ഗ്ലെൻ ഫിലിപ്സ്
വെല്ലിംഗ്ടണ്: സെഞ്ചുറി നേട്ടത്തിൽ ഇന്ത്യക്കെതിരേ വന്പൻ റിക്കാർഡ് സ്വന്തം പേരിൽ കുറിച്ച് ഗ്ലെൻ ഫിലിപ്സ്. ഒരു കലണ്ടർ വർഷത്തിൽ ഇന്ത്യക്കെതിരേ അന്താരാഷ്ട്ര ക്രിക്കറ്റിന്റെ മൂന്ന് ഫോർമാറ്റുകളിലും (ടെസ്റ്റ്, ഏകദിനം, ട്വന്റി20) സെഞ്ചുറി നേടുന്ന ലോകത്തെ ആദ്യ താരമെന്ന നേട്ടമാണ് ന്യൂസിലൻഡ് ബാറ്റർ ഗ്ലെൻ ഫിലിപ്സ് സ്വന്തമാക്കിയത്.
ഇന്ത്യക്കെതിരായ ആദ്യ ടെസ്റ്റിന്റെ ആദ്യ ഇന്നിംഗ്സിൽ ഇന്നലെ സെഞ്ചുറി നേടിയതോടെയാണ് ഫിലിപ്സ് ഈ നാഴികക്കല്ല് പിന്നിട്ടത്. ഈ വർഷം ആദ്യം ഇന്ത്യക്കെതിരേ ഏകദിനത്തിലും ട്വന്റി20യിലും സെഞ്ചുറികൾ നേടിയതിന് പിന്നാലെയാണ് ഒന്നാം ടെസ്റ്റിന്റെ ആദ്യ ഇന്നിംഗ്സിലും ഫിലിപ്സ് മൂന്നക്കം കടന്നത്.
2026 ജനുവരി 18ന് ഇൻഡോറിൽ നടന്ന ഏകദിനത്തിൽ ഇന്ത്യക്കെതിരേ 106 റണ്സ് നേടിയ ഫിലിപ്സ് ഒക്്ടോബർ 30ന് ഓക്ലൻഡിൽ നടന്ന ട്വന്റി20 മത്സരത്തിൽ വെറും 49 പന്തിൽ 107 റണ്സടിച്ച് തിളങ്ങിയിരുന്നു.
ഒരു കലണ്ടർ വർഷത്തിൽ ഒരേ എതിരാളികൾക്കെതിരേ ടെസ്റ്റ്, ഏകദിനം, ട്വന്റി20 എന്നീ മൂന്ന് ഫോർമാറ്റുകളിലും സെഞ്ചുറി നേടുന്ന ലോകത്തെ രണ്ടാമത്തെ താരം കൂടിയാണ് ഫിലിപ്സ്.
2017ൽ ശ്രീലങ്കയ്ക്കെതിരേ ഈ നേട്ടം കൈവരിച്ച മുൻ ഇന്ത്യൻ നായകൻ രോഹിത് ശർമയാണ് ഒന്നാമത്. കൂടാതെ ഒരേ എതിരാളികൾക്കെതിരേ മൂന്ന് ഫോർമാറ്റുകളിലും സെഞ്ചുറി നേടുന്ന ആദ്യ ന്യൂസിലൻഡ് ബാറ്ററെന്ന നേട്ടവും ഫിലിപ്സ് ഈ ഇന്നിംഗ്സിലൂടെ സ്വന്തമാക്കി.
Tags : Glenn Phillips record India Test Cricket Sports New Zeland