഫ് ഇന്ത്യ കേരള അധ്യക്ഷന്‍ പ്രേമചന്ദ്ര ഭട്ട്, ഫിക്കി കേരള സ്റ്റേറ്റ് കൗണ്‍സില്‍ മേധാവി സാവിയോ മാത്യു എന്നിവര്‍ പ്രസംഗിച്ചു.