പാറേല് മര്ത്ത്മറിയം വലിയപള്ളി
ചങ്ങനാശേരി അതിരൂപതയുടെ മരിയന് തീര്ഥാടനകേന്ദ്രമായ പാറേല് മര്ത്ത്മറിയം വലിയപള്ളി ഇന്ന് കൂദാശ ചെയ്ത് ആദ്യ ബലിയര്പ്പണം നടത്തി ബസിലിക്കയായി ഉയര്ത്തും.
ഉച്ചകഴിഞ്ഞു രണ്ടിന് ആര്ച്ച്ബിഷപ് എമരിറ്റസ് മാര് ജോസഫ് പെരുന്തോട്ടം കൂദാശകര്മം നിര്വഹിക്കും. പാലാ ബിഷപ് മാര് ജോസഫ് കല്ലറങ്ങാട്ട് സന്ദേശം നല്കും. ആര്ച്ച്ബിഷപ് മാര് തോമസ് തറയില് പാറേല് പള്ളിയെ ബസിലിക്കയായി ഉയര്ത്തുന്ന പ്രഖ്യാപനം നടത്തും.
ആർച്ച് ബിഷപ്പുമാരായ ഡോ. തോമസ് മാര് കൂറിലോസ്, ഡോ. തോമസ് ജെ. നെറ്റോ, ബിഷപ്പുമാരായ മാര് തോമസ് ഇലവനാല്, ഡോ. സെല്വിസ്റ്റര് പൊന്നുമുത്തന്, ഡോ. തോമസ് മാര് ഐറേനിയോസ്, ഡോ. ജയിംസ് ആനാപറമ്പില്, ഡോ.യൂഹാനോന് മാര് തിയോഡേഷ്യസ്, മാര് തോമസ് പാടിയത്ത്, ഡോ. ജസ്റ്റിന് മഠത്തിൽപ്പറമ്പില്, മോണ്. ആന്റണി എത്തയ്ക്കാട്, അതിരൂപതയിലെ മുന്നൂറിലേറെ വൈദികര് എന്നിവര് സഹകാര്മികരായിരിക്കും.
82,000 കുടുംബങ്ങളിലേക്ക് ആർച്ച്ബിഷപ്പിന്റെ സ്നേഹക്കത്ത്
മാത്യു ആന്റണി
പാറേൽ മരിയൻ ദൈവാലയ സമുച്ചയത്തിന്റെ കൂദാശാകർമത്തോടനുബന്ധിച്ച്, അതിരൂപതയിലെ 82,000 കുടുംബങ്ങളിലേക്കും നേരിട്ട് കത്തെഴുതി ആർച്ച്ബിഷപ് മാർ തോമസ് തറയിൽ. ഓരോ കുടുംബത്തെയും പേരെടുത്ത് വിളിക്കുന്നതുപോലെ, ‘സസ്നേഹം, നിങ്ങളുടെ പിതാവ്’ എന്നു കുറിച്ചുകൊണ്ടാണ് മാർ തറയിലിന്റെ ഈ സ്നേഹസന്ദേശം ഭവനങ്ങളിലേക്ക് എത്തിയിരിക്കുന്നത്.
മഹാപ്രളയത്തെയും കോവിഡ് പ്രതിസന്ധിയെയും അതിജീവിച്ച് പൂർത്തിയാക്കിയ പുതിയ പാറേൽ മരിയൻ തീർഥാടന കേന്ദ്രത്തിന്റെ കൂദാശയ്ക്കുള്ള ക്ഷണക്കത്താണിത്. ദൈവജനത്തിന്റെ സഹകരണത്തെ നന്ദിയോടെ സ്മരിക്കുന്ന ആർച്ച്ബിഷപ് കത്തിൽ ഇങ്ങനെ കുറിക്കുന്നു: “നമ്മുടെ അതിരൂപതയിലെ 82,000 കുടുംബങ്ങളും ഒരുമിച്ചാണ് പാറേൽ മരിയൻ തീർഥാടനകേന്ദ്രം നിർമിച്ചത്. നിങ്ങളോരോരുത്തരും ഇതിനു നൽകിയ സംഭാവനകളെ നന്ദിയോടെ ഓർക്കുന്നു.’’
120 വർഷം മുന്പത്തെ ആ ചരിത്രക്കത്ത്
ആർച്ച്ബിഷപ് മാർ തോമസ് തറയിലിന്റെ ഈ കത്ത്, 120 വർഷം മുന്പു നടന്ന മറ്റൊരു ചരിത്രസംഭവത്തിന്റെ ഓർമപുതുക്കൽകൂടിയാണ്. 1906ൽ പഴയ പാറേൽ കപ്പേളയുടെ കൂദാശാകർമത്തിനായി അന്നത്തെ വികാരി അപ്പസ്തോലിക്ക മാർ മാത്യു മാക്കീൽ വികാരിയാത്തിലെ എല്ലാ പള്ളികളിലേക്കും ഒരു സർക്കുലർ അയച്ചിരുന്നു. രണ്ട് നൂറ്റാണ്ടുകളിലായി രണ്ട് ഇടയന്മാർ എഴുതിയ ഈ കത്തുകൾ, ചങ്ങനാശേരി അതിരൂപതയുടെ വിശ്വാസചരിത്രത്തിലെ അപൂർവമായൊരു ഒത്തുചേരലായി മാറുകയാണ്.
ബസിലിക്ക പ്രഖ്യാപന സ്മാരകമായി പ്രത്യേക പോസ്റ്റല് കവര്
ചങ്ങനാശേരി: മധ്യതിരുവിതാംകൂറിന്റെ ആത്മീയവും സാംസ്കാരികവുമായ ചരിത്രത്തിലെ സുപ്രധാന നാഴികക്കല്ലായി മാറുന്ന തീര്ഥാടനകേന്ദ്രമായ പാറേല് മര്ത്ത്മറിയം പള്ളിയെ ബസിലിക്കപദവിയിലേക്ക് ഉയര്ത്തിയതിന്റെ സ്മരണാര്ഥം ഭാരതീയ തപാല് വകുപ്പ് പ്രത്യേക തപാല് കവര് പുറത്തിറക്കുന്നു.
പാറേല് മാതാവിന്റെ സ്റ്റാമ്പും പാറപ്പൊടിയും
പാറേല് മാതാവിന്റെ സ്റ്റാമ്പും മര്ത്ത്മറിയം ബസിലിക്കയും പാറേല് മാതാവിന്റെ ചിത്രവും തപാല് സ്റ്റാമ്പിനു പുറത്തുണ്ടാകും. കവറിനു പിന്നില് പള്ളിയെക്കുറിച്ച് ലഘുവിവരണമുണ്ട്. പള്ളിസ്ഥാപിച്ചിരിക്കുന്ന സ്ഥലത്തുനിന്നു ശേഖരിച്ച കല്ലുകള് പൊട്ടിച്ച പൊടി പ്ലാസ്റ്റിക് കവറിലാക്കി ഉള്പ്പെടുത്തിയിട്ടുണ്ടെന്നത് വലിയ സവിശേഷതയാണ്. തീര്ഥാടകര്ക്കും സ്റ്റാമ്പ് ശേഖരിക്കുന്നവര്ക്കും തപാല് കവര് വളരെ പ്രാധാന്യമുള്ളതാണ്. പ്രകാശനച്ചടങ്ങിനുശേഷം പ്രത്യേക സ്മാരക തപാല് കവര് ബസിലിക്കയുടെ ഓഫീസില്നിന്നു മാത്രമായിരിക്കും ലഭ്യമാകുക.

ക്രൈസ്തവ സഹോദരങ്ങള് മാത്രമല്ല, എല്ലാ വിഭാഗം ജനങ്ങളും എത്തി പ്രാര്ഥിക്കുന്ന ആലയമാണ് ചങ്ങനാശേരി പാറേല് പള്ളി. എന്റെ വീടിനടുത്തുള്ള ദൈവാലയമാണിത്. ഞാനും എന്റെ കുടുംബവും പാറേല് പള്ളിയില് പോയി പ്രാര്ഥിച്ച് നേര്ച്ചകള് അര്പ്പിച്ചിട്ടുണ്ട്.
മധ്യകേരളത്തിലെ പ്രശസ്തമായ പാറേല് പള്ളി വളരെ മനോഹരമായും അന്തസോടെയും പുതുക്കി നിര്മിച്ച് കൂദാശ ചെയ്ത് ബസിലിക്കയായി ഉയര്ത്തുന്നതില് അതിയായ സന്തോഷമുണ്ട്.
മതസൗഹാര്ദത്തിനു പേരുകേട്ട ചങ്ങനാശേരിയില് എല്ലാ മതവിഭാഗം ജനങ്ങളെയും ഒരുമിച്ചു കൊണ്ടുപോകാന് പാറേല് തീര്ഥാടനകേന്ദ്രത്തിനു വലിയ പങ്കാണുള്ളത്. പാറേല് പള്ളി പുനർനിര്മിക്കാന് നേതൃത്വം നല്കിയ അതിരൂപത നേതൃത്വത്തിനും വിശ്വാസീ സമൂഹത്തിനും എന്റെ എല്ലാ ആശംസകളും പ്രാര്ഥനകളും നേരുന്നു.
ജി. സുകുമാരന് നായര് എന്എസ്എസ് ജനറല് സെക്രട്ടറി