ചെന്നൈ: തമിഴക വെട്രി കഴകത്തെ വെറുമൊരു നടന്റെ പാർട്ടിയെന്ന് വിളിച്ച് പരിഹസിക്കുന്നവരുടെ വായടപ്പിച്ച് പാർട്ടി അധ്യക്ഷനും തമിഴ്നാട് മുഖ്യമന്ത്രിയുമായ വിജയ്. തമിഴ്നാട്ടിലെ ജനങ്ങൾ നൽകിയ 35 ശതമാനം വോട്ടുകളുടെ പിൻബലത്തിലാണ് തങ്ങൾ അധികാരത്തിൽ വന്നത്.
ഇത്തരം പരിഹാസങ്ങളെ താൻ ഒട്ടും ഗൗനിക്കുന്നില്ലെന്നും അദ്ദേഹം വ്യക്തമാക്കി. ലക്ഷ്യത്തിലേക്ക് ഇനിയും ഒരുപാട് ദൂരം മുന്നോട്ട് പോകാനുണ്ടെന്നും അദ്ദേഹം കൂട്ടിച്ചേർത്തു. ഡിഎംകെയെ രൂക്ഷമായ ഭാഷയിലാണ് വിജയ് വിമർശിച്ചത്. ഒരു കുടുംബത്തിന് മാത്രം പ്രാധാന്യം നൽകുന്നതല്ല തങ്ങളുടെ രാഷ്ട്രീയം.
തമിഴ്നാട്ടിലെ ഓരോ സാധാരണ കുടുംബത്തിനും തുല്യ പ്രാധാന്യവും അവകാശവും നൽകുന്ന ഭരണമാണ് തങ്ങളുടേതെന്ന് വിജയ് അവകാശപ്പെട്ടു. കേന്ദ്ര സർക്കാരിന്റെ ഹിന്ദി അടിച്ചേൽപ്പിക്കലിനെതിരെയും നീറ്റ് പരീക്ഷ തട്ടിപ്പിനെയും അദ്ദേഹം വിമർശിച്ചു. തമിഴ്നാട് നിയമസഭയിൽ ചൊവ്വാഴ്ച നടത്തിയ പ്രസംഗത്തിലായിരുന്നു വിജയ് നിലപാട് വ്യക്തമാക്കിയത്.
Tags : joseph vijay assembly speech tamilnadu