22

കൊച്ചി: താരസംഘടനയായ 'അമ്മ'യില്‍ എക്‌സിക്യൂട്ടീവ് കമ്മിറ്റി കൂട്ടരാജി വച്ചതിനെ തുടര്‍ന്നുണ്ടായ പ്രതിസന്ധി കൂടുതല്‍ രൂക്ഷമാകുന്നു. മുന്‍ പ്രസിഡന്‍റ് ശ്വേത മേനോന്‍ ഉന്നയിച്ച ഗുരുതര ആരോപണങ്ങള്‍ക്ക് പിന്നാലെ സംഘടനയ്ക്കുള്ളില്‍ ആരോപണ - പ്രത്യാരോപണങ്ങള്‍ ശക്തമായിരിക്കുകയാണ്.

വിഷയത്തില്‍ കൂടുതല്‍ വെളിപ്പെടുത്തലുകളുമായി ശ്വേതാ മേനോന്‍ ഇന്ന് മാധ്യമങ്ങള്‍ക്ക് മുന്നിലെത്തിയേക്കും. സംഘടനയിലെ ചില കുറ്റാരോപിതര്‍ അമ്മയുടെ നിയന്ത്രണം പിടിച്ചെടുക്കാന്‍ ഗൂഢാലോചന നടത്തി എന്നായിരുന്നു ശ്വേത മേനോന്‍ കഴിഞ്ഞ ദിവസം ആരോപിച്ചത്. തനിക്കെതിരെ പ്രവര്‍ത്തിച്ചവരുടെ പേരുകള്‍ പിന്നീട് വെളിപ്പെടുത്തുമെന്നും അവര്‍ വ്യക്തമാക്കിയിരുന്നു.

ഇതുമായി ബന്ധപ്പെട്ട കൂടുതല്‍ വിവരങ്ങള്‍ ഇന്ന് പുറത്തുവിടാന്‍ ഇടയുണ്ടെന്നാണ് വിലയിരുത്തല്‍. ഇതിനിടെ നടി ലക്ഷ്മിപ്രിയ അമ്മയുടെ പ്രാഥമികാംഗത്വത്തില്‍ നിന്ന് രാജിവച്ചു. സംഘടനയുടെ വാട്സ്ആപ്പ് ഗ്രൂപ്പിലൂടെയാണ് അവര്‍ രാജിക്കാര്യം അറിയിച്ചത്.

അമ്മയുടെ ചരിത്രത്തിലെ ഏറ്റവും വലിയ പ്രതിസന്ധികളിലൊന്നാണ് ഇപ്പോള്‍ സംഘടന നേരിടുന്നത്. നടിയെ ആക്രമിച്ച കേസും ഹേമ കമ്മിറ്റി റിപ്പോര്‍ട്ടും ഉള്‍പ്പെടെ നിരവധി വിവാദങ്ങള്‍ക്കു ശേഷം വനിതാ നേതൃത്വത്തിലുള്ള പുതിയ ഭരണസമിതി അധികാരത്തിലെത്തിയെങ്കിലും ഒരു വര്‍ഷം പൂര്‍ത്തിയാകുന്നതിന് മുമ്പ് തന്നെ കൂട്ടരാജിയിലേക്ക് കാര്യങ്ങള്‍ എത്തുകയായിരുന്നു.

രാജിക്ക് ശേഷം സംഘടനയുടെ പ്രവര്‍ത്തനങ്ങള്‍ മുന്നോട്ടു കൊണ്ടുപോകാന്‍ രമേഷ് പിഷാരടി എംഎല്‍എയുടെ നേതൃത്വത്തില്‍ അഡ്ഹോക്ക് കമ്മിറ്റി രൂപീകരിച്ചിട്ടുണ്ട്. അംഗങ്ങളുമായി ചര്‍ച്ച നടത്തി സംഘടനയുടെ പ്രവര്‍ത്തനങ്ങള്‍ മുന്നോട്ട് കൊണ്ടുപോകുമെന്നാണ് കമ്മിറ്റി നിലപാട്.

അതേസമയം, മുന്‍ ഭരണസമിതിക്കെതിരെ സാമ്പത്തിക കാര്യങ്ങളിലെ സുതാര്യതക്കുറവും ഓഡിറ്റുമായി ബന്ധപ്പെട്ട പ്രശ്‌നങ്ങളും ഉള്‍പ്പെടെയുള്ള വിമര്‍ശനങ്ങള്‍ ഉയരുന്നുണ്ട്. സംഘടനയുടെ രജിസ്‌ട്രേഷനും മറ്റ് ഭരണപരമായ നടപടികളും സമയബന്ധിതമായി പൂര്‍ത്തിയാക്കേണ്ടതുണ്ടെന്ന ആവശ്യവും ശക്തമാണ്.

അഡ്ഹോക്ക് കമ്മിറ്റിയുടെ കാലാവധി കഴിഞ്ഞാല്‍ പുതിയ സ്ഥിരം ഭരണസമിതി രൂപീകരിക്കേണ്ടി വരും. ഭാവിയില്‍ ആരാകും സംഘടനയുടെ നേതൃത്വം ഏറ്റെടുക്കുക എന്ന ചര്‍ച്ചയും ഇതിനോടകം സജീവമായിട്ടുണ്ട്.

Tags : AMMA Crisis accused Shweta Menon