ബോട്ടിൽ നിന്നു കായലിൽ വീണ് മത്സ്യത്തൊഴിലാളിയെ കാണാതായി
Friday, August 26, 2016 4:22 PM IST
മട്ടാഞ്ചേരി: തോപ്പുംപടി ഫിഷിംഗ് ഹാർബറിൽ കെട്ടിയിട്ടിരുന്ന ബോട്ടിൽ നിന്നു കായലിൽ വീണ് മത്സ്യത്തൊഴിലാളിയെ കാണാതായി. തിരുവനന്തപുരം പുല്ലുവിള സ്വദേശി ജോണി(40)യെയാണ് കാണാതായത്. ഇന്നലെ വൈകുന്നേരം നാലിനായിരുന്നു സംഭവം.

തിരുവനന്തപുരം സ്വദേശിയുടെ ഉടമസ്‌ഥതയിലുള്ള സെന്റ് ആന്റണീസ് എന്ന മത്സ്യബന്ധന ബോട്ടിലെ തൊഴിലാളിയാണ് ജോണി. ബോട്ടിന്റെ മുൻവശത്ത് ഇരിക്കുന്നതിനിടെ കായലിലേക്ക് വീഴുകയായിരുന്നു. ഹാർബറിന്റെ തീരത്ത് നിരവധി ബോട്ടുകൾ നിരനിരയായി കെട്ടിയിരുന്നതിനാൽ രക്ഷാപ്രവർത്തനത്തിനു തടസമായെന്ന് തൊഴിലാളികൾ പറഞ്ഞു. ഹാർബർ പോലീസും ഫയർഫോഴ്സും രാത്രി വൈകിയും തിരച്ചിൽ നടത്തിയെങ്കിലും ഫലം കണ്ടില്ല. കൂടുതൽ തിരച്ചിലിനായി നേവിയുടെ സഹായം തേടി.
Loading...