കോൺഗ്രസ്
ന്യൂഡൽഹി: നിർണായക നിയമസഭാ തെരഞ്ഞെടുപ്പുകൾക്കു മുന്നോടിയായി സംഘടനാപദവികളിൽ വൻ അഴിച്ചുപണി നടത്തി കോൺഗ്രസ്.
വിവിധ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും പ്രവർത്തന വകുപ്പുകളിലുമായി 81 എഐസിസി സെക്രട്ടറിമാരെ നിയമിച്ചു. ഇതിൽ 43 പേർ പുതുമുഖങ്ങളാണ്. നിലവിലുണ്ടായിരുന്ന 25 സെക്രട്ടറിമാരെയും ജോയിന്റ് സെക്രട്ടറിമാരെയും ചുമതലകളിൽനിന്ന് ഒഴിവാക്കിയിട്ടുണ്ട്.
കേരളം, ആസാം, തമിഴ്നാട്, ഉത്തരാഖണ്ഡ്, ഗുജറാത്ത്, കർണാടക, പഞ്ചാബ്, ജമ്മുകാഷ്മീർ, മധ്യപ്രദേശ്, ജാർഖണ്ഡ്, ബിഹാർ, ഒഡീഷ, തെലുങ്കാന, ഡൽഹി, പശ്ചിമബംഗാൾ, ഉത്തർപ്രദേശ്, രാജസ്ഥാൻ തുടങ്ങിയ സംസ്ഥാനങ്ങളിലാണ് പുനഃസംഘടന നടത്തിയത്.
തമിഴ്നാട്ടിൽനിന്നുള്ള നേതാവ് മയൂര എസ്. ജയകുമാറിനെയും മഹാരാഷ്ട്രയിൽനിന്നുള്ള ഗണേഷ് കുമാർ യാദവിനെയുമാണ് കേരളത്തിന്റെയും ലക്ഷദ്വീപിന്റെയും ചുമതലയുള്ള സെക്രട്ടറിമാരായി നിയമിച്ചത്. അതേസമയം, കേരളത്തിൽനിന്നുള്ള സൈമൺ അലക്സിനെ തെലുങ്കാനയുടെയും എസ്. ശരത്തിനെ കർണാടകയുടെയും ചുമതലയുള്ള സെക്രട്ടറിമാരായും നിയമിച്ചിട്ടുണ്ട്.
എംഎൽഎമാരും മന്ത്രിമാരും എംപിമാരുമായി തെരഞ്ഞെടുക്കപ്പെട്ടവരെയാണു പ്രധാനമായും ചുമതലകളിൽനിന്ന് ഒഴിവാക്കിയത്.
Tags : Congress New secretaries Kerala