മണ്ണാർക്കാട്: സംസ്ഥാന സ്കൂൾ ശാസ്ത്രോത്സവം അവസാനദിനത്തിലേക്കു കടക്കുന്പോൾ ആദ്യ ദിനങ്ങളിൽ ലീഡ് ചെയ്ത മലപ്പുറത്തെ പിന്തള്ളി കണ്ണൂർ ഒന്നാംസ്ഥാനത്തേക്കു കുതിച്ചെത്തി.
1,138 പോയിന്റാണ് കണ്ണൂരിന്. 1,119 പോയിന്റുമായി മലപ്പുറം തൊട്ടുപിന്നിലുണ്ട്. കോഴിക്കോട് 1,070, പാലക്കാട് 1,067, വയനാട് 1,058, എന്നിങ്ങനെയാണ് യഥാക്രമം മൂന്നുമുതൽ അഞ്ചുവരെ സ്ഥാനങ്ങളിൽ.
സ്കൂളുകളിൽ വയനാട് ദ്വാരക എസ്എച്ച്എച്ച്എസ്എസ് 112 പോയിന്റുമായി ഒന്നാം സ്ഥാനത്താണ്. പത്തനംതിട്ട കോന്നി ഗവ. എച്ച്എസ്എസ് 109 പോയിന്റ് നേടി രണ്ടാംസ്ഥാനത്തുണ്ട്. ഇടുക്കി കൂന്പൻപാറ ഫാത്തിമ മാതാ ഗേൾസ് എച്ച്എസ്എസ് 108 പോയിന്റുമായി മൂന്നാം സ്ഥാനത്താണ്.

ഈ സ്മാർട്ട് വീൽചെയർ പടികളിറങ്ങും
ഒരു ഒന്നൊന്നര വീൽചെയറുമായി എത്തിയിരിക്കുകയാണ് തൃശൂർ പുത്തൻപീടിക സെന്റ് ആന്റണീസ് എച്ച്എസിലെ മെഹനാസ് മുസ്തഫയും എം.എസ്. ശ്രീനന്ദയും. രോഗികൾക്കു മാത്രമല്ല പ്രായമായവർക്കും അല്ലാത്തവർക്കും ഈ സമാർട്ട് വീൽചെയർ ഉപയോഗിക്കാം.
പടികൾ കുലുക്കാതെ ഇറക്കുന്ന, കാമറയും സെൻസറും അലേർട്ട് സംവിധാനവുമുള്ള വീൽചെയറിൽ ഇരുന്നുകൊണ്ടുതന്നെ മറ്റുള്ളവരെ എന്താവശ്യത്തിനും വിളിക്കാനും മറ്റുള്ളവർക്കു നീരിക്ഷിക്കാനും കഴിയും.
മൊബൈൽ ചാർജർ സംവിധാനം, എമർജൻസി ഓക്സിജൻ സംവിധാനം, ഫസ്റ്റ് എയ്ഡ് ബോക്സ്, പൾസ് മീറ്റർ, കാമറ ആൻഡ് മിക് ഫെസിലിറ്റി തുടങ്ങി ശരിക്കും ഒരു കുഞ്ഞ് ഹോസ്പിറ്റൽ സംവിധാനം തന്നെ ഇതിൽ ഒരുക്കിയിട്ടുണ്ട്. ഒരേസമയം ചെയർ മാത്രമായും സീറ്റുകൾ മാറ്റി ടോയ്ലറ്റ് സംവിധാനമായും ഇത് ഉപയോഗിക്കാൻ കഴിയും.
Tags : State School Science Festival Kannur Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash