എടലക്കാട് തിരുക്കുടുംബ കപ്പേളയില്‍
അങ്കമാലി: ഒലിവ്മൗണ്ട് എടലക്കാട് തിരുക്കുടുംബ കപ്പേളയിൽ തിരുനാള്‍ ആഘോഷിച്ചു. ഇന്നലെ വൈകിട്ട് നടന്ന തിരുനാള്‍ ദിവ്യബലിക്ക് ഒലിവ്മൗണ്ട് പള്ളി വികാരി ഫാ. എബിന്‍ ചിറയ്ക്കല്‍ മുഖ്യകാര്‍മികത്വം വഹിച്ചു. പ്രദക്ഷിണം, കരിമരുന്ന് പ്രയോഗം, നേര്‍ച്ചസദ്യ എന്നിവയും ഉണ്ടായിരുന്നു. കൈക്കാരന്‍മാരായ ടോമി കൂനത്താന്‍, പോളിവെമ്പില്‍ കുടുംബ യൂണിറ്റ് വൈസ്‌ ചെയര്‍മാന്‍ ഷിജു പുതുശേരി എന്നിവര്‍ നേതൃത്വം നല്‍കി.
കരിങ്ങാച്ചിറ കത്തീഡ്രലിൽ
തൃപ്പൂണിത്തുറ: ജോർജിയൻ തീർഥാടന കേന്ദ്രമായ കരിങ്ങാച്ചിറ സെന്‍റ് ജോർജ് യാക്കോബായ സുറിയാനി കത്തീഡ്രലിൽ മാർ ഗീവർഗീസ് സഹദായുടെ ഓർമപെരുന്നാൾ തുടങ്ങി.
കുർബാനയെ തുടർന്ന് ജോസഫ് മാർ ഗ്രിഗോറിയോസ് മെത്രാപ്പോലീത്ത കൊടിയേറ്റി. ഫാ. സാംസൻ മേലോത്ത്, ഫാ. ഗ്രിഗർ കൊള്ളിനുർ, ഫാ. ഷൈജു പഴമ്പിള്ളിൽ, ഫാ. ഹെനു തമ്പി കണ്ടേത്തിമറ്റത്തിൽ, ഫാ. ബിനു പൗലോസ് ചാത്തോത്ത് എന്നിവർ സഹകാർമികരായി.
ഇന്ന് രാവിലെ 7.30ന് മൂന്നിന്മേൽ കുർബാന, വൈകിട്ട് 6ന് സന്ധ്യാ പ്രാർഥനയെ തുടർന്ന് ഇരുമ്പനം കുരിശുപള്ളിയിലേക്ക് പ്രദക്ഷിണം.
പ്രധാന പെരുന്നാൾ ദിവസമായ നാളെ രാവിലെ 6.30ന് കുർബാന, 8.30ന് മാത്യൂസ് മാർ ഈവാനിയോസ് മെത്രാപ്പോലീത്തയുടെ നേതൃത്വത്തിൽ മൂന്നിന്മേൽ കുർബാന. 11ന് നേർച്ചസദ്യ, വൈകിട്ട് 6ന് സന്ധ്യാ പ്രാർഥന, ചങ്ങംപുത കുരിശുപള്ളിയിലേക്ക് പ്രദക്ഷിണം, ആശീർവാദം.
താമരച്ചാൽ സെന്‍റ് മേരീസ് പള്ളിയിൽ
കിഴക്കമ്പലം: താമരച്ചാൽ സെന്‍റ് മേരീസ് യാക്കോബായ വലിയ പള്ളിയിൽ മാർ ഗീവർഗീസ് സഹദായുടെയും മറ്റു പരിശുദ്ധന്മാരുടെയും ഓർമപ്പെരുന്നാളിന് ഫാ. ഏലിയാസ് പി. ജോർജ് കൊടിയേറ്റി.
ഇന്ന് രാവിലെ 8.30ന് ഐസക് മാർ ഒസ്താത്തിയോസ് മെത്രാപ്പോലീത്തയുടെ മുഖ്യകാർമികത്വത്തിൽ വിശുദ്ധ മൂന്നിന്മേൽ കുർബാന, തുടർന്ന് പ്രദക്ഷിണം, നേർച്ച സദ്യ എന്നിവയുണ്ടാകും.