മാമ്പറ്റ വട്ടോളിപ്പറമ്പ് റോഡിലിറങ്ങിയ കാട്ടുപന്നിക്കൂട്ടം.
മുക്കം: കോഴിക്കോടിന്റെ കിഴക്കൻ മലയോര മേഖലയിൽ വന്യജീവി ശല്യം രൂക്ഷമാകുന്നതിനിടെ മുക്കം നഗരസഭാ പരിധിയിലെ ജനവാസ മേഖലയിൽ കാട്ടുപന്നിക്കൂട്ടം ഇറങ്ങിയത് നാട്ടുകാരിൽ ആശങ്കയുയർത്തി. മാമ്പറ്റ വട്ടോളിപ്പറമ്പ് റോഡിലാണ് കഴിഞ്ഞ ദിവസം രാത്രി ഒരു കൂട്ടം കാട്ടുപന്നികളെ കണ്ടെത്തിയത്. നിരവധി വാഹനങ്ങളും കാൽനടയാത്രക്കാരും കടന്നുപോകുന്ന റോഡിൽ കാട്ടുപന്നിക്കൂട്ടം ഇറങ്ങിയത് യാത്രക്കാർക്ക് വലിയ ഭീഷണിയാണ് ഉയർത്തുന്നത്. പ്രത്യേകിച്ച് രാത്രികാലങ്ങളിൽ ഇതുവഴി സഞ്ചരിക്കുന്ന ഇരുചക്ര വാഹനയാത്രക്കാർ അപകടഭീഷണിയിലാണ്.
നേരത്തെയും ഇതേ സ്ഥലത്ത് ഇരുചക്ര വാഹനത്തിൽ യാത്ര ചെയ്യുകയായിരുന്ന ഒരാളുടെ മുന്നിലേക്ക് കാട്ടുപന്നി ചാടിയതിനെ തുടർന്ന് അപകടമുണ്ടാവുകയും യാത്രക്കാരന് ഗുരുതരമായി പരിക്കേൽക്കുകയും ചെയ്തിരുന്നു. കഴിഞ്ഞ ദിവസം ഇതുവഴി യാത്ര ചെയ്തവരാണ് റോഡിലിറങ്ങിയ കാട്ടുപന്നിക്കൂട്ടത്തിന്റെ ദൃശ്യങ്ങൾ പകർത്തിയത്.
ജനവാസ മേഖലകളിലേക്ക് കാട്ടുപന്നികൾ കൂട്ടത്തോടെ എത്തുന്നത് പ്രദേശവാസികളുടെ ആശങ്ക വർധിപ്പിക്കുകയാണ്. കാട്ടുപന്നി ശല്യം നിയന്ത്രിക്കുന്നതിന്റെ ഭാഗമായി മുക്കം നഗരസഭയുടെ നേതൃത്വത്തിൽ എംപാനൽ ഷൂട്ടർമാരെ ഉപയോഗിച്ച് പന്നിവേട്ട ഉൾപ്പെടെയുള്ള നടപടികൾ സ്വീകരിച്ചിരുന്നെങ്കിലും ശല്യത്തിന് കാര്യമായ കുറവുണ്ടായിട്ടില്ലെന്നാണ് നാട്ടുകാർ പറയുന്നത്.
കാട്ടുപന്നികൾ കൃഷിയിടങ്ങളിലെത്തി വ്യാപകമായി കൃഷി നശിപ്പിക്കുന്നതോടെ കർഷകരും കടുത്ത ദുരിതത്തിലാണ്. ജനവാസ മേഖലകളിലും പൊതുറോഡുകളിലും കാട്ടുപന്നികൾ ഇറങ്ങുന്നത് മനുഷ്യജീവനും സ്വത്തിനും കൃഷിക്കും ഒരുപോലെ ഭീഷണിയാകുന്ന സാഹചര്യത്തിൽ ശല്യം നിയന്ത്രിക്കാൻ അടിയന്തരവും ഫലപ്രദവുമായ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
Tags : wild boars Nattuvishesham DistrictNews Mukkam