സ്ലീപ്പര്‍ ബസ് വൈദ്യുതി പോസ്റ്റിലിടിച്ചു മറിഞ്ഞു; യുവാവ് മരിച്ചു : Deepika.com Kerala News |

Click here for detailed news of all items

സ്ലീപ്പര്‍ ബസ് വൈദ്യുതി പോസ്റ്റിലിടിച്ചു മറിഞ്ഞു; യുവാവ് മരിച്ചു

Sunday, April 28, 2024 1:38 AM IST

കോഴിക്കോട്: തിരുവനന്തപുരത്തുനിന്ന് ഉടുപ്പിയിലേക്കു പോയ കര്‍ണാടക സ്ലീപ്പര്‍ ബസ് താഴ്ചയിലേക്കു മറിഞ്ഞ് ഒരാള്‍ മരിച്ചു. 18 പേര്‍ക്ക് പരിക്കേറ്റു. കൊല്ലം കൊട്ടുക്കല്‍ ആലംകോട് മനു ഭവനില്‍ മോഹന്‍ദാസിന്‍റെ മകന്‍ അമല്‍ (28) ആണ് മരിച്ചത്.

കടലുണ്ടി മണ്ണൂര്‍ പഴയ ബാങ്കിന് സമീപം ഇന്നലെ പുലര്‍ച്ചെ രണ്ടരയോടെയാണ് കെഎ 51 എഎച്ച് 4819 എസി സ്ലീപ്പര്‍ കോഹിനൂര്‍ ബസ് അപകടത്തില്‍പ്പെട്ടത്.

ബസ് ഇലക്‌ട്രിക് പോസ്റ്റിലിടിച്ച് തലകീഴായി മറിയുകയായിരുന്നു. ഡ്രൈവര്‍ ഉറങ്ങിപ്പോയതാണ് അപകടകാരണമെന്നാണ് അറിയുന്നത്. അമല്‍ ബസിനടിയില്‍പ്പെട്ടു പോകുകയായിരുന്നു. കൈ മുഴുവനും ബസിന് പുറത്തും ശരീരം ബസിനടിയിലുമായിരുന്നു.

ബസിന്‍റെ മുന്‍ഭാഗം വെട്ടിപ്പൊളിച്ചാണ് അമലിനെ പുറത്തെടുത്തത്. മെഡിക്കല്‍ കോളജില്‍ എത്തിക്കാന്‍ ശ്രമിച്ചുവെങ്കിലും വഴിമധ്യേമരിച്ചു. പരിക്കേറ്റ രണ്ട് കര്‍ണാടക സ്വദേശികളുള്‍പ്പെടെയുള്ളവരെ കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റി.

ബസില്‍ 27 യാത്രക്കാരും മൂന്നു ജീവനക്കാരുമാണ് ഉണ്ടായിരുന്നത്. പോലീസും മീഞ്ചന്ത അഗ്‌നിരക്ഷാ സേനയും ചേര്‍ന്നാണ് രക്ഷാപ്രവര്‍ത്തനം നടത്തിയത്. പരിക്കേറ്റവര്‍ സുഖം പ്രാപിച്ചുവരുന്നതായി ആശുപത്രി അധികൃതര്‍ അറിയിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.