Deepika
ADVERTISEMENT
തിരുവനന്തപുരം: നിയമസഭാ തെരഞ്ഞെടുപ്പിന് മണിക്കൂറുകള് അവശേഷിക്കേ മുഖ്യമന്ത്രി പിണറായി വിജയനോട് 10 ചോദ്യങ്ങളുമായി കെ.സി. വേണുഗോപാല് എംപി. ചോദ്യങ്ങള് അടങ്ങുന്ന കത്ത് കെ.സി. വേണുഗോപാല് മുഖ്യമന്ത്രിക്ക് അയച്ചു.
ഉദ്യോഗസ്ഥരെ ഒഴിവാക്കി ഡല്ഹിയില് കേന്ദ്ര ആഭ്യന്തര മന്ത്രി അമിത് ഷായുമായി അദ്ദേഹത്തിന്റെ വസതിയില് മുഖ്യമന്ത്രി കൂടിക്കാഴ്ച നടത്തിയതിനു പിന്നിലെ അജന്ഡ എന്തായിരുന്നു എന്നതാണ് ആദ്യ ചോദ്യം.
ഡല്ഹിയില് കേരള ഹൗസില് ഇതേ പോലെ ഉദ്യോഗസ്ഥരെ ഒഴിവാക്കി കേന്ദ്ര ധനമന്ത്രി നിര്മല സീതാരാമന് മുഖ്യമന്ത്രി പ്രഭാത ഭക്ഷണ വിരുന്നു നല്കിയത് എന്തു ‘ഡീല്’ ഉറപ്പിക്കാനായിരുന്നുവെന്നും വേണുഗോപാല് ചോദിക്കുന്നു. കേന്ദ്രമന്ത്രി നിതിന് ഗഡ്കരിയുമായി മുഖ്യമന്ത്രി ഡല്ഹിയില് പല തവണ ഔദ്യോഗിക കൂടിക്കാഴ്ച നടത്തിയിട്ടുണ്ട്.
പക്ഷേ, ഡല്ഹിക്കു പുറത്ത് മുഖ്യമന്ത്രി ഗഡ്കരിയുമായി കൂടിക്കാഴ്ച നടത്തിയിട്ടുണ്ടെങ്കില് അത് ഡീലിന്റെ ഭാഗം ആയിരുന്നോ എന്നും കത്തില് ചോദിക്കുന്നു.
പിഎം ശ്രീ പദ്ധതി കേരളത്തില് നടപ്പാക്കുന്നതിനെതിരേ സിപിഐയുടെയും അവരുടെ മന്ത്രിമാരുടെയും പരസ്യ എതിര്പ്പിനെ മറികടന്ന് ബിജെപിയുമായി ധാരണയിലെത്തി കരാറില് ഏര്പ്പെട്ടത് എന്തു ഡീല് ആണെന്നും കേന്ദ്രസര്ക്കാര് കൊണ്ടുവന്ന ലേബര്കോഡ് വിഷയത്തിലും എല്ഡിഎഫിലെ ഘടകകക്ഷികളെ വിശ്വാസത്തിലെടുക്കാതെ അതീവരഹസ്യമായി ലേബര് കോഡിനു ചട്ടങ്ങള് രൂപീകരിക്കുകയും നടപടികളുമായി മുന്നോട്ടു പോകുകയും ചെയ്തത് ആരെ പേടിച്ചാണെന്നും കത്തില് ചോദിക്കുന്നു.
മുഖ്യമന്ത്രിയുടെ മറുപടിക്കായി കാത്തിരിക്കുന്നതായി പറഞ്ഞുകൊണ്ടാണ് കെ.സി. വേണുഗോപാല് കത്ത് അവസാനിപ്പിക്കുന്നത്.
സംസ്ഥാനത്തെ ദുരിതത്തിലാക്കിയ മഹാപ്രളയം മനഃപൂര്വം സൃഷ്ടിച്ചതാണെന്നു വെളിപ്പെടുത്തുന്ന മന്ത്രിയുടെ ശബ്ദരേഖയിലെ ഉള്ളടക്കം സംബന്ധിച്ച് വരാന് പോകുന്ന യുഡിഎഫ് സര്ക്കാര് അന്വേഷിക്കുമെന്ന് എഐസിസി ജനറല് സെക്രട്ടറി കെ.സി. വേണുഗോപാല് എംപി വാർത്താസമ്മേളനത്തില് പറഞ്ഞു.
പ്രളയമുണ്ടാക്കാന് വേണ്ടി അണക്കെട്ടുകള് അടച്ചിട്ടുവെന്നാണ് മന്ത്രിയുടെ ശബ്ദരേഖ. ഇതുകേട്ട് താന് ഞെട്ടിത്തരിച്ചുപോയി. കേരളത്തെ കൃത്രിമ പ്രളയത്തിലേക്ക് വലിച്ചിഴച്ചവര് അതിനു സമാധാനം പറയേണ്ടി വരുമെന്നും വേണുഗോപാല് പറഞ്ഞു.
ഉത്തരേന്ത്യന് സംസ്ഥാനങ്ങളില് ചെയ്തതുപോലെ ജനങ്ങളെ മതത്തിന്റെ അടിസ്ഥാനത്തില് ഭിന്നിപ്പിച്ച് കേരളത്തിലെ സാമൂഹികജീവിതം കലുഷിതമാക്കാന് ബിജെപി നടത്തുന്ന ശ്രമങ്ങള്ക്ക് സിപിഎം കൂട്ടുനില്ക്കുകയാണെന്നും വേണുഗോപാല് കുറ്റപ്പെടുത്തി.
ബിജെപി സംസ്ഥാന അധ്യക്ഷനും സിപിഎം പോളിറ്റ്ബ്യൂറോ അംഗവും കേരളത്തില് നടത്തിയ ഒരേ സ്വഭാവമുള്ള വര്ഗീയ പ്രസ്താവന അതിന് തെളിവാണ്. രണ്ട് പ്രസ്താവനയും ഒരേ കേന്ദ്രത്തില് തയാറാക്കിയതാണ്. കേരളത്തില് സിപിഎമ്മും ബിജെപിയും തമ്മിലുള്ള ഡീല് ഇതോടെ കൂടുതല് വ്യക്തമായി.
വടക്കേ ഇന്ത്യയില് ബിജെപി പരീക്ഷിച്ച് വിജയിച്ച വിഭജന തന്ത്രത്തിന് കേരളത്തില് കമ്യൂണിസ്റ്റ് നേതാക്കള് തന്നെ കൂട്ടുനില്ക്കുന്നത് അപകടകരമാണ്. കേരളത്തെ മോശമായി ചിത്രീകരിച്ച ‘കേരള സ്റ്റോറി’ എന്ന സിനിമ കാണാന് കൂട്ടാക്കാതെ തിരസ്കരിച്ചവരാണ് കേരള ജനത. കേരളത്തെ വര്ഗീയമായി വിഭജിക്കാന് സിപിഎമ്മും ബിജെപിയും ചേര്ന്നു നടത്തുന്ന നീക്കങ്ങള്ക്കു കേരളം ഈ തെരഞ്ഞെടുപ്പില് കൃത്യമായ മറുപടി നല്കുമെന്നും അദ്ദേഹം പറഞ്ഞു.
Tags : K.C. Venugopal minister's speech investigation Flood Kerala Assembly Election Niyama Sabha Election Chief Minister sends letter
ADVERTISEMENT
ADVERTISEMENT
ADVERTISEMENT
ADVERTISEMENT
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN
Email
Facebook
Whatsapp
Linked In
Telegram