മൂവാറ്റുപുഴ: നഗരസഭ സ്റ്റേഡിയത്തിൽ നടക്കുന്ന ഫെസ്റ്റ് വണ്ടർ വേൾഡിൽ ശാരീരിക, മാനസിക വെല്ലുവിളികൾ നേരിടുന്നവർക്ക് പ്രവേശനം സൗജന്യം.
വീൽ ചെയർ, മുച്ചക്ര മോട്ടോർ സൈക്കിൾ എന്നിവയിൽ സഞ്ചരിക്കുന്നവർ, സംസാര, കേൾവി പരിമിതികൾ ഉളളവർ, ഭിന്നശേഷിക്കാർ, അംഗ വൈകല്യമുളളവർ തുടങ്ങിയവർക്കാണ് സൗജന്യമെന്ന് സംഘാടകർ പറഞ്ഞു.
അന്പതിനായിരം ചതുരശ്ര അടി വിസ്തീർണമുളള പന്തലിലാണ് നഗരസഭയുടെ സഹകരണത്തോടെ ഫെസ്റ്റ് നടക്കുന്നത്. അവധിക്കാലം കുട്ടികൾക്ക് ആഹ്ലാദകരമാക്കുകയാണ് ലക്ഷ്യം.
ദൃശ്യ വിസ്മയങ്ങളും അമ്യൂസ്മെന്റ് പാർക്കും ഫുഡ് കോർട്ടും വാണിജ്യ സ്റ്റാളുകളും കുട്ടികളേയും മുതിർന്നവരേയും ഒരുപോലെ ആകർഷിക്കുന്ന കൗതുക ഗയിമുകളും ഫെസ്റ്റിലുണ്ട്.
ബാഹുബലി ചലച്ചിത്ര പ്രവർത്തകർ അണിയിച്ചൊരുക്കിയ ലണ്ടൻ സിറ്റി വിസ്മയ കാഴ്ചയാണ്.
കോഫി ഷോപ്പുകളും ടെലിഫോണ് ബൂത്തുകളും റീഡിംഗ് റൂമും പെറ്റ് ഷോപ്പും അടക്കം ഇരുനിലകളിലായി ലണ്ടൻ സിറ്റിയെ ഒപ്പി എടുത്തിരിക്കുന്നതാണ് നിർമിതി. ജയിംസ് കാമറൂണ് സംവിധാനം ചെയ്ത വിഖ്യാത ചലച്ചിത്രം അവതാർ രണ്ടിന്റെ പുനരാവിഷ്കാരം കുട്ടികൾക്ക് കൗതുകം സമ്മാനിക്കും. റോബോട്ടിക് സൂവും ഒരുക്കിയിട്ടുണ്ട്.
വിവിധ സംസ്ഥാനങ്ങളിൽ നിന്നുളള തുണിത്തരങ്ങൾ, ഫർണിച്ചറുകൾ, കരകൗശല വസ്തുക്കൾ, കളിപ്പാട്ടങ്ങൾ ആയൂർവേദ ഉത്പന്നങ്ങൾ, ആദ്യകാല മിഠായികൾ, വിപുലമായ പുസ്തക ശേഖരം, ഗൃഹോപകരണങ്ങൾ, വിവിധ തരം ജ്യൂസ് സ്റ്റാളുകൾ എന്നിവ ഫെസ്റ്റിലുണ്ട്.
വനിതകൾ അടക്കം കാർ, മോട്ടോർ ബൈക്ക് എന്നിവയിൽ മരണകിണറിൽ നടത്തുന്ന പ്രകടനവും ശ്രദ്ധേയമാണ്. ഡിസ്നി ലാന്ഡ്, ആകാശ ഊഞ്ഞാൽ, ട്രാഗണ് ട്രയിൻ, ഡിസ്കോ എന്നിവയും കുട്ടികൾക്കുളള വിവിധ റൈഡുകളും ഫെസ്റ്റിനെ വേറിട്ടതാക്കുന്നു.