District News
വൈക്കം: ശിവപഞ്ചാക്ഷരി മന്ത്രങ്ങളാൽ മുഖരിതമായ ഭക്തിസാന്ദ്രമായ അന്തരീക്ഷത്തിൽ വൈക്കം മഹാദേവ ക്ഷേത്രത്തിലെ ചരിത്ര പ്രസിദ്ധമായ അഷ്ടമി മഹോത്സവത്തിന് കൊടിയേറി.
ഇന്നലെ രാവിലെ 6.30നും 8.15നും മധ്യേ തന്ത്രിമുഖ്യരായ ഭദ്രകാളി മറ്റപ്പള്ളി ചെറിയ പരമേശ്വരൻ നമ്പൂതിരി, കിഴക്കിനിയേടത്ത് മേക്കാട് മാധവൻ നമ്പൂതിരി എന്നിവരുടെ മുഖ്യ കാർമികത്വത്തിൽ ക്ഷേത്രത്തിലെ മേൽശാന്തിമാരും ചേർന്നാണ് കൊടിയേറ്റിയത്.
നെറ്റിപ്പട്ടം കെട്ടിയ ഗജവീരന്മാരും സ്വർണക്കുടകളും വാദ്യമേളങ്ങളും കൊടിയേറ്റിന് അകമ്പടിയായി. കൊടിയേറ്റിനെ തുടർന്ന് കൊടിക്കീഴിൽ തിരുവിതാംകൂർ ദേവസ്വം കമ്മിഷണർ ബി. സുനിൽകുമാർ, അവിട്ടം തിരുനാൾ ആദിത്യവർമ എന്നിവർ ചേർന്ന് ഭദ്രദീപം കൊളുത്തി. കലാമണ്ഡപത്തിൽ അവിട്ടം തിരുനാൾ ആദിത്യവർമ ദീപം തെളിച്ചു.
അഷ്ടമി വിളക്കിലെ ദീപം ആറാട്ട് വരെ കെടാതെ സൂക്ഷിക്കും. ഇനി പന്ത്രണ്ട് രാപകലുകൾ ക്ഷേത്രനഗരി ഉത്സവ സാന്ദ്രമാകും.
26ന് ദർശന പ്രാധാന്യമുള്ള ഋഷഭ വാഹന എഴുന്നള്ളിപ്പ്. ഡിസംബർ ഒന്നിനാണ് ചരിത്ര പ്രസിദ്ധമായ വൈക്കത്തഷ്ടമി.പുലർച്ചെ 4.30ന് അഷ്ടമി ദർശനം, വൈകുന്നേരം ആറിന് നടക്കുന്ന ഹിന്ദുമത സമ്മേളനം ജസ്റ്റീസ് ഹരിശങ്കർ വി. മേനോൻ ഉദ്ഘാടനം ചെയ്യും. തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ അധ്യക്ഷത വഹിക്കും. രാത്രി 11 ന് ഉദയനാപുരത്തപ്പന്റെ വരവ്, പുലർച്ചെ രണ്ടിന് അഷ്ടമി വിളക്ക്.
District News
കൈപ്പുഴ: യുവാവ് തോട്ടിൽ ചാടി ജീവനൊടുക്കി. കൈപ്പുഴ പള്ളിക്കുന്ന് വീട്ടിൽ രതീഷ് രാധാകൃഷ്ണൻ (44) ആണ് ജീവനൊടുക്കിയത്. ഇന്നലെ ഉച്ചയ്ക്ക് 1.30 ന് ആർപ്പൂക്കര കുട്ടോമ്പുറം പാലത്തിൽനിന്ന് ഇയാൾ ആറ്റിൽ ചാടുകയായിരുന്നെന്ന് പറയപ്പെടുന്നു. കുട്ടോമ്പുറം പാലത്തിന് സമീപത്ത് സംശയാസ്പദമായ രീതിയിൽ ബാഗും ചെരിപ്പും കണ്ടതിനെ തുടർന്ന് നാട്ടുകാർ വിവരം ഗാന്ധിനഗർ പോലീസിലും അഗ്നിരക്ഷാ സേനയെയും അറിയിക്കുകയായിരുന്നു.
തുടർന്ന് പാമ്പാടി യൂണിറ്റിലെ അഗ്നിരക്ഷാ സേനാ ഓഫിസറും ജില്ലാ സ്കൂബാ ടീം അംഗവുമായ ടി.കെ വിനോദ് കുമാറിന്റെ നേതൃത്വത്തിൽ ആറ്റിൽ നടത്തിയ തെരച്ചിലിൽ മൃതദേഹം കണ്ടെത്തുകയായിരുന്നു. തുടർന്ന് മൃതദേഹം കോട്ടയം മെഡിക്കൽ കോളജ് ആശുപത്രി മോർച്ചറിയിലേക്കു മാറ്റി. അവിവാഹിതനാണ്. സംഭവത്തിൽ ഗാന്ധിനഗർ പോലീസ് മേൽനടപടി സ്വീകരിച്ചു.
District News
ചക്കുളത്തുകാവ്: പ്രസിദ്ധ തീര്ഥാടന കേന്ദ്രമായ ചക്കുളത്തുകാവ് ശ്രീഭഗവതി ക്ഷേത്രത്തിലെ കാര്ത്തിക പൊങ്കാല മഹോത്സവത്തിന് മുന്നോടിയായി നിലവറദീപം തെളിഞ്ഞു. തുടര്ന്ന് പൊങ്കാലയുടെ വരവറിയിച്ച് വിളംബര ഘോഷയാത്രയും നടന്നു. ഇനി വ്രതശുദ്ധിയുടെയും പ്രാര്ഥനയുടെയും പുണ്യനാളുകളിലേക്ക് കടക്കുകയാണ് ഭക്തജനങ്ങള്.
രാവിലെ 4.30ന് വിശേഷാല് പൂജകളോടെ ചടങ്ങുകള് ആരംഭിച്ചു. തുടര്ന്ന് 9.30ന് ക്ഷേത്രം കാര്യദര്ശി മണിക്കുട്ടന് നമ്പൂതിരിയുടെ നേതൃത്വത്തില് മുഖ്യകാര്യദര്ശി രാധാകൃഷ്ണന് നമ്പൂതിരി നിലവറദീപം തെളിച്ചു. തുടര്ന്ന് ക്ഷേത്രനടയില് നടന്ന ദീപപ്രകാശനവും ഭക്തജനസംഗമവും മന്ത്രി മോന്സ് ജോസഫ് ഉദ്ഘാടനം ചെയ്തു. റെജി ചെറിയാന് എംഎല്എ അധ്യക്ഷത വഹിച്ചു. പൊങ്കാല മഹോത്സവത്തിന്റെ വിളംബര ഘോഷയാത്ര തലവടി പഞ്ചായത്ത് പ്രസിഡന്റ് ബാബു വലിയവീടന് ഉദ്ഘാടനം ചെയ്തു. ബിജെപി സംസ്ഥാന ജനറല് സെക്രട്ടറി അനൂപ് ആന്റണി മുഖ്യാതിഥിയായി പങ്കെടുത്തു. തലവടി പഞ്ചായത്ത് ജനപ്രതിനിധികളായ ഗോകുല് ഗോപാലകൃഷ്ണന്, ബി. രമേശ് കുമാര്, മണിദാസ് വാസു, സുരേഷ് കാവുംഭാഗം എന്നിവര് പ്രസംഗിച്ചു.
തുടര്ന്ന് നടന്ന വിളംബര ഘോഷയാത്രയ്ക്ക് ക്ഷേത്രം മേല്ശാന്തിമാരായ അശോകന് നമ്പൂതിരി, രഞ്ജിത്ത് ബി. നമ്പൂതിരി, ദുര്ഗാദത്തന് നമ്പൂതിരി, ഹരിക്കുട്ടന് നമ്പൂതിരി, രമേശ് ഇളമണ് നമ്പൂതിരി എന്നിവര് കാര്മികത്വം വഹിച്ചു. ജനറല് കണ്വീനര് അജിത്ത് പിഷാരത്ത്, ഉത്സവ കമ്മിറ്റി പ്രസിഡന്റ് സന്തോഷ് ഗോകുലം, വൈസ് പ്രസിഡന്റ് പി.കെ. സ്വാമിനാഥന്, സെക്രട്ടറി എം.വി. രാജീവ്, വോളന്ററിയര് ക്യാപ്റ്റന് കെ.എസ്. ബിനു എന്നിവര് പരിപാടികള്ക്ക് നേതൃത്വം നല്കി.
പ്രസിദ്ധമായ ചക്കുളത്തുകാവ് പൊങ്കാല 24ന് നടക്കും. പുലര്ച്ചെ നാലിന് നിര്മാല്യദര്ശനവും അഷ്ടദ്രവ്യ മഹാഗണപതി ഹോമവും ഒന്പതിന് വിളിച്ചു ചൊല്ലി പ്രാര്ഥനയും തുടര്ന്ന് ക്ഷേത്ര ശ്രീകോവിലിലെ കെടാവിളക്കില് നിന്നും ക്ഷേത്ര കാര്യദര്ശി മണിക്കുട്ടന് നമ്പൂതിരി കൊടിവിളക്കിലേക്ക് ദീപം പകരും, തുടര്ന്ന് നടപ്പന്തലില് പ്രത്യേകം തയാറാക്കിയ പണ്ടാര പൊങ്കാല അടുപ്പിലേക്ക് മുഖ്യകാര്യദര്ശി രാധാകൃഷ്ണന് നമ്പൂതിരി അഗ്നി പ്രോജ്വലിപ്പിച്ചുകൊണ്ട് പൊങ്കാലയ്ക്ക് തുടക്കം കുറിക്കും.
ക്ഷേത്ര കാര്യദര്ശി മണിക്കുട്ടന് നമ്പൂതിരിയുടെ അധ്യക്ഷതയില് നടക്കുന്ന ഭക്തജന സംഗമത്തില് മന്ത്രി രമേശ് ചെന്നിത്തല പൊങ്കാലയുടെ ഉദ്ഘാടനം നിരവഹിക്കും.
റെജി ചെറിയാന് എംഎല്എ ആമുഖപ്രഭാഷണവും, കൊടിക്കുന്നില് സുരേഷ് എംപി പൊങ്കാലയുടെ സന്ദേശവിവരണവും മാന്നാര് അബ്ദുള് ലത്തീഫ് മുഖ്യപ്രഭാഷണവും നടത്തും.
ക്ഷേത്ര മേല്ശാന്തി അശോകന് നമ്പൂതിരിയുടെ മുഖ്യകാര്മികത്വത്തില് ട്രസ്റ്റിമാരായ രഞ്ജിത്ത് ബി. നമ്പൂതിരി, ദുര്ഗാദത്തന് നമ്പൂതിരി എന്നിവരുടെ നേതൃത്വത്തില് പൊങ്കാല സമര്പണ ചടങ്ങുകള് നടക്കും. ഭക്തര് തയാറാക്കിയ നിവേദ്യം വേദപണ്ഡിതന്മാരുടെ നേത്യത്വത്തില് നേദിക്കും. തുടര്ന്ന് പ്രസിദ്ധമായ ഉച്ച ദീപാരാധനയും അഭിഷേകവും നടക്കും.
District News
എടത്വ: ചക്കുളത്തുകാവ് ഭഗവതി ക്ഷേത്രത്തിലെ പൊങ്കാല മഹോത്സവത്തിന് മുന്നോടിയായി അമ്പലപ്പുഴ-തിരുവല്ല സംസ്ഥാന പാതയില് വെള്ളക്കിണര് ജംഗ്ഷന് സമീപത്തെ റോഡിലെ കുഴി കോണ്ക്രീറ്റ് ചെയ്ത് അടച്ചു.
കുട്ടനാട് കുടിവെള്ള പദ്ധതിയുടെ പൈപ്പ് ലൈന് പൊട്ടിയതിനെത്തുടര്ന്ന് രൂപപ്പെട്ട കുഴി അറ്റകുറ്റപ്പണി പൂര്ത്തിയായിട്ടും അടയ്ക്കാത്തത് സംബന്ധിച്ച് ഭക്തജനങ്ങള്ക്കും നാട്ടുകാര്ക്കും യാത്രാദുരിതം സൃഷ്ടിക്കുന്നതായി ചൂണ്ടിക്കാട്ടി മാധ്യമങ്ങള് വാര്ത്ത പ്രസിദ്ധീകരിച്ചിരുന്നു.
വാര്ത്തയെ തുടര്ന്ന് ബന്ധപ്പെട്ട അധികൃതര് ഇടപെട്ട് കുഴി കോണ്ക്രീറ്റ് ചെയ്ത് അടയ്ക്കുകയായിരുന്നു. ഇതോടെ ഏറെ നാളായി യാത്രക്കാര് നേരിട്ടിരുന്ന ബുദ്ധിമുട്ടിന് പരിഹാരമായി.
ചെക്കിടിക്കാട് മില്മ ജംഗ്ഷന് സമീപം രൂപപ്പെട്ട കുഴി ടാറിംഗ് ചെയ്ത് അടച്ചിരുന്നു. പൊങ്കാല മഹോത്സവത്തിന് മുന്നോടിയായി റോഡ് ഗതാഗതയോഗ്യമാക്കിയതില് ഭക്തജനങ്ങളും നാട്ടുകാരും ആശ്വാസത്തിലാണ്.
District News
മങ്കൊമ്പ്: കൈനകരി അറുനൂറ്റംപാടം സേക്രഡ് ഹാർട്ട് പള്ളിയിൽ തിരുഹൃദയത്തിരുനാളിനു തുടക്കമായി. വികാരി ഫാ. വർഗീസ് കായിത്തറ കൊടിയേറ്റി. ഇന്നു വൈകുന്നേരം 4.30ന് തിരുഹൃദയ ജപമാല, നൊവേന, ആഘോഷമായ വിശുദ്ധ കുർബാന-ഫാ. സിജോ കുന്നുതറ തുടർന്ന് സെമിത്തേരി സന്ദർശനം, നേർച്ചഭക്ഷണം, കലാസന്ധ്യ.
21ന് വൈകുന്നേരം 4.30ന് തിരുഹൃദയ ജപമാല, നൊവേന, ആഘോഷമായ വിശുദ്ധ കുർബാന, ഫാ. ബിജോ മറ്റപ്പറമ്പിൽ, പ്രദക്ഷിണം ഫാ. മിജോ കൈതപ്പറമ്പിൽ. പ്രധാന തിരുനാൾ ദിനമായ 22ന് രാവിലെ 9.15ന് തിരുഹൃദയ ജപമാല, ആഘോഷമായ റാസ കുർബാന, ഫാ. ജിബിൻ കേഴപ്ലാക്കൽ, പ്രദക്ഷിണം ഫാ. ഏലിയാസ് കരിക്കണ്ടത്തിൽ, കൊടിയിറക്ക്.
District News
എടത്വ: സെന്റ് മേരീസ് എൽപി സ്കൂളിൽ സെന്റ് ജോർജ് ഫെറോന പള്ളി മാനേജ്മെന്റിന്റെയും സ്കൂളിന്റെയും സംയുക്താഭിമുഖ്യത്തിൽ നടത്തിയ പച്ചക്കറി കൃഷിയുടെ ആദ്യ വിളവെടുപ്പ് നടന്നു. ഫെറോന വികാരി ഫാ. ജോസഫ് കളരിക്കൽ വിളവെടുപ്പ് ഉദ്ഘാടനം ചെയ്തു.
പയർ, വെള്ളരി, തണ്ണിമത്തൻ, പച്ചമുളക്, തക്കാളി, വാഴ തുടങ്ങിയവയാണ് കൃഷി ചെയ്യുന്നത്. കൃഷിക്ക് നേതൃത്വം കൊടുക്കുന്ന ബാബു ഒറ്റാറയ്ക്കൽ, കൈക്കാരന്മാരായ സിബിച്ചൻ കോനാട്ട്, സാബു ആശംപറമ്പിൽ, മനോജ് മാത്യു പുത്തൻവീട്ടിൽ, ഹെഡ്മിസ്ട്രസ് ബിന്ദു സക്കറിയ, അധ്യാപകർ, വിദ്യാർഥികൾ എന്നിവർ പങ്കെടുത്തു.
District News
ചാരുംമൂട്: വിൽപനയ്ക്കായി സൂക്ഷിച്ചിരുന്ന 5.510 ഗ്രാം എംഡിഎംഎ മയക്കുമരുന്നുമായി നിരവധി ക്രിമിനൽ കേസുകളിലെ പ്രതിയെ വള്ളികുന്നം പൊലിസ് അറസ്റ്റ് ചെയ്തു. വള്ളികുന്നം കന്നിമേൽ മുറിയിൽ വിതുര വീട്ടിൽ ശ്യാം കൃഷ്ണൻ (29) ആണ് അറസ്റ്റിലായത്. ഓപ്പറേഷൻ തൂഫാന്റെ ഭാഗമായി മയക്കുമരുന്ന് വിൽപനയ്ക്കെതിരേ വള്ളികുന്നം, നൂറനാട് പൊലിസ് സ്റ്റേഷൻ പരിധികളിൽ നടത്തിവരുന്ന പരിശോധനയുടെ ഭാഗമായി കഴിഞ്ഞ ദിവസം പുലർച്ചെ വള്ളികുന്നം കാമ്പിശേരി ബദാം മുക്കിനു സമീപം പൊലിസ് നടത്തിയ പെട്രോളിംഗിനിടെ സംശയകരമായ സാഹചര്യത്തിൽ കണ്ട യുവാവിനെ പരിശോധിക്കുകയായിരുന്നു.
പരിശോധനയിൽ വിൽപനയ്ക്കായി കൈവശം സൂക്ഷിച്ചിരുന്ന 5.510 ഗ്രാം എംഡിഎംഎ കണ്ടെത്തി. പാവുമ്പ ഉത്സവത്തോടനുബന്ധിച്ച് നടന്ന കൊലപാതകക്കേസിലെ മുഖ്യപ്രതിയാണ് പിടിയിലായ ശ്യാം കൃഷ്ണനെന്ന് പൊലിസ് പറഞ്ഞു . വള്ളികുന്നം പൊലിസ് സ്റ്റേഷനിലെ വധശ്രമക്കേസിലും ഇയാൾ പ്രതിയാണ്. കൂടാതെ വള്ളികുന്നം, കരുനാഗപ്പള്ളി, ഓച്ചിറ പൊലിസ് സ്റ്റേഷൻ പരിധികളിലായി നിരവധി ക്രിമിനൽ കേസുകളിലും ഇയാൾ പ്രതിയാണെന്ന് പൊലിസ് പറഞ്ഞു.
വള്ളികുന്നം പ്രദേശത്ത് ലഹരിവസ്തുക്കൾ വിൽപന നടത്തുന്നതായി രഹസ്യവിവരം ലഭിച്ചതിനെത്തുടർന്ന് ഇയാൾ പൊലിസ് നിരീക്ഷണത്തിലായിരുന്നു. ചെങ്ങന്നൂർ ഡിവൈഎസ്പി അലക്സ് ബേബിയുടെ നിർദേശാനുസരണം നൂറനാട് സിഐ പി. ശ്രീജിത്തിന്റെ മേൽനോട്ടത്തിൽ വള്ളികുന്നം എസ്എച്ച്ഒ കെ. ദിജേഷിന്റെ നേതൃത്വത്തിൽ നടത്തിയ പരിശോധനയിലാണ് പ്രതി പിടിയിലായത്. പ്രതിയെ കായംകുളം കോടതിയിൽ ഹാജരാക്കി റിമാൻഡ് ചെയ്തു.
District News
ആലപ്പുഴ: ജില്ലയിൽ പക്ഷിപ്പനി റിപ്പോർട്ട് ചെയ്ത അമ്പലപ്പുഴ നോർത്ത്, ചെന്നിത്തല-തൃപ്പെരുന്തുറ ഗ്രാമപഞ്ചായത്തുകളിലെ പ്രഭവകേന്ദ്രങ്ങളുടെ ഒരു കിലോമീറ്റർ പരിധിയിൽ ജില്ലാ മൃഗസംരക്ഷണവകുപ്പിന്റെ നേതൃത്വത്തിൽ ഇന്നലെ അണുനശീകരണം നടത്തി.
പിപിഇ കിറ്റ് ധരിച്ച നാല് ദ്രുതകർമ സേനാംഗങ്ങളുടെ നേതൃത്വത്തിലാണ് പക്ഷികളെ കൊന്നു, കത്തിച്ച ഇടങ്ങളിൽ പ്രോട്ടോകോൾ പ്രകാരം അണുനശീകരണം നടത്തിയത്.
ഫ്ലെയിം ഗ്യാസ് ഉപയോഗിച്ചും സോഡിയം ഹൈപ്പോക്ലോറേറ്റ് സ്പ്രെ ചെയ്തും കുമ്മായം വിതറിയുമായാണ് പ്രദേശം അണുവിമുക്തമാക്കിയത്. ഇതോടെ പക്ഷിപ്പനി പ്രതിരോധത്തിന്റെ ആദ്യഘട്ടം പൂർത്തിയായി. പ്രഭവ കേന്ദ്രങ്ങളുടെ 10 കിലോമീറ്റർ നിരീക്ഷണ മേഖലയിൽനിന്നും സാമ്പിളുകൾ ശേഖരിച്ചു.
രണ്ടാഴ്ചയിലൊരിക്കൽ ഭോപ്പാലിലെ നാഷണൽ ഇൻസ്റ്റിറ്റ്യൂട്ട് ഓഫ് ഹൈ സെക്യൂരിറ്റി ആനിമൽ ഡിസീസസിൽ അയച്ചു നൽകുമെന്ന് അധികൃതർ അറിയിച്ചു. ഇങ്ങനെ മൂന്നുമാസം അയച്ച് സാമ്പിളുകൾ നെഗറ്റീവാണെന്ന് തെളിഞ്ഞാലാണ് പ്രദേശം പക്ഷിപ്പനി മുക്തമായതായി അറിയിക്കുക.
District News
ആലപ്പുഴ: എസ്ഡിപിഐ മുൻ സംസ്ഥാന സെക്രട്ടറി കെ.എസ്. ഷാൻ വധക്കേസിന്റെ സാക്ഷിവിസ്താരം ആലപ്പുഴ അഡീഷണൽ സെഷൻസ് കോടതിയിൽ ആരംഭിച്ചു. ആകെ 143 സാക്ഷികളുള്ള കേസിൽ ആദ്യ മൂന്ന് സാക്ഷികളുടെ വിസ്താരമാണ് ഇന്നലെ നിശ്ചയിച്ചിരുന്നത്.
ഒന്നാം സാക്ഷിയും രൺജിത്ത് ശ്രീനിവാസൻ കൊലപാതക കേസിൽ പതിനാലാം പ്രതിയായി വധശിക്ഷയ്ക്ക് വിധിക്കപ്പെട്ടയാളുമായ ഷാജി എന്ന പൂവത്തിൽ ഷാജിയുടെ വിസ്താരം പൂർത്തിയാക്കി. ഇദ്ദേഹത്തെ മാവേലിക്കര സബ് ജയിലിൽനിന്നാണ് കോടതി നടപടികൾക്കായി ഹാജരാക്കിയത്.
കൊലപാതകം നേരിൽ കാണുകയും പരിക്കു പറ്റിക്കിടന്ന ഷാനിനെ ആശുപത്രിയിലെത്തിക്കുകയും ചെയ്ത രണ്ടാം സാക്ഷി മണ്ണഞ്ചേരി സ്വദേശി പി.എ. നാസർ വിസ്താരത്തിൽ കൊലപാതകത്തിൽ നേരിട്ട് പങ്കെടുത്ത അഞ്ചു പ്രതികളെയും കൊലപതാകത്തിനുപയോഗിച്ച വാളുകളും ഷാൻ ധരിച്ചിരുന്ന വാച്ചും ഷാനിനെ ആശുപത്രിലേക്ക് മാറ്റുന്നതിനിടെ ചോരപുരണ്ട നാസറിന്റെ വസ്ത്രങ്ങളും തിരിച്ചറിഞ്ഞു. രണ്ടാം സാക്ഷിയുടെയും മൂന്നാം സാക്ഷി അബ്ദുൾ ജബ്ബാറിന്റെയും വിസ്താരം ഇന്ന് തുടരും.
District News
ആലപ്പുഴ: ലോക പുരുഷ ദിനാചരണത്തിന്റെ ഭാഗമായി സഹൃദയ ആശുപത്രി ആലപ്പുഴ, ബിഡബ്ളിയുസി (ബിഡള്യുസി) സംഘടനയുമായി സഹകരിച്ച് സൈക്ലിംഗ് പ്രോഗ്രാം സംഘടിപ്പിച്ചു. സഹൃദയ ആശുപത്രി ഡയറക്ടർ ഫാ. തോമസ് മാളിയക്കൽ ഫ്ലാഗ് ഓഫ് ചെയ്തു.
പുരുഷന്മാരുടെ ആരോഗ്യസംരക്ഷണത്തിന്റെ പ്രാധാന്യവും ആരോഗ്യകരമായ ജീവിതശൈലി പിന്തുടരേണ്ടതിന്റെ ആവശ്യകതയും പൊതുജനങ്ങളിലേക്ക് എത്തിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്.
പുരുഷന്മാർ സ്വന്തം ആരോഗ്യത്തിന് കൂടുതൽ പ്രാധാന്യം നൽകണമെന്നും കൃത്യമായ ആരോഗ്യപരിശോധനകൾക്കും വ്യായാമത്തിനും സമയം കണ്ടെത്തണമെന്നും പരിപാടിയിലൂടെ സന്ദേശം നൽകി.
ആരോഗ്യ ബോധവത്കരണ പ്രവർത്തനങ്ങളുടെ ഭാഗമായി സഹൃദയ ആശുപത്രി സംഘടിപ്പിച്ച പരിപാടിയിൽ ബിഡബ്ല്യു സി സംഘടനയുടെ പ്രതിനിധികളും സൈക്ലിംഗ് പ്രേമികളും പങ്കെടുത്തു.
District News
ചേർത്തല: യുവതലമുറയ്ക്കും ആവേശമായി രാജേന്ദ്രന്പിള്ള. 80-ാം വയസിലും രാജേന്ദ്രൻ പിള്ള പവർഫുൾ. കൊച്ചിയിൽ നടന്ന സംസ്ഥാന പവർ ലിഫ്റ്റിംഗ് മത്സരത്തിൽ 270 കിലോ ഭാരം ഉയർത്തിയാണ് ഒന്നാമതെത്തിയത്. 70 വയസിനുമേൽ പ്രായമുള്ളവരുടെ വിഭാഗത്തിൽ 66 കിലോ ശരീരഭാരം ഉള്ളവർക്കൊപ്പം മത്സരിച്ചാണ് രാജേന്ദ്രൻപിള്ള നേട്ടം കൈവരിച്ചത്.
ചേർത്തല മരുത്തോർവട്ടം രഞ്ജിനി നിവാസിൽ റിട്ട. എക്സൈസ് പ്രിവന്റീവ് ഓഫീസർ ജി. രാജേന്ദ്രൻപിള്ള യുവ തലമുറയ്ക്കും ആവേശമാകുകയാണ്. 2001ൽ സർവീസിൽനിന്നു വിരമിച്ച ഇദ്ദേഹം 2008 ലാണ് മത്സരങ്ങളിൽ പങ്കെടുത്തുതുടങ്ങിയത്. ചേർത്തല ദാസ് ജിമ്മിലായിരുന്നു പരിശീലനം. ദിവസേന രണ്ടു മണിക്കൂർ വരെ നീളുന്ന മുറതെറ്റാതെയുള്ള പരിശീലനമാണ് വിജയങ്ങളിലേക്കുള്ള ചവിട്ടുപടിയായത്.
ലഹരി അകറ്റിയുള്ള ജീവിതക്രമവും ആരോഗ്യ പരിപാലനത്തിന് സഹായമായി. 18 വർഷമായി ജില്ലാ, സംസ്ഥാന, അന്തർദേശീയ മത്സരങ്ങളിൽ പങ്കെടുക്കുന്നുണ്ട്. 2022 ൽ 70 വയസിനു മേലുള്ളവരുടെ വിഭാഗത്തിൽ ദേശീയ ചാമ്പ്യനായിരുന്നു. ഒട്ടേറെ മത്സരങ്ങളിൽ സ്വർണമെഡൽ നേടി. ഭാര്യ രമാദേവിയും മക്കളായ രഞ്ജിനിയും രഞ് ജിത്തും രമ്യയും പിന്തുണയും പ്രോത്സാഹനവുമായി കൂടെയുണ്ട്.
District News
ആലപ്പുഴ: ആലപ്പുഴ ജനറൽ ആശുപത്രിയിലെ ഓപ്പറേഷൻ തിയറ്ററിൽ ഡോക്ടർമാർ തമ്മിലുണ്ടായ തർക്കത്തിൽ അടിയന്തര ഇടപെടൽ ആവശ്യപ്പെട്ട് നഗരസഭ ചെയർപേഴ്സൺ മോളി ജേക്കബ്.
സംഭവത്തിന്റെ ഗൗരവം കണക്കിലെടുത്ത് ജനറൽ ആശുപത്രി സൂപ്രണ്ടിനോട് അടിയന്തര റിപ്പോർട്ട് ആവശ്യപ്പെടുകയും ആരോഗ്യമന്ത്രിയോട് വിഷയത്തിൽ ആവശ്യമായ നടപടി സ്വീകരിക്കണമെന്ന് അഭ്യർഥിക്കുകയും ചെയ്തു.
രോഗികൾക്ക് ഏറ്റവും മികച്ച ചികിത്സയും പരിചരണവും ഉറപ്പാക്കേണ്ട ആശുപത്രിയിലെ ഓപ്പറേഷൻ തിയറ്റർ പോലുള്ള അതീവ ഗൗരവമുള്ള ഇടങ്ങളിൽ ഇത്തരം സംഭവങ്ങൾ ഉണ്ടാകുന്നത് ഒരിക്കലും അംഗീകരിക്കാനാവില്ലെന്ന് ചെയർപേഴ്സൺ പറഞ്ഞു.
രോഗികളുടെ ജീവനും ആരോഗ്യവും പരമപ്രധാനമായി കാണേണ്ട ആരോഗ്യപ്രവർത്തകരിൽനിന്ന് ഉത്തരവാദിത്വപൂർണമായ പെരുമാറ്റമാണ് പൊതുസമൂഹം പ്രതീക്ഷിക്കുന്നതെന്നും ചെയർപേഴ്സൺ വ്യക്തമാക്കി.
സാധാരണക്കാരായ നിരവധി രോഗികൾ ആശ്രയിക്കുന്ന ഈ സ്ഥാപനത്തിൽ ചികിത്സാസേവനങ്ങൾ തടസമില്ലാതെയും സമാധാനപരമായ അന്തരീക്ഷത്തിലും മുന്നോട്ടുപോകേണ്ടത് അനിവാര്യമാണ്. ആശുപത്രിയുടെ പ്രവർത്തനങ്ങളെ ബാധിക്കുന്ന തരത്തിലുള്ള ഇത്തരം പ്രവണതകൾ ആവർത്തിക്കാതിരിക്കാൻ ബന്ധപ്പെട്ട അധികാരികൾ കർശനമായ ഇടപെടൽ നടത്തണമെന്നും സംഭവത്തെക്കുറിച്ച് സമഗ്രമായ അന്വേഷണം നടത്തി ഉത്തരവാദികൾക്കെതിരേ ചട്ടപ്രകാരമുള്ള നടപടി സ്വീകരിക്കണമെന്നും ചെയർപേഴ്സൺ ആവശ്യപ്പെട്ടു. നഗരസഭാ കൗൺസിൽ യോഗത്തിലാണ് ചെയർപേഴ്സൺ നിലപാട് വ്യക്തമാക്കിയത്.
യോഗത്തിൽ സ്ഥിരം സമിതി അധ്യക്ഷരായ എ.എം. നൗഫൽ, സി. ജ്യോതിമോൾ, എസ്. ഫൈസൽ, രശ്മി സനൽ, മായ രാജേന്ദ്രൻ, കൗൺസിലർമാരായ അഡ്വ. ആർ.ആർ. ജോഷി രാജ്, വി.ജി. വിഷ്ണു, ആർ. അംജിത്ത് കുമാർ, കെ.കെ. ജയമ്മ, കെ. നൂറുദ്ദീൻ കോയ, നഗരസഭാ സെക്രട്ടറി എസ്. സനൽ തുടങ്ങിയവർ പ്രസംഗിച്ചു.