18

തിരുവനന്തപുരം: നീറമണ്‍കര ശിവക്ഷേത്രത്തിലെ മോഷണവുമായി ബന്ധപ്പെട്ട് കാണിക്കവഞ്ചികള്‍ തകര്‍ത്ത് പണം കവര്‍ന്നയാളെ പോലീസ് തിരിച്ചറിഞ്ഞു. ഇയാള്‍ക്ക് തിരുവനന്തപുരം നഗരത്തിലെ വിവിധ സ്റ്റേഷനുകളില്‍ കേസുകള്‍ ഉണ്ടെന്നും പ്രതിയെ ഉടന്‍ തന്നെ പിടികൂടുമെന്നും കരമന സിഐ അറിയിച്ചു.

മൊബൈല്‍ ഫോണ്‍ ഉപയോഗിക്കാത്തയാളാണ് പ്രതിയെന്നും അതാണ് അന്വേഷണം നീളാന്‍ കാരണമെന്നും പോലീസ് പറഞ്ഞു. 18ന് പുലര്‍ച്ചെയാണ് ക്ഷേത്രത്തിലെ കാണിക്കവഞ്ചികള്‍ കുത്തിത്തുറന്ന് 30,000-ഓളം രൂപ അപഹരിച്ചത്. ഇതില്‍ നാണയങ്ങളും നോട്ടുകളും ഉള്‍പ്പെടുന്നു.

ക്ഷേത്ര പ്രസിഡന്‍റ് ഹരിയാണ് ഇതുസംബന്ധിച്ച് കരമന പോലീസ് സ്റ്റേഷനില്‍ പരാതി നല്‍കിയത്. ക്ഷേത്രകോമ്പൗണ്ടിനുള്ളിലുണ്ടായിരുന്ന ഏഴു കാണിക്കവഞ്ചികളാണ് തകര്‍ക്കപ്പെട്ടത്. മൂന്നു ശ്രീകോവിലുകളുടെ വാതിലുകളും തകര്‍ത്തിട്ടുണ്ട്. കെടാവിളക്കിനു സമീപത്തു സ്ഥാപിച്ചിരുന്ന കാണിക്കവഞ്ചിയാണ് തകര്‍ക്കപ്പെട്ടവയില്‍ ഒന്ന്.

മോഷ്ടിക്കുന്ന പണം ഉപയോഗിച്ച് ആഡംബരജീവിതം നയിക്കുന്നയാളാണ് പ്രതിയെന്നു വ്യക്തമാക്കിയ പോലീസ് ഇയാള്‍ തിരുവനന്തപുരം ജില്ലക്കാരനാണെന്നും പറഞ്ഞു. അതേസമയം ഇയാളെക്കുറിച്ച് കൂടുതല്‍ വിവരങ്ങള്‍ പോലീസ് വ്യക്തമാക്കിയിട്ടില്ല.

മോഷണംനടന്ന അന്നുമുതല്‍ സിസിടിവി ദൃശ്യങ്ങള്‍ പരമാവധി ശേഖരിക്കാനായിരുന്നു പോലീസിന്‍റെ ശ്രമം. ക്ഷേത്ര കോമ്പൗണ്ടില്‍ കാമറകള്‍ സ്ഥാപിച്ചിട്ടില്ലാത്തത് അന്വേഷണത്തിന് വലിയൊരു തിരിച്ചടിയുമായിരുന്നു.

Tags : Robbery Neeramankara temple Suspect