കോട്ടയം: ദുരിതക്കയത്തില് മുങ്ങിത്താഴുന്ന ക്ഷീരകര്ഷകന്റെ വയറ്റത്തടിച്ചു വീണ്ടും കാലിത്തീറ്റ കമ്പനികള്. കെഎസ് കാലിത്തീറ്റ ഇന്നുമുതല് 50 കിലോഗ്രാം ചാക്കിന് 50 രൂപയും ഗോദ്റെജ് കാലിത്തീറ്റ ഇന്നലെ മുതല് 50 രൂപയും വര്ധിപ്പിച്ചു. കഴിഞ്ഞ 16നു കേരള ഫീഡ്സ് എലൈറ്റ് കാലിത്തീറ്റ 50 കിലോഗ്രാം ചാക്കിനു 100 രൂപ വര്ധിപ്പിച്ചിരുന്നു. ഇതോടെ 50 കിലോഗ്രാം കാലിത്തീറ്റ വാങ്ങുന്നതിനു 2000 രൂപയോളം ചെലവ് വരും.
കെഎസ് കാലിത്തീറ്റ കഴിഞ്ഞ ഒക്ടോബര് 27നു 50 രൂപ കിലോഗ്രാമിനു വര്ധിപ്പിച്ചതിനു പിന്നാലെയാണ് അടുത്ത വിലവര്ധനകൂടി പ്രഖ്യാപിച്ചിരിക്കുന്നത്. ഏറ്റവും കൂടുതല് കര്ഷകര് പശുക്കള്ക്കു നല്കുന്നതു ഡീലക്സ് പ്ലസ് പെല്ലറ്റ്സും സുപ്രീം പെല്ലറ്റ്സുമാണ്. രണ്ടു കമ്പനികളും അടുപ്പിച്ചു വില വര്ധിപ്പിച്ചതു ക്ഷീരകര്ഷകര്ക്കു വലിയ തിരിച്ചടിയായി.
വില വര്ധനയോടെ ചെറുകിട ക്ഷീരകര്ഷകര്ക്കു പശുക്കളെ വളര്ത്തി ഉപജീവനം നടത്തുക അസാധ്യമായി മാറിയിരിക്കുകയാണ്. കാലിത്തീറ്റയ്ക്കു പുറമെ തവിട്, തേങ്ങാപ്പിണ്ണാക്ക്, പരുത്തിക്കുരു എന്നിവയുടെ വിലയും ഉയര്ന്നിട്ടുണ്ട്. പച്ചപ്പുല്ലും വൈക്കോലും കൈതപ്പോളയും നല്കുന്ന കര്ഷകരും പാല് കൂടുതലായി ലഭിക്കുന്നതിനു കാലിത്തീറ്റ നല്കാറുണ്ട്.
പാലിന് ഒരു രൂപ കൂട്ടാന് മാസങ്ങളെടുക്കുന്പോൾ കാലിത്തീറ്റയ്ക്ക് ഒറ്റയടിക്ക് വില കൂട്ടുന്ന സ്ഥിതിയാണെന്ന് കര്ഷകര് പറയുന്നു.പശു വളര്ത്തലില് ചെലവിന്റെ 60 മുതല് 70 ശതമാനവും കാലിത്തീറ്റയ്ക്ക് നല്കേണ്ട ഗതികേടിലാണ് കര്ഷകര്. കന്നുകാലികളുടെ തീറ്റ, മരുന്ന്, വൈദ്യുതി തുടങ്ങിയ ചെലവുകള് ഉയര്ന്നത് കര്ഷകരുടെ നട്ടെല്ലൊടിക്കുകയാണ്.
ഉത്പാദനചെലവ് താങ്ങാനാകാതെ പശുക്കളെ വിറ്റൊഴിവാക്കുന്ന അവസ്ഥയിലേക്ക് ചെറുകിട കര്ഷകര് എത്തിയിരിക്കുന്നു. ഒരു ലിറ്റര് പാല് ഉത്പാദിപ്പിക്കുന്നതിന് 60 രൂപ ചെലവ് വരുമ്പോള് ക്ഷീരസംഘങ്ങളില് നിന്ന് കര്ഷകര്ക്ക് ലഭിക്കുന്നത്. 42 -45 രൂപ വരെയാണ്. അത്യുത്പാദന ശേഷിയുള്ള പശുക്കളുണ്ടെങ്കിലേ പിടിച്ചു നില്ക്കാനാകൂ.
ഇത്തരം പശുക്കളെ വാങ്ങാന് ലക്ഷക്കണക്കിനു രൂപ ചെലവ് വരും. ഉത്പാദനം കുറഞ്ഞ സാഹചര്യത്തില് ലിറ്ററിന് 20 രൂപയെങ്കിലും കൂടുതല് ലഭിച്ചാലേ പിടിച്ചുനില്ക്കാന് കഴിയൂയെന്ന് കര്ഷകര് പറയുന്നു.
Tags : Cattle Feed Prices NattuVishesham DistricteNews