സ്വര്‍ണവ്യാപാരികളുടെ സംസ്ഥാന സമ്മേളനവും ആഭരണ പ്രദര്‍ശനവും നാളെമുതല്‍
Wednesday, June 25, 2025 10:59 PM IST
കൊച്ചി: ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍ (എകെജിഎസ്എംഎ) സംസ്ഥാന സമ്മേളനം നാളെ മുതൽ 29 വരെ അങ്കമാലി അഡ്‌ലക്‌സ് ഇന്‍റര്‍നാഷണല്‍ കണ്‍വന്‍ഷന്‍ സെന്‍ററില്‍ നടക്കും.
നാളെ രാവിലെ പത്തിന് അസോസിയേഷന്‍ സംസ്ഥാന ഭാരവാഹികളും ജെം ആന്‍ഡ് ജ്വല്ലറി കൗണ്‍സില്‍ ഓഫ് ഇന്ത്യ ചെയര്‍മാന്‍ പ്രമോദ് ദേരാവാല, ഓള്‍ ഇന്ത്യ ജെം ആന്‍ഡ് ജ്വല്ലറി ഡൊമസ്റ്റിക് കൗണ്‍സില്‍ ചെയര്‍മാന്‍ രാജേഷ് റോക്ക്‌ടെ, ടി.എസ്. കല്യാണരാമന്‍, എം.പി. അഹമ്മദ്, ജോയ് ആലുക്കാസ്, ജോസ് ആലുക്കാസ് തുടങ്ങി പ്രമുഖരായ 300ഓളം സ്വര്‍ണവ്യാപാരികളും ചേര്‍ന്ന് റിമോട്ട് ബട്ടണ്‍ അമര്‍ത്തി പ്രദര്‍ശനം ഉദ്ഘാടനം ചെയ്യുമെന്ന് ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍ (എകെജിഎസ്എംഎ) സംസ്ഥാന പ്രസിഡന്‍റ് കെ. സുരേന്ദ്രന്‍, ജനറല്‍ സെക്രട്ടറി അഡ്വ. എസ്. അബ്‌ദുൾ നാസര്‍ എന്നിവര്‍ പത്രസമ്മേളനത്തില്‍ അറിയിച്ചു.
ഉച്ചകഴിഞ്ഞു 2.30ന് ജിഎസ്ടി, ബിഐഎസ്, ലീഗല്‍ മെട്രോളജി, പോലീസ് റിക്കവറി തുടങ്ങി സ്വര്‍ണവ്യാപാരികള്‍ ദിനംപ്രതി അഭിമുഖീകരിക്കുന്ന വിവിധ വിഷയങ്ങളെ അധികരിച്ച് പാനല്‍ ചർച്ച. നാലിന് അവധി വ്യാപാരത്തെ സംബന്ധിച്ച് സെമിനാർ. 28ന് രാവിലെ 10.30ന് ധനമന്ത്രി കെ.എന്‍. ബാലഗോപാല്‍ പ്രദർശനം ഉദ്ഘാടനം ചെയ്യും.
11ന് സ്വര്‍ണ മെറ്റല്‍ ലോണിനെ സംബന്ധിച്ച് ബാങ്കുകളുടെ പാനല്‍ ചര്‍ച്ച. ഉച്ചകഴിഞ്ഞു 2.30ന് കേരളം സമ്പൂര്‍ണ ഹാള്‍മാര്‍ക്കിംഗ് സംസ്ഥാനമായതിന്‍റെ പ്രഖ്യാപനം മന്ത്രി ജി.ആര്‍. അനില്‍ നിര്‍വഹിക്കും.
രാത്രിയിൽ അവാര്‍ഡ് നിശയും അനൂപ് ശങ്കറിന്‍റെ മ്യൂസിക്കല്‍ ഇവന്‍റും. കേരളത്തിലെ സ്വര്‍ണാഭരണ വ്യാപാര വ്യവസായ മേഖലകളില്‍ നിസ്തുല സംഭാവനകള്‍ നല്‍കിയവരെ ചടങ്ങില്‍ ആദരിക്കും.
29ന് രാവിലെ 11 ന് സമ്പൂര്‍ണ സംസ്ഥാന സമ്മേളനം മന്ത്രി പി. രാജീവ് ഉദ്ഘാടനം ചെയ്യും. സംസ്ഥാന പ്രസിഡന്‍റ് കെ. സുരേന്ദ്രന്‍ അധ്യക്ഷത വഹിക്കും. ബെന്നി ബെഹനാന്‍ എംപി, റോജി ജോണ്‍ എംഎല്‍എ എന്നിവർ മുഖ്യാതിഥികളായിരിക്കും.
സമ്മേളനത്തോടനുബന്ധിച്ച് 27, 28, 29 തീയതികളില്‍ കേരള ജ്വല്ലറി ഇന്‍റര്‍നാഷണല്‍ ഫെയര്‍ 2025 എന്നപേരില്‍ ആഭരണ പ്രദര്‍ശനവും സംഘടിപ്പിച്ചിട്ടുണ്ട്. ആഭരണ പ്രദര്‍ശനത്തിന്‍റെയും സമ്മേളനത്തിന്‍റെയും ഒരുക്കങ്ങള്‍ പൂര്‍ത്തിയായതായി എകെജിഎസ്എംഎ ജനറല്‍ സെക്രട്ടറി അഡ്വ. എസ്. അബ്‌ദുൾ നാസര്‍ പറഞ്ഞു.