ഇരിങ്ങാലക്കുട: വിശുദ്ധ കുര്‍ബാനയില്‍നിന്ന് ശക്തി സ്വീകരിച്ച് ജീവകാരുണ്യമായി ക്രൈസ്തവ ജീവിതം മാറണമെന്ന് അപ്പസ്‌തോലിക് ന്യുണ്‍ ഷ്യോ ആര്‍ച്ച്ബിഷപ് എമരിറ്റസ് മാര്‍ ജോര്‍ജ് പാനികുളം. ഇരിങ്ങാലക്കുട രൂപതയില്‍ നടന്ന ദിവ്യകാരുണ്യ കോണ്‍ഗ്രസ് ഉദ്ഘാടനം ചെയ് തു പ്രസംഗിക്കുകയായിരുന്നു ബിഷപ്. ഒന്നിപ്പിലേക്കാണ് വിശുദ്ധ കുര്‍ബാന നമ്മെ നയിക്കുന്നത്. പെന്തക്കുസ്ത ദിനത്തിന്‍റെ അവസാനത്തില്‍ അരൂപിയുടെ ആഗമനത്തില്‍ ഒരു പുതിയ സമൂഹം ഉരുത്തിരിഞ്ഞതുപോലെ നമുക്കും ക്രിസ്തുവിന് സാക്ഷ്യമാകുവാന്‍ കഴിയണം.
സെന്‍റ് തോമസ് കത്തീഡ്രല്‍ അങ്കണത്തില്‍ നടന്ന ചടങ്ങില്‍ രൂപത ബിഷപ് മാര്‍ പോളി കണ്ണൂക്കാടന്‍ അധ്യക്ഷത വഹിച്ചു. കേരളസഭാ നവീകരണത്തിന്‍റെയും രൂപത സുവര്‍ണ ജൂബിലി വാര്‍ഷികത്തിന്‍റെയും മുന്നോടിയായാണ് ഇരിങ്ങാലക്കുട രൂപതയുടെ പ്രഥമ ദിവ്യകാരുണ്യ കോണ്‍ഗ്രസ് നടത്തപ്പെട്ടത്.
ഇരിങ്ങാലക്കുട രൂപത വികാരി ജനറാള്‍ മോണ്‍. ജോസ് മഞ്ഞളി, ഇരിങ്ങാലക്കുട രൂപത വികാരി ജനറാളും ദിവ്യകാരുണ്യ കോണ്‍ഗ്രസ് ജനറല്‍ കോ-ഒാര്‍ഡിനേറ്ററുമായ മോണ്‍. ജോസ് മാളിയേക്കല്‍, രൂപത വികാരി ജനറാള്‍ മോണ്‍. വില്‍സണ്‍ ഈരത്തറ, കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍, ദിവ്യകാരുണ്യ കോണ്‍ഗ്രസ് ജനറല്‍ കണ്‍വീനര്‍ റവ.ഡോ. റിജോയ് പഴയാറ്റില്‍, രൂപത പ്രസ്ബിറ്ററല്‍ കൗണ്‍സില്‍ സെക്രട്ടറി ഫാ. ആന്‍റണി മുക്കാട്ടുകരക്കാരന്‍, ഫാമിലി അപ്പസ്‌തോലേറ്റ് ഡയറക്ടര്‍ റവ. ഡോ. ജോജി പാലമറ്റം, ഏകോപനസമിതി സെക്രട്ടറി ഫാ. ജോയല്‍ ചെറുവത്തൂര്‍, ഉദയ പ്രൊവിന്ഷ്യല് സുപ്പീരിയര്‍ സിസ്റ്റര്‍ വിമല സിഎംസി, അല്‍വേര്‍ണിയ പ്രൊവിന്ഷ്യല് സുപ്പീരിയര്‍ സിസ്റ്റര്‍ ലില്ലി മരിയ എഫ്‌സിസി, പാവനാത്മ പ്രൊവിന്ഷ്യല് സുപ്പീരിയര്‍ സിസ്റ്റര്‍ ട്രീസ ജോസഫ് സിഎച്ച്എഫ്, ഗുഡ് ഷെപ്പേര്‍ഡ് പ്രൊവിന്ഷ്യല് സുപ്പീരിയര്‍ സിസ്റ്റര്‍ ജെയിന്‍ മേരി സിഎസ്എം, ഡിപോള്‍ പ്രൊവിന്ഷ്യല് സുപ്പീരിയര്‍ സിസ്റ്റര്‍ ലുസീന സിഎസ്‌സി, പാസ്റ്ററല്‍ കൗണ്‍സില്‍ സെക്രട്ടറിമാരായ ഡേവിസ് ഊക്കന്‍, ആനി ആന്‍റോ, കുടുംബസമ്മേളന കേന്ദ്രസമിതി പ്രസിഡന്‍റ് ജോഷി പുത്തിരിക്കല്‍, പിന്‍റോ ചക്കാലക്കല്‍, ലിംസണ്‍ ഊക്കന്‍, ആന്‍റണി കണ്ടംകുളത്തി, ജോബി അക്കരക്കാരന്‍, ബ്രിസ്റ്റോ നീലങ്കാവില്‍, 2024 സീറോമലബാര്‍ സഭ പ്രതിഭാതാരം കുമാരി നില ആന്‍റു എന്നിവര്‍ വേദിയില്‍ സന്നിഹിതരായിരുന്നു.
രൂപതയിലെ രണ്ടര ലക്ഷത്തോളം അല്മായവിശ്വാസികളുടെ പ്രതിനിധികളും വൈദികരും സന്യസ്തരുമടക്കം ഇരുപതിനായിരത്തോളം വിശ്വാസികള്‍ ദിവ്യകാരുണ്യ കോണ്‍ഗ്രസില്‍ പങ്കാളികളായി.