നിലവറദീപം തെളിക്കല് ചടങ്ങ് മോന്സ് ജോസഫ് ഉദ്ഘാടനം ചെയ്യുന്നു.
ചക്കുളത്തുകാവ്: പ്രസിദ്ധ തീര്ഥാടന കേന്ദ്രമായ ചക്കുളത്തുകാവ് ശ്രീഭഗവതി ക്ഷേത്രത്തിലെ കാര്ത്തിക പൊങ്കാല മഹോത്സവത്തിന് മുന്നോടിയായി നിലവറദീപം തെളിഞ്ഞു. തുടര്ന്ന് പൊങ്കാലയുടെ വരവറിയിച്ച് വിളംബര ഘോഷയാത്രയും നടന്നു. ഇനി വ്രതശുദ്ധിയുടെയും പ്രാര്ഥനയുടെയും പുണ്യനാളുകളിലേക്ക് കടക്കുകയാണ് ഭക്തജനങ്ങള്.
രാവിലെ 4.30ന് വിശേഷാല് പൂജകളോടെ ചടങ്ങുകള് ആരംഭിച്ചു. തുടര്ന്ന് 9.30ന് ക്ഷേത്രം കാര്യദര്ശി മണിക്കുട്ടന് നമ്പൂതിരിയുടെ നേതൃത്വത്തില് മുഖ്യകാര്യദര്ശി രാധാകൃഷ്ണന് നമ്പൂതിരി നിലവറദീപം തെളിച്ചു. തുടര്ന്ന് ക്ഷേത്രനടയില് നടന്ന ദീപപ്രകാശനവും ഭക്തജനസംഗമവും മന്ത്രി മോന്സ് ജോസഫ് ഉദ്ഘാടനം ചെയ്തു. റെജി ചെറിയാന് എംഎല്എ അധ്യക്ഷത വഹിച്ചു. പൊങ്കാല മഹോത്സവത്തിന്റെ വിളംബര ഘോഷയാത്ര തലവടി പഞ്ചായത്ത് പ്രസിഡന്റ് ബാബു വലിയവീടന് ഉദ്ഘാടനം ചെയ്തു. ബിജെപി സംസ്ഥാന ജനറല് സെക്രട്ടറി അനൂപ് ആന്റണി മുഖ്യാതിഥിയായി പങ്കെടുത്തു. തലവടി പഞ്ചായത്ത് ജനപ്രതിനിധികളായ ഗോകുല് ഗോപാലകൃഷ്ണന്, ബി. രമേശ് കുമാര്, മണിദാസ് വാസു, സുരേഷ് കാവുംഭാഗം എന്നിവര് പ്രസംഗിച്ചു.
തുടര്ന്ന് നടന്ന വിളംബര ഘോഷയാത്രയ്ക്ക് ക്ഷേത്രം മേല്ശാന്തിമാരായ അശോകന് നമ്പൂതിരി, രഞ്ജിത്ത് ബി. നമ്പൂതിരി, ദുര്ഗാദത്തന് നമ്പൂതിരി, ഹരിക്കുട്ടന് നമ്പൂതിരി, രമേശ് ഇളമണ് നമ്പൂതിരി എന്നിവര് കാര്മികത്വം വഹിച്ചു. ജനറല് കണ്വീനര് അജിത്ത് പിഷാരത്ത്, ഉത്സവ കമ്മിറ്റി പ്രസിഡന്റ് സന്തോഷ് ഗോകുലം, വൈസ് പ്രസിഡന്റ് പി.കെ. സ്വാമിനാഥന്, സെക്രട്ടറി എം.വി. രാജീവ്, വോളന്ററിയര് ക്യാപ്റ്റന് കെ.എസ്. ബിനു എന്നിവര് പരിപാടികള്ക്ക് നേതൃത്വം നല്കി.
പ്രസിദ്ധമായ ചക്കുളത്തുകാവ് പൊങ്കാല 24ന് നടക്കും. പുലര്ച്ചെ നാലിന് നിര്മാല്യദര്ശനവും അഷ്ടദ്രവ്യ മഹാഗണപതി ഹോമവും ഒന്പതിന് വിളിച്ചു ചൊല്ലി പ്രാര്ഥനയും തുടര്ന്ന് ക്ഷേത്ര ശ്രീകോവിലിലെ കെടാവിളക്കില് നിന്നും ക്ഷേത്ര കാര്യദര്ശി മണിക്കുട്ടന് നമ്പൂതിരി കൊടിവിളക്കിലേക്ക് ദീപം പകരും, തുടര്ന്ന് നടപ്പന്തലില് പ്രത്യേകം തയാറാക്കിയ പണ്ടാര പൊങ്കാല അടുപ്പിലേക്ക് മുഖ്യകാര്യദര്ശി രാധാകൃഷ്ണന് നമ്പൂതിരി അഗ്നി പ്രോജ്വലിപ്പിച്ചുകൊണ്ട് പൊങ്കാലയ്ക്ക് തുടക്കം കുറിക്കും.
ക്ഷേത്ര കാര്യദര്ശി മണിക്കുട്ടന് നമ്പൂതിരിയുടെ അധ്യക്ഷതയില് നടക്കുന്ന ഭക്തജന സംഗമത്തില് മന്ത്രി രമേശ് ചെന്നിത്തല പൊങ്കാലയുടെ ഉദ്ഘാടനം നിരവഹിക്കും.
റെജി ചെറിയാന് എംഎല്എ ആമുഖപ്രഭാഷണവും, കൊടിക്കുന്നില് സുരേഷ് എംപി പൊങ്കാലയുടെ സന്ദേശവിവരണവും മാന്നാര് അബ്ദുള് ലത്തീഫ് മുഖ്യപ്രഭാഷണവും നടത്തും.
ക്ഷേത്ര മേല്ശാന്തി അശോകന് നമ്പൂതിരിയുടെ മുഖ്യകാര്മികത്വത്തില് ട്രസ്റ്റിമാരായ രഞ്ജിത്ത് ബി. നമ്പൂതിരി, ദുര്ഗാദത്തന് നമ്പൂതിരി എന്നിവരുടെ നേതൃത്വത്തില് പൊങ്കാല സമര്പണ ചടങ്ങുകള് നടക്കും. ഭക്തര് തയാറാക്കിയ നിവേദ്യം വേദപണ്ഡിതന്മാരുടെ നേത്യത്വത്തില് നേദിക്കും. തുടര്ന്ന് പ്രസിദ്ധമായ ഉച്ച ദീപാരാധനയും അഭിഷേകവും നടക്കും.
ചക്കുളത്തുകാവിൽ മെഡിക്കൽ സേവനം സജ്ജമാക്കും
ചക്കുളത്തുകാവ്: ചക്കുളത്തുകാവ് ഭഗവതി ക്ഷേത്രത്തിലെ പൊങ്കാലയോടനുബന്ധിച്ച് ആരോഗ്യ വകുപ്പിന്റെ മെഡിക്കൽ സേവനം രണ്ട് ദിവസങ്ങളിൽ സജ്ജമാക്കും.
അടിയന്തര ചികിത്സാ വിഭാഗം, ആംബുലൻസ്, ആരോഗ്യ സ്ക്വാഡ് എന്നിവയാണ് സജ്ജമാക്കുന്നത്. 23, 24 തിയതികളിൽ പ്രത്യേക മെഡിക്കൽ സേവനം ലഭ്യമാക്കാൻ ജില്ലാ മെഡിക്കൽ ഓഫിസർ ഉത്തരവിട്ടു.
ഇതിന്റെ ഭാഗമായി തലവടി കുടുംബാരോഗ്യ കേന്ദ്രം (എഫ്എച്ച്സി) രണ്ട് ദിവസങ്ങളിലും രാവിലെ ഒന്പത് മുതൽ വൈകിട്ട് ആറു വരെ പ്രവർത്തിക്കും. ആവശ്യമായ ജീവനക്കാരെ ചെമ്പുംപുറം ബ്ലോക്ക് മെഡിക്കൽ ഓഫിസറുടെ നേതൃത്വത്തിൽ നിയോഗിക്കും.
പൊങ്കാലയോടനുബന്ധിച്ചുള്ള ആരോഗ്യപ്രവർത്തനങ്ങൾ ഏകോപിപ്പിക്കുന്നതിന് ഡെപ്യൂട്ടി ജില്ലാ മെഡിക്കൽ ഓഫിസർ ഡോ എം. അനന്ത് ജില്ലാ നോഡൽ ഓഫിസറായും തലവടി കുടുംബാരോഗ്യ കേന്ദ്രം മെഡിക്കൽ ഓഫിസർ പ്രാദേശിക നോഡൽ ഓഫിസറായും പ്രവർത്തിക്കും.
ക്ഷേത്രപരിസരത്ത് ആംബുലൻസ് സേവനം ലഭ്യമാക്കുന്നതിനും ഡ്രൈവർമാരുൾപ്പെടെയുള്ള ജീവനക്കാരെ നിയോഗിക്കുന്നതിനും നിർദേശമുണ്ട്. ആംബുലൻസിന്റെ പ്രവർത്തനം തലവടി കുടുംബാരോഗ്യ കേന്ദ്രം മെഡിക്കൽ ഓഫിസറുടെ നിയന്ത്രണത്തിലായിരിക്കും.
അടിയന്തര സാഹചര്യങ്ങൾ നേരിടുന്നതിനായി ചെങ്ങന്നൂർ ജില്ലാ ആശുപത്രിയിൽ അത്യാഹിത വിഭാഗവും സജ്ജമാക്കും. ക്ഷേത്രപരിസരത്തും പരിസരപ്രദേശങ്ങളിലും കൊതുകുനിവാരണ പ്രവർത്തനങ്ങളും ഉറവിട നശീകരണവും നടത്തുന്നതിന് ജില്ലാ കൺട്രോൾ യൂണിറ്റിനെയും ചുമതലപ്പെടുത്തിയിട്ടുണ്ട്. കുടിവെള്ളത്തിന്റെയും ഭക്ഷ്യവസ്തുക്കളുടെയും സുരക്ഷ ഉറപ്പാക്കുന്നതിനും പൊതുജനാരോഗ്യ പ്രവർത്തനങ്ങൾ ഏകോപിപ്പിക്കുന്നതിനുമായി പ്രത്യേക ആരോഗ്യ സ്ക്വാഡിനെയും നിയോഗിച്ചു.
22ന് സ്ക്വാഡ് ക്ഷേത്രപരിസരത്ത് പരിശോധന നടത്തും. പൊങ്കാല ദിവസങ്ങളിൽ തലവടി കുടുംബാരോഗ്യ കേന്ദ്രത്തിന്റെ പരിസരം വാഹന പാർക്കിംഗ് ഗ്രൗണ്ടായി ഉപയോഗിക്കേണ്ട സാഹചര്യമുണ്ടായാൽ ആശുപത്രിയിലെ അടിയന്തര സേവനങ്ങൾക്ക് തടസമുണ്ടാകാത്ത വിധം പഞ്ചായത്ത് അധികൃതരും ക്ഷേത്രഭാരവാഹികളും ആവശ്യമായ ക്രമീകരണങ്ങൾ ഏർപ്പെടുത്തണമെന്നും ജില്ലാ മെഡിക്കൽ ഓഫിസർ നിർദേശിച്ചിട്ടുണ്ട്.
കുട്ടനാട് റേഞ്ചിലെ 17 മദ്യശാലകൾ അടച്ചിടാൻ ഉത്തരവായി
ചക്കുളത്തുകാവ്: ചക്കുളത്തുകാവ് പൊങ്കാലയുമായി ബന്ധപ്പെട്ട് ക്ഷേത്രത്തിന്റെ സമീപ പ്രദേശത്തുള്ള കുട്ടനാട് റേഞ്ചിലെ നടുവിലെ മുറി, കൊച്ചമ്മനം, എടത്വ, കുളങ്ങര, പച്ചേമുറി, കോഴിമുക്ക്, മുട്ടാർ, ആനപ്രമ്പാൽ തെക്ക്, പാണ്ടങ്കരി, മാവേലിത്തുരുത്ത്, മിത്രക്കരി തെക്ക്, കൈതത്തോട്, ഇന്ദ്രങ്കരി, കേളമംഗലം, തകഴി വിദേശ മദ്യ വില്പനശാല, പാഷൻ ഹോസ്പിറ്റാലിറ്റി ബാർ, കൃഷ്ണ റെസിഡൻസി - ബാർ എന്നീ 17 മദ്യശാലകളും ബിവറേജസ് കോർപ്പറേഷന്റെ തകഴി ഔട്ട് ലെറ്റും 23, 24 തീയതികളിൽ പൂർണമായും അടച്ചിടാൻ ജില്ലാ കളക്ടർ ഉത്തരവിട്ടു.
ഉത്തരവ് കർശനമായി പാലിക്കുന്നുണ്ടെന്ന് ജില്ലാ പൊലിസ് മേധാവി, ഡെപ്യൂട്ടി കമ്മിഷണർ എക്സൈസ്, തഹസിൽദാർ കുട്ടനാട് എന്നിവർ ഉറപ്പ് വരുത്തണമെന്നും ജില്ലാ കളക്ടർ ഷാജി വി. നായർ അറിയിച്ചു.
Tags : Pongala on the 24th NattuVishesham DistricteNews