ന്യൂഡൽഹി: നീറ്റ് പുനഃപരീക്ഷയുടെ തയാറെടുപ്പുകൾ കേന്ദ്ര വിദ്യാഭ്യാസമന്ത്രിയുടെ അധ്യക്ഷതയിലുള്ള ഉന്നതതല സമിതി വിലയിരുത്തി. ചോദ്യപേപ്പർ ചോർച്ചയെത്തുടർന്ന് റദ്ദാക്കപ്പെട്ട പരീക്ഷ വീണ്ടും നടത്തുന്നതിനു മുന്നോടിയായി വിദ്യാഭ്യാസ മന്ത്രാലയത്തിലെ ഉന്നത ഉദ്യോഗസ്ഥർ, സംസ്ഥാന സർക്കാർ പ്രതിനിധികൾ, ദേശീയ പരീക്ഷാ ഏജൻസി , ഉന്നത വിദ്യാഭ്യാസ സ്ഥാപനങ്ങൾ എന്നിവിടങ്ങളിലെ ഉദ്യോഗസ്ഥരാണ് ധർമേന്ദ്ര പ്രധാന്റെ അധ്യക്ഷതയിൽ യോഗം ചേർന്നത്.
പുനഃപരീക്ഷാ പ്രക്രിയയുമായി ബന്ധപ്പെട്ട പ്രവർത്തനങ്ങൾ ഏകോപിപ്പിക്കുന്നതിനായി വിദ്യാഭ്യാസ മന്ത്രാലയം നിയോഗിച്ച ഉദ്യോഗസ്ഥർ എല്ലാ സംസ്ഥാനങ്ങളിലും എത്തുമെന്നും എൻടിഎ ഡിജിക്ക് കീഴിലുള്ള കമാൻഡ് സെന്ററിന് റിപ്പോർട്ട് ചെയ്യുമെന്നും ധർമേന്ദ്ര പ്രധാൻ യോഗത്തിൽ അറിയിച്ചിട്ടുണ്ട്. സമ്മർദരഹിതമായി വിദ്യാർഥികൾക്ക് പുനഃപരീക്ഷ എഴുതുന്നതിനാവശ്യമായ എല്ലാ സൗകര്യങ്ങളും സംസ്ഥാന സർക്കാരുകളുടെ നോഡൽ ഉദ്യോഗസ്ഥർ ഉറപ്പാക്കണമെന്നും മന്ത്രി ആവശ്യപ്പെട്ടിട്ടുണ്ട്.
Tags : NEET re-exam Preparation