മലയോര ഹൈവേ നിർമാണത്തിനിടെ ഷോക്കേറ്റ് മരിച്ച ബംഗാൾ സ്വദേശി സുധീർ ബർമ്മ.
നിലമ്പൂർ: മലയോര ഹൈവേ നിർമാണത്തിനിടെ അതിഥി തൊഴിലാളി ഷോക്കേറ്റ് മരിച്ചു. നിലമ്പൂർ - നായാടംപൊയിൽ അകമ്പാടം റോഡിൽ മൈലാടി അമൽ കോളജിന് സമീപം വ്യാഴാഴ്ച വൈകുന്നേരം നാലരയ്ക്കുണ്ടായ സംഭവത്തിൽ ബംഗാൾ സ്വദേശി സുധീർ ബർമ്മയാണ് മരിച്ചത്.
റോഡിന്റെ സൈഡ് ഭിത്തി കെട്ടുന്നതിന് വേണ്ടി കോൺക്രീറ്റ് ചെയ്യുന്നതിനിടെയാണ് അപകടം സംഭവിച്ചത്. കോൺക്രീറ്റ് മിക്സിംഗ് മെഷീൻ വൈദ്യുതി കമ്പിയിൽ തട്ടിയതാണ് അപകടത്തിന് കാരണമെന്നാണ് പ്രാഥമിക നിഗമനം. അപകടം നടന്ന ഉടൻതന്നെ സുധീർ ബർമ്മയെ നിലമ്പൂർ ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
മൃതദേഹം നിലമ്പൂർ ജില്ലാ ആശുപത്രിയിൽ സൂക്ഷിച്ചിരിക്കുകയാണ്. പോലീസും ഫയർഫോഴ്സും സ്ഥലത്തെത്തി മേൽ നടപടികൾ സ്വീകരിച്ചു.
Tags : death electrocuted Migrant worker