കൊച്ചി : നഴ്സിംഗ് ജോലി ലൈംഗികവത്കരിക്കെപ്പെട്ട തൊഴിലാണെന്ന ബിജെപി എംപിയും നടിയുമായ കങ്കണ റണാവത്തിന്റെ വിവാദ പരാമർശത്തിനെതിരെ കോൺഗ്രസ് നേതാവ് ദീപ്തി മേരി വർഗീസ്. നഴ്സിംഗ് മേഖലയെയും ഈ തൊഴിൽ ആത്മാർത്ഥതയോടെ നിർവഹിക്കുന്ന ലക്ഷക്കണക്കിന് നഴ്സുമാരുടെ ആത്മാഭിമാനത്തെയും കങ്കണയുടെ പ്രസ്താവന മുറിപ്പെടുത്തിയെന്ന് ദീപ്തി ഫേസ്ബുക്കിൽ കുറിച്ചു.
ചീപ്പ് പബ്ലിസിറ്റിക്കും പുതിയ സിനിമയുടെ പ്രമോഷനും വേണ്ടി സ്വന്തം പാർട്ടിയിലെ പ്രവർത്തകരുടെ പോലും ആത്മാഭിമാനം പണയം വെക്കുന്ന എംപിക്കെതിരെ ബിജെപി പ്രവർത്തകർ തന്നെ രംഗത്തുവരണമെന്ന് ദീപ്തി പറഞ്ഞു.
നഴ്സുമാർ കേവലം ഒരു തൊഴിൽ വിഭാഗമല്ല, മനുഷ്യജീവൻ രക്ഷിക്കുന്ന കരുണയുടെ കൈകളാണ്. കോവിഡ് കാലത്ത് ലോകം ആദരിച്ച അതേ വിഭാഗത്തെയാണ് ഒരു ജനപ്രതിനിധി അപമാനകരമായ വാക്കുകൾ കൊണ്ട് വേട്ടയാടുന്നത്. ഇത്തരം വികലമായ കാഴ്ചപ്പാടുകൾ സമൂഹത്തിന് വേണ്ടെന്നും ദീപ്തിയുടെ കുറിപ്പിൽ പറയുന്നു.
Tags : deepti mary varghese kangana ranaut nursing