6

അങ്കമാലി: അധ്യാപന, സാഹിത്യ, നേതൃപരിശീലന മേഖലകളിൽ ദീർഘവർഷങ്ങൾ മികവടയാളങ്ങൾ കുറിച്ച പ്രതിഭ ടോം ജോസ് അങ്കമാലി നവതിയുടെ നിറവിൽ. ആറു പതിറ്റാണ്ടിലധികമായി കേരളത്തിന്‍റെ വിവിധ ഭാഗങ്ങളിൽ പ്രഭാഷകനും സംഘാടകനുമായി മികവു തെളിയിച്ച വ്യക്തിയാണ് ടോം ജോസ്.

അങ്കമാലി സെന്‍റ് ജോസഫ് ഹൈസ്കൂളിൽ ദീർഘകാലം മലയാളം അധ്യാപകനായിരുന്നു. 1991-ൽ വിരമിച്ചു. നിരവധി ഗ്രന്ഥങ്ങൾ രചിച്ചിട്ടുണ്ട്. ദീപിക ചിൽഡ്രൻസ് ലീഗ് ഉൾപ്പടെ വിവിധ സാഹിത്യ-സാമൂഹിക സംഘടനകളുടെ ഭാരവാഹിയായും സഹകാരിയായും പ്രവർത്തിച്ചു.

കേരള സാഹിത്യ കലാസമിതി സെക്രട്ടറി, കെസിഎസ്എൽ, കത്തോലിക്ക കോൺഗ്രസ് അതിരൂപത പ്രസിഡന്റ്‌, സമസ്ത കേരള സാഹിത്യ പരിഷത്ത് സെക്രട്ടറി എന്നീ നിലകളിൽ സേവനം ചെയ്തു. 12 കൃതികൾ രചിച്ചിട്ടുണ്ട്. വിവിധ അവാർഡുകളും നേടി.

കേരള ഹിസ്റ്ററി കോൺഗ്രസ് അങ്കമാലി പൗരാവലിയുടെ സഹകരണത്തോടെ ഇന്ന് ഉച്ചയ്ക്കു രണ്ടിന് അങ്കമാലി എലൈറ്റ് ഹോട്ടലിൽ ടോം ജോസിന് ആദരമർപ്പിച്ചു സമ്മേളനം സംഘടിപ്പിച്ചിട്ടുണ്ട്. മന്ത്രി റോജി എം. ജോൺ ഉദ്ഘാടനം നിർവഹിക്കും. നഗരസഭ ചെയർപേഴ്സൺ റീത്ത പോൾ അധ്യക്ഷത വഹിക്കും. അഡ്വ. തോമസ് ഉണ്ണിയാടൻ എംഎൽഎ, എൽഎഫ് ആശുപത്രി ഡയറക്ടർ ഫാ. ജേക്കബ് ജി. പാലക്കാപ്പിള്ളി തുടങ്ങിയവർ പങ്കെടുക്കും.

ഒരു അധ്യാപകന്‍റെ ദീർഘകാല സേവനത്തിനും സാഹിത്യ-സാമൂഹിക പ്രവർത്തനങ്ങൾക്കും നേതൃത്വം നൽകിയ സമർപ്പിത ജീവിതത്തിനുമുള്ള ആദരവായാണ് നവതി സ്വീകരണം സംഘടിപ്പിക്കുന്നതെന്ന് കേരള ഹിസ്റ്ററി സെക്രട്ടറി ബേബി മുക്കൻ പറഞ്ഞു.

Tags : TomJose Angamaly