‘വീട്ടിൽ വോട്ട് ’ തുറന്ന സഞ്ചിയിലേതു ഗുരുതരമെന്നു കോണ്‍ഗ്രസ്; ക്രമക്കേടില്ലെന്ന് കമ്മീഷൻ : Deepika.com Kerala News |

തിരുവനന്തപുരം: ലോക്സഭാ തെരഞ്ഞെടുപ്പിൽ വീട്ടിലിരുന്നു വോട്ട് ചെയ്യുന്നവരുടെ ബാലറ്റുകൾ കാരി ബാഗുകളിലും തുറന്ന സഞ്ചികളിലും കൊണ്ടു പോകുന്നതിൽ ഗുരുതര ക്രമക്കേടുണ്ടെന്ന വാദത്തിൽ ഉറച്ചു കോണ്‍ഗ്രസ്.

ഇക്കാര്യത്തിൽ തെരഞ്ഞെടുപ്പു കമ്മീഷന്‍റെ അടിയന്തര ഇടപെടൽ തേടി പ്രതിപക്ഷ നേതാവ് വി.ഡി. സതീശനും പരാതി നൽകി.

വീട്ടിലെ വോട്ടുമായി ബന്ധപ്പെട്ട് ക്രമക്കേടുണ്ടായിട്ടില്ലെന്ന നിലപാടിലാണ് തെരഞ്ഞെടുപ്പു കമ്മീഷൻ. കോണ്‍ഗ്രസ് നൽകിയ പരാതിയുടെ അടിസ്ഥാനത്തിൽ ഹരിപ്പാടുണ്ടായ സംഭവം കമ്മീഷൻ പരിശോധിച്ചു.

എന്നാൽ, ഈ വാഹനത്തിലുണ്ടായിരുന്നത് മറ്റു ബാലറ്റ് പേപ്പറുകൾ അല്ലെന്നും മറ്റു കടലാസുകളാണെന്നുമാണ് മുഖ്യ തെരഞ്ഞെടുപ്പ് ഓഫിസറുടെ നിലപാട്. തെരഞ്ഞെടുപ്പു കമ്മീഷന്‍റെ അന്വേഷണത്തിൽ കണ്ടെത്തിയ കാര്യങ്ങൾ കോണ്‍ഗ്രസിനെ മറുപടിയായി അറിയിക്കും.

വീട്ടിൽ വോട്ട് പദ്ധതിയിൽ ക്രമക്കേടുണ്ടെന്ന് ആരോപിച്ചു കെപിസിസി ആക്ടിംഗ് പ്രസിഡന്‍റ് എം.എം. ഹസൻ തെരഞ്ഞെടുപ്പു കമ്മീഷന് ചൊവ്വാഴ്ച പരാതി നൽകിയിരുന്നു.

സത്യസന്ധവും സുതാര്യവുമായി നടക്കേണ്ട തെരഞ്ഞെടുപ്പ് പ്രക്രിയ അട്ടിമറിക്കപ്പെടാതിരിക്കാൻ വീട്ടിലിരുന്ന് വോട്ട് ചെയ്യുന്നവരുടെ ബാലറ്റുകൾ സീൽ ചെയ്ത പെട്ടികളിലാണ് സൂക്ഷിക്കുന്നതെന്ന് തെരഞ്ഞെടുപ്പ് കമ്മീഷൻ ഉറപ്പാക്കണമെന്ന് ആവശ്യപ്പെട്ടു പ്രതിപക്ഷ നേതാവ് വി.ഡി. സതീശൻ ഇന്നലെ തെരഞ്ഞെടുപ്പു കമ്മീഷന് പരാതി നൽകി.

കഴിഞ്ഞ നിയമസഭാ തെരഞ്ഞെടുപ്പിൽ വീട്ടിൽ വോട്ട് പദ്ധതിയിൽ ക്രമക്കേട് കോണ്‍ഗ്രസ് ആരോപിച്ചിരുന്നു. അതിനു ശേഷം ലോക്സഭാ തെരഞ്ഞെടുപ്പു വന്നിട്ടും തെറ്റു തിരുത്താൻ സംസ്ഥാനത്തിന്‍റെ ചുമതലയുള്ള മുഖ്യ തെരഞ്ഞെടുപ്പ് ഓഫീസറോ മറ്റോ തയാറായില്ലെന്നാണ് യുഡിഎഫിന്‍റെ ആരോപണം.