മെഡിക്കൽ കോളജിലെ പദ്ധതിയിൽ പലതും വഴിയിൽ : Deepika.com Nattu Visesham

അന്പലപ്പുഴ: വികസന സമിതി കൂടാത്തതിനെ തുടർന്ന് ആലപ്പുഴ മെഡിക്കൽ കോളജിലെ പദ്ധതികൾ പലതും പൂർണതയിലെത്തുന്നില്ല. പുതിയ കളക്ടറിൽ പ്രതീക്ഷയർപ്പിച്ച് നിൽക്കുകയാണ് ജീവനക്കാർ. ആലപ്പുഴ വണ്ടാനം മെഡിക്കൽ കോളജ് ആശുപത്രി വികസന കാര്യ സമിതി കൂടാത്തതിനെ തുടർന്ന് ആശുപത്രിയിലെ പല പദ്ധതികളും മുടക്കത്തിലായി. രോഗികൾക്കും ജീവനക്കാർക്കും ലഭിക്കേണ്ട ആനുകൂല്യങ്ങൾക്കും പുറമേ പുതുതായി നിർമിക്കേണ്ട ശൗചാലയങ്ങൾ അടക്കമുള്ള നിർമാണ പ്രവർത്തനങ്ങൾ, എച്ച്ഡിസി ജീവനക്കാർക്കുള്ള ശന്പളം വർധിപ്പിക്കൽ തുടങ്ങി ഒട്ടേറെ വികസന പദ്ധതികൾ പാതി വഴിയിൽ കിടക്കുകയാണ്. വർഷത്തിൽ രണ്ടുപ്രാവശ്യമെങ്കിലും വികസന സമിതി കൂടി തീരുമാനങ്ങൾ കൈക്കൊള്ളണമെന്നാണ് ചട്ടം.
എന്നാൽ മൂന്നുവർഷത്തിനിടയിൽ നാലുമാസം മുന്പ് വികസന സമിതി വിളിച്ചുകൂട്ടിയങ്കിലും ചെയർമാനായ കളക്ടർ മാത്രമാണ് പങ്കെടുക്കാൻ ആശുപത്രിയിൽ എത്തിയത്. വേണ്ട തീരുമാനങ്ങൾ നടപ്പിലാക്കേണ്ട സ്ഥലം എംഎൽഎ കൂടിയായ മന്ത്രിയോ എംപിയോ എത്താതിരുന്നതിനെ തുടർന്ന് യോഗം മാറ്റിവയ്ക്കുകയായിരുന്നു. പുതുതായി ജീവനക്കാരെ എടുക്കേണ്ട തീരുമാനമടക്കമുള്ള ഇതോടെ നടന്നില്ല. പല രീതിയിലുള്ള സാന്പത്തിക നഷ്ടവും വികസന കാര്യസമിതി കമ്മിറ്റിക്ക് ഉണ്ടായി. ഒരു വർഷം മുന്പുവരെ വാഹന പാർക്കിംഗ് ഏരിയാ കരാർ കൊടുക്കുന്നതിലൂടെ വർഷത്തിൽ ആറുലക്ഷം രൂപ എച്ച്ഡിസിക്ക് ലഭിച്ചിരുന്നു. കഴിഞ്ഞ ഒരു വർഷമായി പാർക്കിംഗ് ഏരിയാ കരാർ കൊടുക്കാത്തതിനെ തുടർന്ന് ആശുപത്രി വികസന സമിതിക്ക് നഷ്ടമായത് ലക്ഷങ്ങളാണ്. സ്ഥലം എംഎൽഎയായ മന്ത്രിയും മുൻ എംപിയും തമ്മിലുള്ള സ്വരചേർച്ചമൂലമാണ് വികസന സമിതി വിളിച്ച് ചേർക്കാതിരുന്നതെന്ന ആക്ഷേപവും നിലനിൽക്കുന്നുണ്ട്.
ട്രോളിയ്ക്കും വീൽ ചെയറിനും ആശുപത്രിയിൽ ക്ഷാമം നേരിടുകയാണ്. അത്യാഹിത വിഭാഗ ങ്ങൾക്ക് സമിപം അഞ്ചിൽ അധികം വീൽ ചെയറുകളും ട്രോളികളുമാണ് ആവശ്യമെങ്കിലും രണ്ടു വീതം മാത്രമാണുള്ളത്. ജനോപകാര പ്രധാനമായ നിരവധി പ്രശനങ്ങൾ ചർച്ച ചെയ്ത് പരിഹരിക്കാനായാണ് വിവിധ പാർട്ടിയിലെ ഓരോ അംഗത്തെ ഉൾപെടുത്തി കളക്ടർ ചെയർമാനും, ആശുപത്രി സൂപ്രണ്ട് കണ്‍വീനറുമായി വികസന സമിതി രൂപീകരിച്ചത്.
ആശുപത്രി വികസന സമിതി നിയോഗിച്ച ജീവനക്കാരുടെ ശന്പളം വർധിപ്പിക്കാനുള്ള നടപടി ഉണ്ടാകണമെന്ന് സർക്കാർ നിർദേശിച്ചിട്ടും ആശുപത്രി അധികൃതർ തയാറായിട്ടില്ല. അത്യാഹിത വിഭാഗങ്ങളിലും, വാർഡുകളിലും വേണ്ടത്ര ജീവനക്കാർ ഇല്ലാത്തതിനെ തുടർന്ന് രോഗികളെ സ്ട്രക്ചറുകളിലും, ട്രോളികളിലും, വീൽചെയറിലും ചികിത്സ നിർണയത്തിന് എത്തിക്കാനും, തിരിച്ച് വാർഡുകളിലേക്കും അത്യാഹിത വിഭാഗങ്ങിലേക്കും എത്തിക്കാനും കാലതാമസം നേരിടുന്നു. സുരക്ഷാ ജീവനക്കാർ ഉൾപ്പെടെയുള്ളവരുടെ ശന്പളവർധന ഉറപ്പുവരുത്തണമെന്ന് മുൻ കളക്ടർ ആശുപത്രി സൂപ്രണ്ടിന് നിർദേശം നൽകുകയും ഇതിനായി കഴിഞ്ഞ വികസന സമിതി സബ് കമ്മറ്റി രൂപീകരിച്ചെങ്കിലും ഈ തീരുമാനവും നടപ്പിലായില്ല.
സുരക്ഷ ജീവനക്കാരുടെ ദിവസ വേതനം കേരളത്തിലെ എല്ലാ മെഡിക്കൽ കോളജ് ആശുപത്രികളിലും 650 രൂപ മുതൽ 700 രൂപ വരെയാണ് എന്നാൽ വണ്ടാനത്ത് ആകട്ടെ ഇവരുട വേതനം 405 രൂപയാണ്. ഇതിനും പരിഹാരം കാണമെന്ന് കളക്ടർ നിർദേശിച്ചെങ്കിലും സബ് കമ്മിറ്റി പോലും വിളിച്ചു ചേർത്തിട്ടില്ലെന്ന പരാതിയും ഉയരുന്നു. അത്യാഹിത വിഭാഗങ്ങളിൽ എത്തുന്ന രോഗികൾക്കാകട്ടെ മലമൂത്ര വിസർജനം ചെയ്യാനായി ഒരു ശൗചാലയം പോലുമില്ലാതെ രോഗികളും സന്ദർശകരും ഏറെ ബുദ്ധിമുട്ട് അനുഭവിക്കുകയാണ്. ആശുപത്രി വികസന സമിതി കൂടി തീരുമാനം അറിയ്ക്കാതെ തങ്ങൾക്ക് ഇതിൽ ഇടപെടാൻ പറ്റില്ലന്നാണ് കെട്ടിട വിഭാഗം ഉദ്യോഗസ്ഥർ പറയുന്നത്. ഇതിനു പരിഹാരം കാണാൻ പുതുതായി ചുമതലയേറ്റ ജില്ലാ കളക്ടർ ഇടപെടണമെന്ന ആവശ്യം ജീവനക്കാർക്കിടയിൽ ശക്തമാകുകയാണ്.
താത്കാലിക ജീവനക്കാരുടെ ശന്പളം വർദ്ധിപ്പിക്കണമെന്ന് സർക്കാർ സർക്കുലർ ഇറക്കിയിട്ടും, വികസന സമിതി വിളിച്ച് കൂട്ടി തീരുമാനം എടുക്കാൻ അധികാരികൾക്ക് ആയില്ല.
തങ്ങളുടെ ഡ്യൂട്ടി സമയം ക്രമീകരിക്കണമെന്നും ശന്പളം കൂട്ടി കിട്ടാൻ നടപടി സ്വീകരിക്കണമെന്നും കാണിച്ച് 70 ഓളം സുരക്ഷാ ജീവനക്കാർ അന്പലപ്പുഴ അസി. ലേബർ ഓഫിസർക്ക് പരാതി കൊടുക്കുകയും തുടർന്ന് ആശുപത്രിയിൽ എത്തിയ ലേബർ ഓഫീസർ വിവരം സൂപ്രണ്ടിനെ ധരിപ്പിച്ചിട്ടും നടപടി ആയിട്ടില്ലെന്നും താത്കാലിക ജീവനക്കാർ പറയുന്നു.