2

തിരുവനന്തപുരം: മന്ത്രിമാരെ വഴിതടഞ്ഞും അക്രമിച്ചും നാട്ടില്‍ കലാപമഴിച്ചുവിടാന്‍ സിപിഎം-ഡിവൈഎഫ്ഐ നേതൃത്വം ശ്രമിക്കുന്നുണ്ടെന്നും ഇതിന് പിന്നില്‍ ആസൂത്രിതമായ ഗൂഢാലോചനയുണ്ടെന്നും ആഭ്യന്തരമന്ത്രി രമേശ് ചെന്നിത്തല.

അധികാരം നഷ്ടപ്പെട്ടതിന്‍റെ വിഭ്രാന്തിയില്‍ നടത്തുന്ന ഇത്തരം ഗുണ്ടായിസങ്ങള്‍ സര്‍ക്കാര്‍ ഒരു കാരണവശാലും അനുവദിക്കില്ലെന്നും സംഭവത്തില്‍ സമഗ്രമായ അന്വേഷണം പുരോഗമിക്കുകയാണെന്നും അദ്ദേഹം അറിയിച്ചു.

കുറ്റക്കാര്‍ക്കെതിരെ കര്‍ശന നടപടി സ്വീകരിക്കുമെന്നും നാടിന്‍റെ സമാധാനം തകര്‍ക്കാനുള്ള നീക്കങ്ങളെ കര്‍ശനമായി നേരിടുമെന്നും മന്ത്രി മുന്നറിയിപ്പ് നല്‍കി.

കണ്ണൂരില്‍വച്ച് മുന്‍ മുഖ്യമന്ത്രി ഉമ്മൻ ചാണ്ടിയെ കല്ലെറിഞ്ഞ് പരിക്കേല്‍പ്പിച്ചതും, മന്ത്രിയായിരിക്കെ എം.വി രാഘവനെ വിവിധയിടങ്ങളില്‍ ആക്രമിച്ചതുമായ പഴയ ശൈലി തന്നെയാണ് സിപിഎം ഇപ്പോഴും തുടരുന്നത്. ഇന്ന് കായികമന്ത്രി ഒ.ജെ. ജനീഷിനെ കണ്ണൂരിലെ വിവിധയിടങ്ങളില്‍ ആക്രമിച്ചതും ഇതേ ശൈലിയുടെ ഭാഗമായാണ്.

ബിജെപിയും സിപിഎമ്മും ഒരേ മനസോടെയാണ് ഇപ്പോള്‍ ക്രമസമാധാനം തകര്‍ക്കാന്‍ ശ്രമിക്കുന്നത്. ഇതിന്‍റെ ഉദാഹരണമാണ് ബുധനാഴ്ച യുവമോര്‍ച്ച പ്രവര്‍ത്തകര്‍ നടുറോഡില്‍ മന്ത്രി കെ.എം ഷാജിയെ തടഞ്ഞ് ആക്രമിക്കാന്‍ ശ്രമിച്ചതെന്നും ചെന്നിത്തല കുറ്റപ്പെടുത്തി.

Tags : Conspiracy RameshChennithala Ministers Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash